ជាតិ
សេដ្ឋកិច្ច
រដ្ឋ បន្តអនុគ្រោះពន្ធដល់វិស័យទេសចរណ៍ និងឧបត្ថម្ភប្រាក់ដល់ជនក្រីក្រ និងកម្មកររោងចក្រ ពលរដ្ឋដែលមានបណ្ណសមធម៌ បន្តទទួលបានប្រាក់ឧបត្ថម្ភពីរដ្ឋ។ រូបថត AFP
× ភ្នំពេញ៖ រដ្ឋាភិបាលសម្រេចបន្តវិធានការគ្រប់គ្រងផលប៉ះពាល់លើវិស័យរោងចក្រកាត់ដេរ ទេសចរណ៍ អចលនទ្រព្យ និងជនក្រីក្រ រយៈពេល៣ខែបន្ថែមទៀត ដើម្បីស្ការនិងជំរុញកំណើនសេដ្ឋកិច្ចនៃវិបត្តិកូវីដ-១៩។
បើតាមសេចក្ដីប្រកាសព័ត៌មានរបស់រដ្ឋាភិបាលថ្ងៃទី២៣ធ្នូ វិធានការនេះគឺជាជុំទី៧ ដែលនឹងអនុគ្រោះរយៈពេល៣ខែ ចាប់ពីខែមករាដល់មីនា ឆ្នាំ២០២១។ វិធានការសម្រាប់កម្មករក្នុងវិស័យកាត់ដេរ-វាយនភណ្ឌ ស្បែកជើង ផលិតផលធ្វើដំណើរ កាបូប និងវិស័យទេសចរណ៍ផ្ទះសំណាក់ សណ្ឋាគារ ភោជនីយដ្ឋាន នឹងទទួលបានប្រាក់ឧបត្ថម្ភ៤០ដុល្លារក្នុងមួយខែ ប្រសិនរោងចក្រ សហគ្រាស និងអាជីវកម្មពួកគេព្យួរការងារតាមការអនុញ្ញាតរបស់ក្រសួងការងារ និងបណ្ដុះបណ្ដាលវិជ្ជាជីវៈ។ លើសពីនេះ នឹងទទួលបាន៣០ដុល្លារបន្ថែមទៀត ពីម្ចាស់រោងចក្រ អាជីវកម្ម។
ផ្នែកពន្ធប្រចាំខែ រដ្ឋាភិបាលសម្រេចបន្តលើកលែងការបង់ពន្ធ៣ខែដល់សណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភាក់ងារទេសចរណ៍ ដែលបានចុះបញ្ជីជាមួយអគ្គនាយកដ្ឋានពន្ធដារនៅភ្នំពេញ សៀមរាប ព្រះសីហនុ កែប កំពត ក្រុងបាវិត និងក្រុងប៉ោយប៉ែត។ ជាមួយគ្នាដែរ រដ្ឋសម្រេចបន្តលើកលែងការបង់ភាគទានរបបសន្តិសុខសង្គម បង់ពន្ថប៉ាតង់ និងពន្ធលើស្លាកយីហោ។
លើសពីនេះ គឺអនុញ្ញាតម្ចាស់រោងចក្រ សហគ្រាស និងអាជីវកម្ម ពន្យារពេលទូទាត់ប្រាក់រំលឹកអតីតភាពការងារ។ រីឯ វិស័យអាកាសចរណ៍ ក៏បន្តលើកលែងបន្តពន្ធអប្បបរមានិងពន្យារការបង់ប្រាក់ជំពាក់កម្រៃអាកាសចរស៊ីវិល៣ខែដែរ។
សម្រាប់វិស័យអចលនទ្រព្យរដ្ឋសម្រេចបន្តលើកលែងពន្ធប្រថាប់ត្រាដល់អ្នកទិញផ្ទះដែលមានតម្លៃទាបជាងឬស្មើប្រាំពីរម៉ឺនដុល្លារ ដោយគិតពីខែមករាដល់ខែមីនា។ ទន្ទឹមនឹងនេះ ការបន្ធូរបន្ថយការអនុវត្តពន្ធកាត់ទុកលើការប្រាក់សម្រាប់អ្នកផ្ដល់កម្ចីក្នុងស្រុក និងក្រៅស្រុក(Withholding Tax) រដ្ឋសម្រេចទម្លាក់អត្រាពន្ធកាត់ទុក លើកម្ចីរបស់ធនាគារ និងស្ថាប័នមីក្រូហិរញ្ញវត្ថុ មកនៅត្រឹម៥ភាគរយ។
ចំពោះជនក្រីក្រនិងជនងាយរងគ្រោះ ដែលមានបណ្ណសមធម៌ រដ្ឋាភិបាលសម្រេចបន្តឧបត្ថម្ភសាច់ប្រាក់៣ខែបន្ថែមទៀតផងដែរ៕
Tag:
ស្ដារសេដ្ឋកិច្ច
វិស័យទេសចរណ៍
ជនក្រីក្រ
© រក្សាសិទ្ធិដោយ thmeythmey.com