កាលពីថ្ងៃព្រហស្បតិ៍ របាយការណ៍បានបង្ហាញថា ទ្រព្យសម្បត្តិរបស់លោក Jack Ma បានធ្លាក់ទៅ ៥៧.៣ពាន់លានដុល្លារអាមេរិក ពោលគឺមានការថយចុះ ៣.៦ពាន់លានដុល្លារ ក្នុងនាមជាមហាសេដ្ឋីវាល់លានលំដាប់ទី១៩លើពិភពលោករបស់ទស្សនាវដ្តី Forbes។

 

Alibaba របស់សេដ្ឋី Jack Ma កំពុងស្ថិតក្រោមការស៊ើបអង្កេតពីសំណាក់អាជ្ញាធរចិនពាក់ព័ន្ធការរកស៊ីផ្ដាច់មុខក្នុងជំនួញអនឡាញ។ មុននឹងមានការស៊ើបអង្កេតនេះ ចិនបានព្រមានក្រុមហ៊ុនបច្ចេកវិទ្យានានា ថា ខ្លួននឹងមិនអត់អោនឲ្យការធ្វើជំនួញបែបផ្តាច់មុខឡើយ។ 

 

រដ្ឋាភិបាលចិន ប្រាប់ឲ្យក្រុមហ៊ុនធំៗទាំងអស់ត្រៀមខ្លួនក្នុងការសួរដេញដោលពីនិយ័តករចិនចំពោះរបៀបនៃការធ្វើជំនួញ ក្រោយក្រុមហ៊ុន Alibaba និង Tencent Holding រងពិន័យជាប្រាក់ដោយសារបង្ហាញពីបំណងរួមបញ្ចូលគ្នា។

 

ក្រោយការប្រកាសបែបនេះ ភាគហ៊ុនរបស់ Alibaba បានបន្តធ្លាក់ចុះទាំងនៅហុងកុង និងញូវយ៉ក។ ប៉ុន្តែទោះបីជាយ៉ាងណាក៏ដោយ ថ្នាក់ដឹកនាំក្រុមហ៊ុនក៏បានអះអាងពីការត្រៀមខ្លួនក្នុងកិច្ចសហប្រតិបត្តិការជាមួយអាជ្ញាធរ៕