អ្នកជំនាញ៖ ការបាញ់ថ្នាំសម្លាប់មេរោគ និងទឹកអាល់កុល លើរាងកាយមនុស្សមិនអាចប្រឆាំងកូវីដ-១៩ឡើយ

ជាតិ

សង្គមជាតិ

អ្នកជំនាញ៖ ការបាញ់ថ្នាំសម្លាប់មេរោគ និងទឹកអាល់កុល លើរាងកាយមនុស្សមិនអាចប្រឆាំងកូវីដ-១៩ឡើយ

22, Dec 2020 , 4:06 pm

រូបភាព

អ្នកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល

ដោយ:

ភ្នំពេញ៖ ការបាញ់ថ្នាំសម្លាប់មេរោគ ឬទឹកអាល់កុលនៅលើរូបរាងកាយមនុស្ស មិនអាចប្រឆាំងនឹងវីរុសកូវីដ-១៩ឡើយ។ ផ្ទុយទៅវិញវាអាចធ្វើឲ្យមនុស្សគ្រោះថ្នាក់ដល់សុខភាព។ លោកស្រី ឱ វណ្ណឌីន អ្នកនាំពាក្យក្រសួងសុខាភិបាល បានពន្យល់ណែនាំបែបនេះ ដោយយោងតាមអង្គការសុខភាពពិភពលោក។

លោកស្រី ឱ វណ្ណឌីន អ្នកនាំពាក្យក្រសួងសុខាភិបាល បានពន្យល់ថា នៅពេលមនុស្សយកសារធាតុ ឬថ្នាំបាញ់សម្លាប់មេរោគ ទៅបាញ់នៅរូបរាងកាយ វាអាចនឹងប៉ះពាល់ដល់ស្បែក និងភ្នែក ហើយវាក៏ធ្វើឲ្យពុលផងដែរ បើសិនជាបាញ់ចូលមាត់។

រដ្ឋលេខាធិការក្រសួងសុខាភិបាល បានពន្យល់តាមការណែនាំរបស់អង្គការសុខភាពពិភពលោកដូច្នេះថា៖«សារធាតុទាំងនោះអាចធ្វើឲ្យពុល ប្រសិនបើប៉ះមាត់ ហើយលេបចូលទៅ អាចធ្វើឲ្យរំខាន រមាស់ ឬរលាកអាល់ឡែកហ្ស៊ីស្បែក ធ្វើឲ្យខូចស្បែក និងភ្នែករបស់មនុស្ស»។

អ្នកនាំពាក្យក្រសួងសុខាភិបាលបានពន្យល់ថា សារធាតុ ឬថ្នាំសម្លាប់មេរោគនោះ គឺប្រើបានសម្រាប់តែសម្លាប់មេរោគនៅផ្ទៃទីកន្លែងណាមួយតែប៉ុណ្ណោះ។ លោកស្រី ឱ វណ្ណឌីន ក៏សង្កត់ធ្ងន់ថា ទឹកអាល់កុល ឬជែលអាចបាញ់តែនៅលើដៃមនុស្ស សម្រាប់សម្លាប់មេរោគផ្សេងៗ។ ប៉ុន្តែមិនអាចបាញ់នៅលើផ្ទៃខ្លួនរបស់មនុស្សបានឡើយ។

លោកស្រី ឱ វណ្ណឌីន បានណែនាំឲ្យពលរដ្ឋទុកដាក់នូវសារធាតុ ឬថ្នាំសម្លាប់មេរោគទាំងនោះឲ្យឆ្ងាយពីកុមារ ដើម្បីជៀសវាងគ្រោះថ្នាក់ដល់កុមារ។

ជម្រើសដ៏ល្អដើម្បីការពារ និងទប់ស្កាត់ពីជំងឺកូវីដ-១៩ ក្រសួងសុខាភិបាលអំពាវនាវដល់ពលរដ្ឋបន្តពាក់ម៉ាស់ពេលចេញក្រៅផ្ទះ លាងដៃជាមួយនឹងទឹកអាល់កុល ឬជែល ឬទឹកសាប៊ូ ឲ្យបានញឹកញាប់ និងរក្សាគម្លាតសុវត្ថិភាពពីគ្នា១ម៉ែត្រកន្លះឡើងទៅ នៅគ្រប់ទីកន្លែង គ្រប់ពេលវេលា និងគ្រប់កាលៈទេសៈ៕