នៅថ្ងៃទី២៣ ធ្នូ អាជ្ញាធរពន្ធដារចិនបានផ្អាកការនាំចូលឈើពីរដ្ឋពីររបស់អូស្ត្រាលី ដោយអះអាងថាមានសត្វល្អិត។ បន្ទាប់ពីធ្យូងថ្ម ស្រូវសាឡី និងស្រា ឈើអូស្ត្រាលីបានក្លាយជារឿងទាស់ទែងពាណិជ្ជកម្មមួយទៀតរវាងអូស្ត្រាលី និងចិន ខណៈទំនាក់ទំនងការទូតរវាងប្រទេសទាំងពីរធ្លាក់ចុះក្នុងកម្រិតមួយមិនធ្លាប់មាន។
ចិន និងអូស្ត្រាលីកំពុងប្រឈមមុខគ្នាក្នុងបញ្ហាជំនួញបន្ថែមទៀត ក្រោយអាជ្ញាធរពន្ធគយចិនផ្អាកការនាំចូលឈើពីរដ្ឋ New South Wales និង Western Australia ដោយផ្អែកលើវិធានការសុខភាព និងច្បាប់ស្តីពីចត្តាឡីស័ក។ ការផ្អាកនាំចូលនេះ ធ្វើឡើងក្រោយអាជ្ញាធរចិនផ្អាកការនាំចូលឈើដុំពីរដ្ឋQueensland Victoria South Australia និង Tasmania ក្នុងខែតុលា។ នេះយោងតាមទីភ្នាក់ងារព័ត៌មាន AFP ។
«ដើម្បីបង្ការវត្តមាននៃសរីរាង្គគ្រោះថ្នាក់ និងការពារផលិតកម្មកសិកម្ម ព្រៃឈើ និងសុវត្ថិភាពនៃប្រព័ន្ធអេកូឡូស៊ី យើងប្រកាសផ្អាកការនាំចូលឈើពីអូស្ត្រាលី»។ នេះជាការជូនដំណឹងរបស់អាជ្ញាធរចិនទៅកាន់រដ្ឋាភិបាលអូស្ត្រាលី។
ឈើពីរដ្ឋQueensland ត្រូវបានហាមឃាត់នៅថ្ងៃទី៣១ តុលា នៅពេលដែលអាជ្ញាធរចិនអះអាងថារកឃើញពពួកកញ្ចែនៅក្នុងឈើដុំ។ ក្រោយមកឈើដុំ មកពីរដ្ឋបីផ្សេងទៀតក៏ត្រូវបានហាមឃាត់ការនាំចូលក្រោមហេតុផលដូចគ្នានេះផងដែរ។
ដោយសារតែចិនហាមការនាំឈើចូលពីរដ្ឋចំនួនប្រាំមួយរបស់អូស្ត្រាលី ជំនួញឈើរបស់ប្រទេសទាំងពីរសឹងតែលែងមាន។ អូស្ត្រាលី លក់ឈើទៅចិនក្នុងទំហំទឹកប្រាក់ប្រមាណ១,៦ពាន់លានដុល្លារ ក្នុងឆ្នាំ២០១៩ ដោយក្នុងនោះ៦១៤លានដុល្លារបានមកពីការលក់ឈើដុំ និងបន្ទះ ខណៈ៩៨០លានដុល្លារទៀតជាកម្ទេចឈើតូចៗ។
ក្នុងសេចក្តីថ្លែងការណ៍នៅថ្ងៃទី២៤ ធ្នូ សមាគមផលិតផលឈើអូស្ត្រាលី (AFPA) និយាយថា ខ្លួនបានដឹងពីការហាមនាំចូលឈើពីរដ្ឋ New South Wale និង Western Australia ហើយកំពុងពិភាក្សាជាមួយរដ្ឋាភិបាលអូស្ត្រាលីអំពីផលប៉ះពាល់ទៅលើឧស្សាហកម្មឈើក្នុងរដ្ឋទាំងប្រាំមួយ។ AFPA អះអាងថា ខ្លួនកំពុងធ្វើការជាមួយរោងឧស្សាហកម្ម និងរដ្ឋាភិបាលអូស្ត្រាលីក្នុងការធ្វើកំណែទម្រង់វិធីសាស្ត្រសម្លាប់មេរោគលើឈើ ដើម្បីដោះស្រាយបញ្ហាដែលចិនលើកឡើង ក៏ដូចជាដើម្បីបន្តសកម្មភាពជំនួញជាមួយចិនឡើងវិញ។
បើតាមសេចក្ដីថ្លែងការណ៍ AFPA បើស្ថានការណ៍បន្តរហូតដល់ឆ្នាំ២០២១ នោះរដ្ឋាភិបាលអូស្ត្រាលីចាំបាច់ត្រូវមានជំនួយផ្តល់ទៅកម្មករ និងអាជីវកម្មដែលរងផលប៉ះពាល់ ដើម្បីបង្ការការបាត់បង់ការងារ ក៏ដូចជាការបិទរោងអារឈើបន្ថែមទៀត។ AFPA បន្តថា ពេលនេះខ្លួនកំពុងស្វែងរកទីផ្សារដទៃទៀតក្រៅពីចិន។
ចិន និងអូស្ត្រាលីកំពុងប្រឈមមុខគ្នាលើបញ្ហាជំនួញជាង១០មុខទំនិញ ដោយអូស្ត្រាលីរងការដាក់ពន្ធឬការរំខានក្នុងការនាំទំនិញចូលទៅចិន រួមមានស្រូវសាលីបាឡេ ស្រូវសាលី សាច់គោ ទង់ដែង កប្បាស រោមសត្វ បង្កង ស្ករ វិស័យទេសចរណ៍ និងសាកលវិទ្យាល័យ។ ជារឿយៗ អាជ្ញាធរចិនតែងអះអាងថា ការរំខានទាំងអស់នេះបណ្តាលមកពីបច្ចេកទេស ឬបញ្ហាបរិស្ថានជាដើម។