កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
ក្រុមម្ចាស់ការពារជើងឯក Liverpool ទទួលបានលទ្ធផលត្រឹមស្មើជាមួយ West Bromwich Albion ១-១ ប៉ុណ្ណោះក្នុងការប្រកួត Boxing Day ដែលធ្វើឲ្យពួកគេខកខាននាំមុខដាច់៥ពិន្ទុក្នុងតារាង Premier League ។ Tottenham Hotspur បន្តស្មើក្រោយចាញ់ពីរប្រកួតជាប់គ្នា ហើយធ្លាក់ទៅលេខ៥ ខណៈ Manchester United ដែលស្មើ Leicester City ២-២ ឡើងទៅលេខរៀងទី៤ ។
នាជំនួបក្របខណ្ឌលីគកំពូលអង់គ្លេសសប្តាហ៍ទី១៥ នៅ Anfield យប់ថ្ងៃទី២៧ ខែធ្នូ Sadio Mane បានជួយក្រុមលោក Juergen Klopp នាំមុខមុនទៅហើយនៅនាទី១២ ប៉ុន្តែនៅនាទី៨២ Semi Ajayi បានតាមស្មើឲ្យក្រុមដែលមានអ្នកចាត់ការទូទៅថ្មីលោក Sam Allardyce វិញ។ ចប់ការប្រកួត Liverpool ១-១ West Bromwich។
ទោះលទ្ធផលស្មើ តែហង្សក្រហមនៅតែឈរកំពូលតារាងលីគកំពូលអង់គ្លេសដដែល តែខកខាននាំមុខ៥ពិន្ទុពេញពីក្រុមគូប្រជែងក្តី។ Liverpool រកបាន៣២ពិន្ទុ ពីការប្រកួត១៥លើកនាំមុខក្រុមលេខពីរ Everton ៣ពិន្ទុ។ Everton បានយកឈ្នះ Sheffield United ១-០ ក្នុងជំនួប Boxing Day។
Man Utd ឡើងទៅឈរលេខរៀងទី៤ក្នុងតារាង ក្រោយស្មើ Leicester ២-២។ ក្រុមបិសាចក្រហមមាន២៧ពិន្ទុដោយឆ្លងកាត់ការប្រកួត១៤លើក ឯកញ្ជ្រោងនៅចំណាត់ថ្នាក់ទី៣រកបាន២៨ពិន្ទុពីការប្រកួត១៥លើក។
Spurs ខកខានចូលក្នុងតំបន់ Top 4 ក្រោយ Wolverhampton Wanderers វាយបកយកស្មើ ១-១ វិញ។ ក្រុមលោក Jose Mourinho រកគ្រាប់នាំមុខមុនតាំងពីនាទីទី១ ដោយ Tanguy Ndombele មុនពេល Romain Saiss តាមស្មើវិញនៅនាទី៨៦។ ក្រុមមាន់ខ្នាយមាសស្ថិតនៅលេខ៥ មាន២៦ពិន្ទុ។
Chelsea ដែលចាញ់ Arsenal ៣-១ ធ្លាក់ទៅលេខ៨ មាន២៥ពិន្ទុ ឯកាំភ្លើងធំអាចបង្កើតគម្លាតពីតំបន់គ្រោះថ្នាក់ក្រោយជ័យជម្នះនេះ ដោយរកបាន១៧ពិន្ទុ នៅលេខរៀងទី១៥។ Fulham, West Bromwich និង Sheffield United ស្ថិតនៅតំបន់ត្រូវកាត់ចោល៕
Tag:
Premier League
Boxing Day
© រក្សាសិទ្ធិដោយ thmeythmey.com
