អន្តរជាតិ
លោក ត្រាំ ព្រមានអ៊ីរ៉ង់ ក្រោយការបាញ់រ៉ុក្កែតចូលស្ថានទូតអាមេរិកនៅអ៊ីរ៉ាក់
លោកប្រធានាធិបតីអាមេរិក ដូណាល់ ត្រាំ។ រូបភាព៖AFP
×![]()
នៅថ្ងៃទី២៣ ធ្នូ ប្រធានាធិបតីអាមេរិកដូណាល់ ត្រាំ បានផ្ញើសារព្រមានចំៗទៅកាន់អ៊ីរ៉ង់ ក្រោយមានករណីបាញ់រ៉ុក្កែតសំដៅទីតាំងអាមេរិកឈរជើងនៅអាមេរិក។ លោក ត្រាំ ព្រមានថា លោកនឹងឲ្យអ៊ីរ៉ង់ទទួលខុសត្រូវចំពោះការស្លាប់របស់ជនជាតិអាមេរិកណាម្នាក់នៅអ៊ីរ៉ាក់។ ការលើកឡើងរបស់ប្រធានាធិបតីអាមេរិក ធ្វើឡើងមុនខួបមួយឆ្នាំនៃការធ្វើឃាត្តឧត្តមសេនីយ៍អ៊ីរ៉ង់ដោយយន្តហោះដ្រូនអាមេរិកដែរ។
«ជាយោបល់ល្អខ្លះទៅកាន់អ៊ីរ៉ង! បើមានជនជាតិអាមេរិកណាស្លាប់ ខ្ញុំនឹងឲ្យអ៊ីរ៉ង់ទទួលខុសត្រូវ»។ នេះជាការព្រមានរបស់លោក ដូណាល់ ត្រាំ លើបណ្តាញសង្គមTwitter។ ការព្រមាននេះធ្វើ ឡើងក្រោយស្ថានទូតអាមេរិកនៅទីក្រុងបាក់ដាដ រងការវាយប្រហារដោយរ៉ុក្កែតនៅថ្ងៃទី២០ ខែធ្នូ។ សំណេររបស់លោក ត្រាំ ភ្ជាប់មកជាមួយរូបភាពរ៉ុក្កែតចំនួន៣គ្រាប់ ដែលលោកអះអាងថា រ៉ុក្កែតមកពីអ៊ីរ៉ង់។ ការវាយប្រហារនេះ បង្កឲ្យមានការខូចខាតបរិវេណស្ថានទូត តែពុំប៉ះពាល់ដល់ជីវិតមនុស្សឡើយ។
ការបាញ់រ៉ុក្កែតចូលស្ថានទូតអាមេរិកនៅក្រុងបាក់ដាដ ជាលើកទី៣ហើយ ដែលទីតាំងយោធា និងបេសកកទូតអាមេរិករងការវាយប្រហារ។ រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ បានចោទចំៗថា អ៊ីរ៉ង់នៅពីក្រោយការវាយប្រហារស្ថានទូតនេះ។ ដូចគ្នានេះដែរ បញ្ជាការដ្ឋានយោធាអាមេរិកប្រចាំតំបន់មជ្ឈិមបូព៌ា និយាយថា ការវាយប្រហារដោយរ៉ុក្កែតនេះ ធ្វើឡើងដោយក្រុមជីវពលគាំទ្រដោយអ៊ីរ៉ង់។នេះបើតាមទីភ្នាក់ងារព័ត៌មាន AFP ។
