ជាតិ
អ្នកចិញ្ចឹមទាមួយចំនួននៅព្រៃវែង ជួបការលំបាកដោយសារពងទាចុះថោកខ្លាំង
× ភ្នំពេញ៖ កសិករចិញ្ចឹមទា នៅក្នុងឃុំព្រៃព្នៅ ស្រុកពារាំង ខេត្តព្រៃវែង កំពុងជួបការលំបាកដោយសារពងទា មានការចុះថ្លៃខ្លាំងពេក ដែលនាំឲ្យខាតប្រាក់យ៉ាងតិចណាស់ ១៥ម៉ឺនរៀល ជារៀងរាល់ថ្ងៃ។ បើតាមលោក ឃ្លាំង មឿង ជាកសិករចិញ្ចឹមទា ក្នុងឃុំព្រៃព្នៅ មូលហេតុដែលពងទាមានការធ្លាក់ចុះ ព្រោះមានការនាំចូលពងទាពីប្រទេសជិតខាងច្រើនពេក។
ការធ្លាក់ចុះនៃតម្លៃពងទា ធ្វើឲ្យកសិករក្នុងឃុំព្រៃព្នៅ មានកង្វល់ជាខ្លាំងដោយត្រូវប្រឈមមុខ ជាមួយការខាតថ្លៃចំណីជារៀងរាល់ថ្ងៃ។ លោក ឃ្លាំង មឿង កសិករចិញ្ចឹមទា បញ្ជាក់ថា ពងទាធ្លាប់តែមានតម្លៃមួយគ្រាប់ ៤៣០រៀល ទៅ៤៩០រៀល ពេលនេះសល់ត្រឹម មួយគ្រាប់៣៣០រៀលតែប៉ុណ្ណោះ ទើបធ្វើឲ្យប្រជាជនមិនអាចមានថវិកាគ្រប់គ្រាន់សម្រាប់ផ្ដល់ចំណីដល់សត្វទានោះទេ។
បើតាមលោក ឃ្លាំង មឿង ក្នុងចំណោមកសិករ ដទៃទៀតដែលចិញ្ចឹមទាបានប្រាប់សារព័ត៌មានThmeyThmey ថាពងទាក្នុងកសិដ្ឋានរបស់លោកបានធ្លាក់ថ្លៃប្រហែល ១ខែចុងក្រោយនេះ។ កសិករចិញ្ចឹមទាចំនួន ៥០០០ក្បាល ត្រូវខាតប្រាក់យ៉ាងតិចណាស់១៥ម៉ឺ រៀលជារៀងរាល់ថ្ងៃ ក្នុងការទិញចំណី។
លោក ឃ្លាំង មឿង បានលើកឡើងពីមូលហេតុដែលពងទាចុះថោកដូច្នេះថា៖ « ពងទាចុះថោក ដោយសារមានការនាំចូលពីប្រទេសជិតខាងច្រើនពេក អ៊ីចឹងធ្វើឲ្យពងទាខ្មែរយើងពិបាកលក់។ បើបិទការនាំចូលទៅគឺពងទាអាចឡើងថ្លៃឯងតែម្ដង»។ បញ្ហានេះមិនមែនកើតឡើងតែចំពោះលោកនោះទេ ខណៈប្រជាជនប្រមាណ២០-៣០ គ្រួសារ ក្នុងឃុំព្រៃព្នៅ កំពុងជួបវិបត្តិជំពាក់ធនាគាផងដែរ។ នេះជាការបញ្ជាក់បន្ថែមរបស់លោក មឿង។
លោក ឃ្លាំង មឿង បានសំណូមពរឲ្យ រដ្ឋាភិបាលទប់ស្កាត់ការនាំចូលពងទា ពីប្រទេសជិតខាងដើម្បីឲ្យរូបលោក និងកសិករដែលចិញ្ចឹមទាផ្សេងទៀតអាចលក់ពងទា បានក្នុងតម្លៃមួយសមរម្យឡើងវិញដើម្បីយកប្រាក់មកដោះបំណុលធនាគា និងផ្គត់ផ្គង់ជីវភាពប្រចាំថ្ងៃ៕
Tag:
ព្រៃវែង
កសិកម្ម
ThmeyThmey
© រក្សាសិទ្ធិដោយ thmeythmey.com