COVID-19
ជាតិ
លោក យ៉េង ដានុយ យកជំនាញធ្វើនំ ទៅបើកអាជីវកម្មផ្ទាល់ខ្លួន ក្នុងវិបត្តិកូវីដ១៩
× ភ្នំពេញ៖ កើតក្នុងជំរំសាយធូលោក យ៉េង ដានុយ ដែលមានលទ្ធភាពរៀនត្រឹមថ្នាក់ទី១២ ចេះធ្វើនំបុ័ងប៉ែកអ៊ឺរ៉ុបនិងអាស៊ីជាង២០០មុខ និងចេះធ្វើនំខេកផងដែរ។ ចំណេះធ្វើនំនេះ លោកមិនបានចំណាយប្រាក់ទៅរៀនក្នុងសាលាឡើយ ប៉ុន្តែលោកទទួលបានពីបទពិសោធធ្វើការងារយកប្រាក់ខែ។ ក្នុងដំណាក់កាលវិបត្តិកូវីដ១៩ លោក ដានុយ ត្រូវបាត់បង់ប្រាក់ខែប្រហែលពាក់កណ្ដាល ការណ៍នេះបាននាំឱ្យបុរសវ័យ៣០ឆ្នាំរូបនេះ សម្រេចចិត្តយកចំណេះជំនាញដែលខ្លួនមាន ទៅបើកអាជីវកម្មផ្ទាល់ខ្លួន។
ធ្លាប់ឆ្លងកាត់បទពិសោធផ្លាស់ប្ដូរកន្លែងធ្វើការច្រើន មានទាំងភោជនីយដ្ឋាននិងសណ្ឋាគារ លោក យ៉េង ដានុយ បច្ចុប្បន្នមានចំណេះធ្វើនំបុ័ងប៉ែកអ៊ឺរ៉ុប និងអាស៊ីប្រហែល២០០មុខ(Bakery)។ ក្រៅពីនោះ លោកក៏មានជំនាញធ្វើនំ(Pastry) ជាច្រើនមុខផងដែរ។
ព្រោះតែបាត់ចំណូលប្រហែលពាក់កណ្ដាល ពោលពីប្រាក់ខែប្រមាណ៨០០ដុល្លារអាមេរិក នៅត្រឹមជាង៤០០ដុល្លារអាមេរិក ព្រោះកូវីដ១៩ លោក យ៉េង ដានុយ បានសម្រេចចិត្តបើកអាជីវកម្មលក់នំបុ័ងខ្នាតតូចក្នុងផ្ទះរបស់ខ្លួននៅខណ្ឌឫស្សីកែវ ក្នុងខែកញ្ញា ឆ្នាំ២០២០។ បើកអាជីវកម្មស្របពេលការរីករាលដាលកូវីដ១៩ នៅក្នុងប្រទេសក៏ដូចជាពិភពលោក បុរសកូន២រូបនេះ មានជំនឿលើខ្លួនឯង ថាមុខរបរនេះនឹងអាចដើរទៅមុខបាន។
មានទំនុកចិត្តលើខ្លួនឯង ព្រោះលោក ដានុយ បានធ្វើនំគ្រប់ប្រភេទដែលគ្រោងចេញលក់ ឱ្យបងប្អូននិងមិត្តភ័ក្ដិទទួលទាន ដើម្បីឱ្យពួកគេជួយផ្ដល់យោបល់។ ក្រោយទទួលបានពិន្ទុខ្ពស់រួចហើយ ទើបលោកសម្រេចចិត្តបើកលក់តែម្ដង។
