គិតចាប់ពីដើមខែមករា មកដល់ថ្ងៃទី១៥ ខែធ្នូ ឆ្នាំ២០២០នេះ កម្ពុជា បានចេញស្វាយស្រស់ បានចំនួន ៩៤៥,២៧៤ តោន គិតជាទឹកប្រាក់ប៉ាន់ស្មានសរុបមានប្រមាណជា ៤៧៣,២០៧,៧០០ដុល្លារ។ នេះបើតាមរបាយការណ៍បឋម ស្តីពីវឌ្ឍភាពនៃផលិតកម្មដំណាំកសិ-ឧស្សាហកម្ម សំខាន់ៗ ក្នុងឆ្នាំ២០២០ ដែលផ្សព្វផ្សាយនៅគណនីហ្វេសប៊ុករបស់លោក វេង សាខុន រដ្ឋមន្ត្រីក្រសួងកសិកម្ម។ 

 

របាយការណ៍ដដែល មិនមានបញ្ជាក់ទិសដៅនៃការនាំចេញទៅប្រទេសណាខ្លះនោះទេ ប៉ុន្តែបានបង្ហាញពីចំនួនក្រុមហ៊ុនដែលនាំចេញ ថាមានចំនួន ៤៧ក្រុមហ៊ុន។ ទន្ទឹមនឹងនោះ នៅក្នុងឆ្នាំ២០២០នេះ ក៏មានអ្នកដាក់ពាក្យស្នើសុំចុះបញ្ជីសម្រាប់នាំចេញទៅទីផ្សារអន្តរជាតិ ចំនួន ៤៨ ទៀត ដែលក្នុងនោះមានក្រុមហ៊ុនចំនួន ៣៣ សហគមន៍ចំនួន ៣ និងម្ចាស់ចម្ការចំនួន១២។ នេះបើតាមរបាយការណ៍ដដែល។

 

គួរកត់សម្គាល់ថា ឥឡូវនេះកម្ពុជា អាចនាំចេញស្វាយជាផ្លូវការទៅកាន់ប្រទេសចិនដោយនៅក្នុបរិមាណ ៥០ម៉ឺនតោនក្នុងមួយឆ្នាំៗ ក្រោយភាគីទាំង២បានផ្លាស់ប្តូរពិធីសារនាំផ្លែស្វាយជាផ្លូវការ កាលពីថ្ងៃទី៩មិថុនា ឆ្នាំ២០២០មក។ ប៉ុន្តែបើផ្អែកតាមតួលេខនាំចេញដែលបញ្ចេញដោយរដ្ឋមន្ត្រីក្រសួងកសិកម្មកន្លងមក កម្ពុជាទើបបាននាំចេញស្វាយដោយផ្ទាល់ និងជាលើកដំបូងទៅកាន់ប្រទេសចិន ក្នុងចំនួនជិត៦០តោនប៉ុណ្ណោះ កាលពីដើមខែធ្នូនេះ។ 

 

  

 

សូមជម្រាបថា បច្ចុប្បន្នកម្ពុជាមានផ្ទៃដីដាំដុះស្វាយ ចំនួន ១២៦ ៦៦៨ហិកតា ហើយផ្ទៃដីដែលអាចប្រមូលបាន ទើបមានត្រឹម ៩១ ១០៤ហិកតា ប៉ុណ្ណោះ។ ក្រសួងកសិកម្ម ប៉ាន់ស្មានថា ផ្ទៃដីផលិតកម្មស្វាយឆ្នាំ២០២១ អាចមានចំនួនប្រមាណជា ១៣៥ ៥០០ហិកតា ពោលគឺកើនប្រមាណ ៧ភាគរយបន្ថែមទៀត៕