ជាតិ
ដំឡូងមីស្រស់នៅស្ទឹងត្រែងអាចលក់បាន៤០០រៀលក្នុងមួយគីឡូក្រាម ខណៈទិន្នផលធ្លាក់ចុះ
កសិករកំពុងប្រមូលផលដំឡូងមី (រូបភាពពីគម្រោងអាស្ប៉ាយ)
×![]()
រដូវប្រមូលផលដំឡូងមី បានមកដល់ (វិច្ឆិកា-មករា) កសិករ ក្នុងខេត្តស្ទឹងត្រែង ក៏កំពុងមមាញឹក ប្រមូលផលដូចគ្នា។ ជាក់ស្ដែងឆ្នាំនេះ តម្លៃដំឡូងមីស្រស់ អាចលក់បានក្នុងតម្លៃ ៣២០រៀលទៅ ៤០០រៀល ក្នុងមួយគីឡូ ខណៈឆ្នាំមុនដំឡូងមីស្រស់ តម្លៃមិនបាន ៣០០រៀល។ បើតាមលោក លៀង សេង ប្រធានមន្ទីរកសិកម្មខេត្តស្ទឹងត្រែង ជាមធ្យមកសិករទទួលបានទិន្នផលដំឡូងមីចំនួន ២០តោន ក្នុងមួយហិកតា។ 
លោក លៀង សេង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តស្ទឹងត្រែង បានប្រាប់សារព័ត៌មានThmeyThmey25 តាមទូរសព្ទថា ឆ្នាំនេះដំឡូងមីហាក់ មានតម្លៃកើនជាងឆ្នាំមុន ប៉ុន្តែទិន្នផលបែរជាថយចុះបន្តិច។
លោក លៀង សេង ពន្យល់យ៉ាងដូច្នេះ៖«ដ្បិតឆ្នាំនេះ តម្លៃដំឡូងមីកើនបន្តិចមែន តែទិន្នផលមានការថយចុះ ព្រោះឆ្នាំនេះ ដំណាំដំឡូងមី មានបញ្ហាជំងឺដង្កូវស៊ីស្លឹក។ មួយផ្នែកទៀត កន្លងមកទឹកជំនន់ ក៏បានវាយប្រហារ ដំណាំដំឡូងមីយើងខ្លះដែរ»។
ប្រធានមន្ទីរកសិកម្មរូបនេះ បន្តថា តម្លៃដំឡូងមីស្រស់ ឆ្នាំនេះ កើនជាងឆ្នាំមុន ពលរដ្ឋភាគច្រើនចូលចិត្ត លក់ដំឡូងមីស្រស់ ជាងដំឡូងមីស្ងួត ដែលមានតម្លៃប្រមាណ ៧០០រៀល ក្នុងមួយគីឡូក្រាម។
ប្រទេសវៀតណាម ជាទីផ្សារធំ ក្នុងការនាំចេញដំឡូងមី ចេញពីខេត្តស្ទឹងត្រែង។ បច្ចុប្បន្ន ទូទាំងខេត្តស្ទឹងត្រែង មានផ្ទៃដីដាំដំណាំដំឡូងមី ប្រមាណ ១ម៉ឺនហិកតា ជាប្រភេទដំណាំដែល កសិករនិយមដាំ បន្ទាប់ពីដំណាំស្រូវ និងប្រភេទបន្លែ ជាច្រើនមុខផ្សេងទៀត។ នេះជាការបញ្ជាក់របស់ប្រធានមន្ទីរកសិកម្មខេត្តស្ទឹងត្រែង៕
Tag:
ដំឡូងមី
© រក្សាសិទ្ធិដោយ thmeythmey.com
