COVID-19
អន្តរជាតិ
កូរ៉េខាងត្បូង ចុះកិច្ចព្រមព្រៀងទិញវ៉ាក់សាំងកូវីដ-១៩ ពីក្រុមហ៊ុន Pfizer និង Janssen
រូបភាព Xinhua
×![]()
ដោយ: ធៀន ភារិន្ទ
កូរ៉េខាងត្បូង នៅថ្ងៃទី២៤ ខែធ្នូ បានចុះហត្ថលេខាជាមួយក្រុមហ៊ុនឱសថចំនួនពីរ ក្នុងការទិញវ៉ាក់សាំងប្រឆាំងកូវីដ-១៩ ដើម្បីទុកចាក់ឲ្យប្រជាជនខ្លួន។ 
តាមការបញ្ជាក់របស់ទីភ្នាក់ងារទប់ស្កាត់ និងគ្រប់គ្រងជំងឺឆ្លងកូរ៉េខាងត្បូង (KDCA) រដ្ឋាភិបាល ចុះកិច្ចព្រមព្រៀងទិញវ៉ាក់សាំងកូវីដ-១៩ សម្រាប់ប្រជាជន១០លាននាក់ពីក្រុមហ៊ុន Pfizer និងសម្រាប់មនុស្ស៦លាននាក់ពីក្រុមហ៊ុនឱសថ Janssen ដែលពីមុនគ្រោងទិញសម្រាប់ប្រជាជន៤លាននាក់ប៉ុណ្ណោះ។ កូរ៉េខាងត្បូង នឹងចុះកិច្ចព្រមព្រៀងទិញវ៉ាក់សាំងជាមួយក្រុមហ៊ុន Moderna នៅដើមឆ្នាំ២០២១។
លើសពីនោះ កូរ៉េខាងត្បូង ក៏បញ្ជាទិញវ៉ាក់សាំងតាមរយៈ COVAX ផងដែរ។
ពាក់ព័ន្ធនឹងយុទ្ធនាការចាក់វ៉ាក់សាំងវិញ លោក Chung Sye-kyun នាយករដ្ឋមន្ត្រីកូរ៉េខាងត្បូង បានលើកឡើងថា រដ្ឋាភិបាលគ្រោងនឹងចាប់ផ្តើមកម្មវិធីវ៉ាក់សាំងរបស់ខ្លួននៅត្រីមាសទី២ នៃឆ្នាំ២០២១។ «រដ្ឋាភិបាល នឹងផ្តោតការយកចិត្តទុកដាក់ឲ្យល្អបំផុត ដើម្បីធ្វើឲ្យសាធារណជន អាចទទួលបានការចាក់វ៉ាក់សាំងក្នុងពេលឆាប់ៗនេះ»។ លោក Chung បានលើកឡើងបែបនេះ នៅក្នុងកិច្ចប្រជុំស្តីពីការឆ្លើយតបនឹងកូវីដ-១៩ ដែលកំពុងរាតត្បាតនៅក្នុងប្រទេស។
កន្លងមក កូរ៉េខាងត្បូងគ្រោងចាក់វ៉ាក់សាំងលើប្រជាជនត្រឹមតែ ៤៤លាននាក់ទេ។ ប៉ុន្តែដោយសារកូរ៉េខាងត្បូង បានបង្កើនការទិញវ៉ាក់សាំង ពីរលានដូសបន្ថែមទៀត វាធ្វើឲ្យប្រជាជនកូរ៉េខាងត្បូង ចំនួន ៤៦លាននាក់ អាចទទួលបានការចាក់វ៉ាក់សាំងប្រឆាំងកូវីដ-១៩ ។
វ៉ាក់សាំងកូវីដ-១៩ របស់ក្រុមហ៊ុន AstraZeneca, Moderna និង Pfizer សុទ្ធតែត្រូវការការចាក់វ៉ាក់សាំងចំនួនពីរដូសលើមនុស្សម្នាក់ ឯវ៉ាក់សាំងរបស់ក្រុមហ៊ុន Janssen ត្រូវការចាក់វ៉ាក់សាំងតែមួយដូស។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
ប្រសិនគ្មានការប្រែប្រួលទេ ការដឹកជញ្ជូនវ៉ាក់សាំងរបស់ក្រុមហ៊ុន AstraZeneca ដែលកូរ៉េខាងត្បូងទិញកាលពីខែវិច្ឆិកា នឹងត្រូវដឹកជញ្ជូនមកនៅក្នុងអំឡុងខែកុម្ភៈ ឬខែមីនាខាងមុខ។ ចំណែកការដឹកជញ្ជូនវ៉ាក់សាំងផ្សេងទៀត អាជ្ញាធរកូរ៉េខាងត្បូង មិនបានបញ្ជាក់ទេ ថានឹងមកដល់ពេលណា។
នៅថ្ងៃទី២៤ ខែធ្នូ កូរ៉េខាងត្បូង មានករណីឆ្លងកូវីដ-១៩ ថ្មីចំនួន ៩៨៥ករណី និងអ្នកស្លាប់ចំនួន ១៧នាក់។ តួលេខសរុប កូរ៉េខាងត្បូងមានចំនួន ៥៣៥៣៣ករណី និងអ្នកស្លាប់មានចំនួន ៧៥៦នាក់។ ចំណែកអ្នកជាសះស្បើយមានចំនួន ៣៧៤២៥នាក់។
បើទោះបីជាករណីឆ្លងនៅតែបន្តកើនឡើងក៏ដោយ ក៏រដ្ឋាភិបាលទីក្រុងសេអ៊ូល មិនទាន់សម្រេចដំឡើងវិធានការដល់កម្រិត៣ នៅឡើយទេ ដោយសារបារម្ភពីផលប៉ះពាល់សេដ្ឋកិច្ចនៅក្នុងប្រទេស។ ពេលនេះ កូរ៉េខាងត្បូង អនុវត្តវិធានរក្សាគម្លាតសង្គមត្រឹមតែកម្រិត ២,៥ប៉ុណ្ណោះ សម្រាប់តំបន់ដែលមានករណីឆ្លងខ្ពស់។
សូមបញ្ជាក់ថា ចាប់ពីថ្ងៃទី២៣ ខែធ្នូ អាជ្ញាធរក្រុងសេអ៊ូល បានដាក់ចេញវិធានការហាមឃាត់ការជួបជុំមនុស្សលើសពី ៤នាក់។ ភោជនីយដ្ឋានអនុញ្ញាតឲ្យទទួលភ្ញៀវត្រឹមតែ ៤នាក់ប៉ុណ្ណោះ។ ចំណែកកន្លែងជិះស្គី និងតំបន់ភ្ញៀវទេសចរណ៍ផ្សេងទៀត ក៏ត្រូវបិទដែរ ដើម្បីទប់ស្កាត់ការរាតត្បាតនៃកូវីដ-១៩ ក្នុងអំឡុងពេលបុណ្យណូអែល និងថ្ងៃឆ្លងឆ្នាំថ្មី៕
Tag:
កូរ៉េខាងត្បូង
វ៉ាក់សាំង
កូវីដ-១៩
© រក្សាសិទ្ធិដោយ thmeythmey.com
