កូវីដ-១៩៖ លោក ប្រាយុទ្ធ ព្រមានចាត់ការអ្នកនាំចំណាកស្រុកចូលប្រទេសដោយខុសច្បាប់

COVID-19

អន្តរជាតិ

កូវីដ-១៩៖ លោក ប្រាយុទ្ធ ព្រមានចាត់ការអ្នកនាំចំណាកស្រុកចូលប្រទេសដោយខុសច្បាប់

23, Dec 2020 , 9:44 am

រូបភាព

លោកប្រាយុទ្ធ ចាន់អូចា ថ្លែងសារទៅកាន់ប្រជាជនរបស់ខ្លួន នៅថ្ងៃទី២២ ខែធ្នូ ឆ្នាំ ២០២០។ រូបភាព៖ វិមានរដ្ឋាភិបាលថៃ

ដោយ: ធៀន ភារិន្ទ

នាយករដ្ឋមន្ត្រីថៃ លោក ប្រាយុទ្ធ ចន្ទអូចា នៅថ្ងៃទី២២ ខែធ្នូ បានព្រមានចាត់វិធានការលើបណ្ដាញឈ្មួញដែលនាំជនចំណាកស្រុកចូលប្រទេសដោយគ្មានការអត់ឱនអ្វីឡើយ បើទោះបីជាពួកគេមានខ្នងជាមន្ត្រីជាន់ខ្ពស់របស់រដ្ឋាភិបាលក៏ដោយ។ ការលើកឡើងរបស់ប្រមុខរដ្ឋាភិបាលថៃបែបនេះ ធ្វើឡើងស្របពេលករណីឆ្លងនៅក្នុងប្រទេស កំពុងតែកើនឡើង ពិសេសក្នុងចំណោមពលករចំណាកស្រុកខុសច្បាប់ មកពីមីយ៉ាន់ម៉ា។

អត្ថបទទាក់ទង

ទ័ពថៃសារភាពថា ពិបាកទប់ស្កាត់ចំណាកស្រុកមីយ៉ាន់ម៉ា ខណៈករណីឆ្លងកាន់តែកើនឡើង

ក្នុងសេចក្ដីថ្លែងការណ៍ពិសេសទៅកាន់ប្រជាជនថៃ លោក ប្រាយុទ្ធ ចន្ទអូចា នាយករដ្ឋមន្ត្រីថៃ បានលើកឡើងពីបញ្ហាជាច្រើនជុំវិញកូវីដ-១៩ ដែលបានរាតត្បាតទាំងនៅក្នុងប្រទេសថៃ និងនៅទូទាំងពិភពលោក។ ចំណុចដែលប្រមុខរដ្ឋាភិបាលផ្តោតខ្លាំងជាងគេ គឺបញ្ហាចំណាកស្រុកខុសច្បាប់ ដែលបង្កឲ្យកូវីដ-១៩ បានរាតត្បាតយ៉ាងខ្លាំង នៅក្នុងប្រទេសថៃ ជាពិសេសខេត្តសាមុតសាខន។

លោក ប្រាយុទ្ធ បានព្រមានថា នឹងដាក់ទោស ដោយគ្មានការអត់ឱនលើអ្នកនាំជនចំណាកស្រុកខុសច្បាប់ ចូលមកក្នុងប្រទេស។ « ពួកគេ នឹងត្រូវកាត់ទោសដោយគ្មានការលើកលែងអ្វីទាំងអស់ មិនថាពួកគេមានខ្សែជាមួយមន្ត្រីក្នុងជួររដ្ឋាភិបាលក៏ដោយ»។ ប្រមុខរដ្ឋាភិបាលថៃ បានលើកឡើងបែបនេះ ដោយបន្ទោសទៀថា ករណីឆ្លងកើតឡើង ដោយសារតែជនចំណាកស្រុកខុសច្បាប់ ចូលមកថៃ។ នេះបើតាមការចុះផ្សាយរបស់កាសែតបាងកកប៉ុស្តិ៍។

ក្រៅពីនេះ លោក ប្រាយុទ្ធ បានប្រកាសថា ថៃនឹងប្រុងប្រយ័ត្នជាងមុន ចំពោះអ្នកដែលបានចូលមកក្នុងប្រទេសថៃទាំងអស់ ដោយសារពេលនេះ កូវីដ-១៩ កំពុងតែរាតត្បាតខ្លាំង នៅក្នុងប្រទេសផ្សេង និងពិភពលោក។ សម្រាប់លោក ប្រាយុទ្ធ ប្រសិនបើមិនប្រយ័ត្នទេ វាអាចបង្កឲ្យប្រព័ន្ធសុខាភិបាលថៃ រងគ្រោះកាន់តែខ្លាំង ចំណែកសេដ្ឋកិច្ច អាចនឹងជួបផលវិបាកជាច្រើនទៀត។

ប្រសិនគ្មានការប្រែប្រួលទេ លោកនាយករដ្ឋមន្ត្រីថៃ នឹងត្រូវប្រជុំជាមួយ មជ្ឈមណ្ឌលគ្រប់គ្រងស្ថានការណ៍កូវីដ-១៩ ថៃ (CCSA) ជុំវិញស្ថានការណ៍កូវីដ-១៩ នៅក្នុងប្រទេសបន្ថែមទៀត ដើម្បីដាក់ចេញវិធានការបន្ថែម ក៏ដូចជាចំណាត់ការមួយចំនួន ទាក់ទិននឹងការអបអរឆ្នាំថ្មី នាពេលខាងមុខ។

គណៈរដ្ឋមន្ត្រីថៃ នៅថ្ងៃទី២២ ខែធ្នូ បានអនុម័ត លើសេចក្តីព្រាងធ្វើវិសោធនកម្មលើច្បាប់ ស្តីពីជំងឺឆ្លងផងដែរ។ វិសោធនកម្មច្បាប់នេះ មានចំណុចមួយចំនួន បានផ្តល់អំណាចដល់អាជ្ញាធរក្នុងការដាក់ទណ្ឌកម្ម និងពិន័យលើជនទាំងឡាយណា ដែលចម្លងវីរុសទៅអ្នកដទៃ ក៏ដូចជា អ្នកដែលចេញរោគសញ្ញា មិនទៅជួបគ្រូពេទ្យជាដើម។ សេចក្តីព្រាងនេះ ត្រូវដាក់ទៅសភាឲ្យអនុម័តបន្ថែមទៀត។

សូមបញ្ជាក់ថា ថៃ នៅថ្ងៃទី២២ ខែធ្នូ បានរកឃើញថា មានករណីឆ្លងថ្មីចំនួន ៤២៧ករណី ដែលភាគច្រើន គឺជាកម្មករចំណាកស្រុកមកពីមីយ៉ាន់ម៉ា។ ករណីឆ្លងសរុបរបស់ថៃ បានកើនដល់ ៥៧១៦ករណី និងអ្នកស្លាប់មានចំនួន ៦០នាក់។ ចំណែកអ្នកជាសះស្បើយមានចំនួន ៤០៧៨ នាក់៕