អន្តរជាតិ
អ៊ីស្រាអែល ជួបវិបត្តិនយោបាយជាថ្មីរហូតត្រូវរំលាយសភា លោក បេននី ហ្កាន់ (ឆ្វេង) និងលោកនាយករដ្ឋមន្រ្តី បេនចាមី ណេតាន់យ៉ាហ៊ូ (ស្តាំ) ។ រូបថត៖ AFP
× នៅថ្ងៃទី២៣ ធ្នូ រដ្ឋសភាអ៊ីស្រាអែលត្រូវបានរំលាយជាថ្មី បន្ទាប់ពីរដ្ឋាភិបាលចម្រុះរបស់លោកនាយករដ្ឋមន្ត្រី បេនចាមីន ណេតាន់យ៉ាហ៊ូ មិនអាចស្វែងរកសំឡេងគ្រប់គ្រាន់ក្នុងការអនុម័តការទូទាត់ចំណាយឆ្នាំ២០២០ និងកញ្ចប់ថវិកាថ្មីសម្រាប់ឆ្នាំ២០២១បាន។ ការរំលាយសភានេះ តម្រូវឲ្យអ៊ីស្រាអែលរៀបចំការបោះឆ្នោតលើកទី៤ ក្នុងរយៈពេល២ឆ្នាំ ដែលជាវិបត្តិនយោបាយមិនធ្លាប់មានក្នុងប្រវត្តិសាស្ត្រអ៊ីស្រាអែល។
ក្រោយការបោះឆ្នោតរដ្ឋសភា៣ដងជាប់ៗគ្នា តែមិនអាចរកសំឡេងគ្រប់គ្រាន់ក្នុងការបង្កើតរដ្ឋាភិបាលបាន នៅខែមេសា ឆ្នាំ២០១៩ លោក បេនចាមីន ណេតាន់យ៉ាហ៊ូ បានចាប់ដៃគូជាមួយគូប្រជែង បេននី ហ្កាន់ ក្នុងការបង្កើតរដ្ឋាភិបាលរួបរួមជាតិដែលមានរយៈពេល៣ឆ្នាំ។ ក្នុងកិច្ចព្រមព្រៀង លោក ណេតាន់យ៉ាហ៊ូ នឹងធ្វើនាយករដ្ឋមន្ត្រីរយៈពេលមួយឆ្នាំកន្លះរហូតដល់ខែតុលា ឆ្នាំ២០២១ មុននឹងប្រគល់តំណែងនេះលោក ហ្កាន់ ដែលជារដ្ឋមន្ត្រីការពារជាតិបច្ចុប្បន្ន។
ប៉ុន្តែរដ្ឋាភិបាលរួបរួមជាតិនេះ រស់មិនបាន៣ឆ្នាំឡើយ ដោយបក្សលីឃូដ របស់លោក ណេតាន់យ៉ាហ៊ូ និងបក្សខៀវសរបស់លោក ហ្កាន់ មិនអាចរកសំឡេងក្នុងការអនុម័តច្បាប់ថវិកាជាតិឆ្នាំ២០២០ និង២០២១។ បក្សរបស់លោក ណេតាន់យ៉ាហ៊ូ មានកៅអី៣៦ ឯបក្សរបស់លោក ហ្កាន់ មានកៅអីចំនួន១៤ ក្នុងសភាអ៊ីស្រាអែលដែលមានអាសនៈសរុបចំនួន១២០។ កៅអី១៧ទៀតរបស់លោក ហ្កាន់ ប្រែទៅជាសំឡេងប្រឆាំង ដោយសារមិនពេញចិត្តកិច្ចព្រមព្រៀងបង្កើតរដ្ឋាភិបាលចម្រុះ។
ថ្លែងប្រាប់ទីភ្នាក់ងារសារព័ត៌មានAFP អ្នកនាំពាក្យរដ្ឋសភាអ៊ីស្រាអែលលោក Uri Michael និយាយថា តាមផ្លូវច្បាប់ ការមិនអាចអនុម័តថវិកាបាន នឹងតម្រូវឲ្យមានការរំលាយរដ្ឋសភា។
ក្រោយពេលរដ្ឋសភាត្រូវបានរំលាយ រដ្ឋាភិបាលរួបរួមជាតិ ត្រូវក្លាយជារដ្ឋាភិបាលអន្តរកាល ដោយការបោះឆ្នោតនឹងត្រូវរៀបចំឡើងនៅថ្ងៃទី២៣ ខែមីនា ឆ្នាំ២០២១។ អ្នកវិភាគនយោបាយមួយចំនួនអះអាងថា លោក ណេតាន់យ៉ាហ៊ូ ចង់ឲ្យមានការបោះឆ្នោតថ្មី ដោយសារតែលោកមិនចង់ផ្ទេរតំណែងនាយករដ្ឋមន្ត្រីទៅឲ្យលោក ហ្កាន់ នៅឆ្នាំ២០២១។
ចំពោះការបោះឆ្នោតថ្មីនេះ លោក ហ្កាន់ និងលោក ណេតាន់យ៉ាហ៊ូ សុទ្ធសឹងប្រឈមហានិភ័យដូចគ្នា។ បក្សខៀវសរបស់លោក ហ្កាន់ ប្រឈមនឹងការបាត់បង់សំឡេងដោយសារតែចូលរួមបង្កើតរដ្ឋាភិបាលចម្រុះ។ ក្រោយការបង្កើតរដ្ឋាភិបាលចម្រុះ សម្ព័ន្ធមិត្តចាស់របស់លោក ហ្កាន់ បានទៅបង្កើតបក្សថ្មី ដែលពេលនេះជាបក្សប្រឆាំងធំបំផុតក្នុងរដ្ឋសភា។
ចំណែកលោក ណេតាន់យ៉ាហ៊ូ វិញក៏មិនទំនងជារកបានអាសនៈច្រើនដែរ ដោយសារលោកកំពុងជាប់ក្តីក្តាំរឿងសំណូក កេងបន្លំ និងរំលោភលើសេចក្តីទុកចិត្ត។ បើការបោះឆ្នោតសភាធ្វើឡើងក្នុងខែមីនា ឆ្នាំ២០២១ ដូចដែលបានគ្រោងទុក លោកបង្ខំចិត្តធ្វើយុទ្ធនាការបោះឆ្នោតត្រឹមខែកុម្ភៈ ដោយលោកត្រូវចូលទៅបំភ្លឺក្នុងតុលាការជាច្រើនដងក្នុងខែមីនា។ លោកទំនងអាចទាក់ទាញប្រជាប្រិយភាពខ្លះ ចំពោះការសម្រួលទំនាក់ទំនងការទូតជាមួយរដ្ឋអារ៉ាប់ ក៏ដូចជាការទទួលបានវ៉ាក់សាំងជំងឺកូវីដ-១ ៕
Tag:
អ៊ីស្រាអែល
បេនចាមីន ណេតាន់យ៉ាហ៊ូ
© រក្សាសិទ្ធិដោយ thmeythmey.com