ក្នុងសេចក្តីថ្លែការណ៍របស់ខ្លួន យោធាអាមេរិកនឹងឲ្យអ៊ីរ៉ង់ទទួលខុសត្រូវចំពោះការស្លាប់របស់ជនជាតិអាមេរិក ដែលបណ្តាលមកពីសកម្មភាពរបស់ក្រុមជីវពលនៅអ៊ីរ៉ាក់ដែលអ៊ីរ៉ង់គាំទ្រ។ ទាក់ទងរឿងនេះ នៅថ្ងៃទី២១ ខែធ្នូ អ៊ីរ៉ង់ប្រាប់អាមេរិកឲ្យបញ្ឈប់សកម្មភាពរករឿងដែលបង្កភាពតានតឹងក្នុងតំបន់។
ស្ថានការណ៍សន្តិសុខក្នុងតំបន់មជ្ឈឹមបូព៌ាមានសភាពតានតឹងនៅមួយឆ្នាំចុងក្រោយនេះ ក្រោយពេលលោក ត្រាំ បញ្ជាឲ្យសម្លាប់ឧត្តមសេនីយ៍ Qasem Soleimani ប្រមុខកងកម្លាំង Qud នៃកងឆ្មាំបដិវត្តន៍ក្នុងការវាយប្រហារផ្លូវអាកាសរបស់អាមេរិកនៅព្រលានយន្តហោះទីក្រុងបាក់ដាដកាលពីថ្ងៃ៣ខែមករា ឆ្នាំ២០២០។
ក្រោយការសម្លាប់ឧត្តមសេនីយ៍ Soleimani ប្រទេសក្នុងតំបន់ រំពឹងថា នឹងការប្រឈមមុខដាក់គ្នាខ្លាំងក្លារវាងប្រទេសទាំងពីរ។ ខណៈពេលដែលជិតដល់ខួបមួយឆ្នាំនៃការវាយប្រហារនេះ ភាពតានតឹងកើនឡើងជាថ្មី។ ម្យ៉ាងដោយសារអាមេរិកគំរាមមិនឲ្យអ៊ីរ៉ងសងសឹក ហើយម្យ៉ាងដោយសារលោកត្រាំសន្យាថា នឹងដាក់សម្ពាធទៅលើអ៊ីរ៉ង់អោយកាន់តែខ្លាំងមុនពេលលោកចប់អាណត្តិ។ ជាក់ស្តែងនាវាផ្ទុកយន្តហោះអាមេរិក Nimitz ត្រូវបានបញ្ជូនឲ្យទៅល្បាតនៅក្នុងឈូងសមុទ្រពែក្សនៅចុងខែវិច្ឆិកា ចំណែកយន្តហោះទម្លាក់គ្រាប់បែក B-52 ក៏ហោះហើរនៅក្នុងតំបន់ដើម្បីគំរាមអ៊ីរ៉ង់ដែរ។
អ៊ីរ៉ាក់ ជាទីដែលអាមេរិក និងអ៊ីរ៉ង់កំពុងប្រកួតប្រជែងឥទ្ធិពលគ្នា។ ក្រោយការរួមគ្នាសហការកម្ចាត់ក្រុមភេរវកម្មរដ្ឋឥស្លាមពីទឹកដីអ៊ីរ៉ាក់ អ៊ីរ៉ង់បានព្យាយាមបញ្ចូលមនុស្សដែលគាំទ្រខ្លួនចូលទៅក្នុងជួររដ្ឋាភិបាលអ៊ីរ៉ាក់ ស្របពេលដែលអាមេរិកចាប់ផ្តើមដកទ័ពបណ្តើរៗចេញពីប្រទេសនេះ ដោយទុកត្រឹមតែកងទ័ពចំនួន២,៥០០នាក់ប៉ុណ្ណោះ។ អាមេរិកនាពេលថ្មីៗនេះ ក៏បានកាត់អ្នកការទូតរបស់ខ្លួននៅអ៊ីរ៉ាក់ផងដែរ ដែលសកម្មភាពទាំងនេះត្រូវបានសង្ស័យថា អាចនឹងឈានទៅដល់ការបិទស្ថានទូតតែម្តង៕
Tag:
អ៊ីរ៉ង់
អ៊ីរ៉ាក់
អាមេរិក
© រក្សាសិទ្ធិដោយ thmeythmey.com