« មួយខែខ្ញុំធ្វើការបានតែ៩ថ្ងៃប៉ុណ្ណោះ ខ្ញុំមិនចង់ចំណាយពេលនៅផ្ទះទំនេចោល ខ្ញុំក៏ចាប់ផ្ដើមគិតពីការបើកលក់នំបុ័ង។ ខ្ញុំគិតថាបើទោះជាលក់បានប្រាក់តិចឬច្រើនក្ដី ក៏បានចំណូលចូលផ្ទះខ្លះផ្សំគ្នាជាមួយប្រាក់ខែដែរ។ ប្រាក់ខែរបស់ខ្ញុំជាមធ្យមទទួលបាន៨០០ដុល្លារ តែខែខ្លះបានច្រើនជាងនេះ ហើយខែខ្លះបានតិចជាងនេះ។ ប៉ុន្តែពេលមានកូវីដ១៩ ខ្ញុំនៅសល់តែជាង៤០០ដុល្លារប៉ុណ្ណោះ។ រាល់ថ្ងៃខ្ញុំលក់បានប្រហែល៥០ទៅ៦០នំ ហើយថ្ងៃខ្លះលក់បាន៣០នំ។ លក់ដាច់ច្រើនពីថ្ងៃចន្ទដល់សុក្រ ចំណែកថ្ងៃសៅរ៍និងថ្ងៃអាទិត្យ លក់មិនសូវដាច់ទេ។ ពេលនេះគ្រប់គ្រងចំណូលមិនទាន់បានទេ។ ដំបូងឡើយខ្ញុំធ្វើឱ្យមិត្តភ័ក្ដីបងប្អូនខ្ញុំហូប គាត់ទទួលយកបានថាឆ្ងាញ់ហើយ ទើបខ្ញុំបើកលក់»។ នេះជាការបញ្ជាក់បន្ថែមពីលោក យ៉េង ដានុយ។
ចូលហាត់ការក្នុងសណ្ឋាគារលំដាប់ខ្ពស់មួយនៅក្នុងរាជធានីភ្នំពេញ បន្ទាប់មកប្ដូរការងារទៅភោជនីដ្ឋាន និងសណ្ឋាគារផ្សេងៗជាច្រើនទៀត ដើម្បីទទួលបានប្រាក់ខែខ្ពស់ មុខដំណែង ជាពិសេសចំណេះធ្វើនំសម្បូរបែប។ តាមពិតទៅលោក យ៉េង ដានុយ បានដាក់គោលដៅក្នុងជីវិតតាំងពីថ្ងៃដំបូងនៃការចូលបម្រើការឱ្យគេម្ល៉េះ គឺសន្សំចំណេះដើម្បីក្លាយជាម្ចាស់អាជីវកម្ម។
លោក ដានុយ ពន្យល់៖«ដើរចេញពីន្លែងនេះទៅកន្លែងផ្សេង ជួបមនុស្សថ្មី បានចែករំលែកចំណេះគ្នាទៅវិញទៅមក។ ខ្ញុំធ្លាប់បានគិតតាំងតែពីដើម ថាទៅធ្វើការឱ្យគេដើម្បីថ្ងៃណាមួយចេញមកបើកអាជីវកម្មដោយខ្លួនឯង។ អាជីវកម្មរបស់ខ្ញុំសព្វថ្ងៃនេះខ្ញុំធ្វើតែនំប៉ែកអាស៊ីទេ តែខ្ញុំធ្វើបែបច្នៃប្រឌិត មានច្រើនរសជាតិ និងច្រើនម៉ូដ។ ក្នុងមួយថ្ងៃខ្ញុំធ្វើប្រហែល១៣មុខ ហើយក្នុងមួយមុខជួនខ្ញុំធ្វើ៤នំ ជួន៥នំ ជួន១០នំ អាស្រ័យថា នំណាលក់ដាច់ច្រើន នោះទើបខ្ញុំធ្វើច្រើន។ ខ្ញុំបើកលក់តិចតួចសិន បើខាតក៏ខាតតិចដែរ តែកន្លងមកខ្ញុំលក់សល់តែនំប្រហែល២ទៅ៣នំអីទេ»។
ទៅថ្ងៃអនាគតលោក យ៉េង ដានុយ ដែលបានកើតក្នុងជំរំសាយធូ និងបានធំដឹងក្ដីក្នុងរាជធានីភ្នំពេញ មានគម្រោងពង្រីកអាជីវកម្មលក់នំបុ័ងរបស់ខ្លួនឱ្យកាន់តែធំជាងនេះ៕
Tag:
អាជីវកម្ម
មុខរបរ
កូវីដ១៩
នំបុ័ង
© រក្សាសិទ្ធិដោយ thmeythmey.com