ភ្នំពេញ៖ រដ្ឋមន្រី្តក្រសួងមហាផ្ទៃសម្ដេច ស ខេង ហាមមន្រី្តមូលដ្ឋានយោគយល់និងឃុបឃិតគ្នា ដាក់បញ្ចូលសាច់ញាតិឬអ្នកស្គាល់គ្នា ជាជនក្រីក្រ ដើម្បីទទួលបានប្រាក់ឧបត្ថម្ភពីរដ្ឋាភិបាលឡើយ។ ការណែនាំរបស់សម្ដេច ស ខេង នេះ ធ្វើឡើងក្រោយពីក្រសួងផែនការរកឃើញភាពមិនប្រក្រតីជាង១.៤ម៉ឺនករណី ដោយក្នុងនោះបានរកឃើញថា មានករណីយោគយល់ ឃុបឃិតគ្នា និងគ្រួសារក្រីក្រខ្លះមានជីវភាពប្រសើឡើងវិញ។
ដើម្បីឲ្យដំណើរការអនុវត្តកម្មវិធីឧបត្តម្ភសាច់ប្រាក់ជុំទី៤ ប្រព្រឹត្តទៅដោយប្រសិទ្ធភាព តម្លាភាព និងសមធម៌ សម្ដេច ស ខេង ស្នើឲ្យអភិបាលរាជធានី-ខេត្តទាំងអស់ត្រូវណែនាំដល់អាជ្ញាធរមូលដ្ឋាន ឲ្យអនុវត្តការារឲ្យបានម៉ឺងម៉ាត់ ចំពោះការកំណត់អត្តសញ្ញាណគ្រួសារក្រីក្រ នៅអំឡុងពេលកូវីដ-១៩នេះ។
លិខិតរបស់ក្រសួងមហាផ្ទៃ ដែលចុះហត្ថលេខាដោយសម្ដេច ស ខេង នៅថ្ងៃទី២៨ ធ្នូ យ៉ាងដូច្នេះថា៖«ត្រូវធ្វើការណែនាំឲ្យបានម៉ឺងម៉ាត់ដល់អាជ្ញាធរមូលដ្ឋាន ជាពិសេស មេភូមិ និងក្រុមប្រឹក្សាឃុំសង្កាត់ ត្រូវពង្រឹងការបំពេញការងារកំណត់អត្តសញ្ញាណកម្មគ្រួសារក្រីក្រតាមការស្នើសុំក្នុងអំឡុងពេលនៃការីករាលដាលនៃជំងឺកូវីដ-១៩នេះ ឲ្យបានត្រឹមត្រូវ ច្បាស់លាស់ និងខ្ជាប់ខ្ជួនបំផុត។ ហើយត្រូវចៀសវាងឲ្យខាងតែបាននូវការយោគយល់ និងឃុបឃិតគ្នាដើម្បីដាក់បញ្ចូលក្រុមគ្រួសារ សាច់ញាតិ មិត្តភ័ក្តិ ឬអ្នកស្គាល់គ្នា ដែលមិនមែនជាគ្រួសារក្រីក្រ និងងាយរងគ្រោះពិតប្រាកដ ដើម្បីទទួលប្រាក់ឧបត្ថម្ភ...»។
សម្ដេច ស ខេង ក៏បានបញ្ជាឲ្យចាត់វិធានការចំពោះអាជ្ញាធរណា ដែលអនុវត្តមិនប្រក្រតីលើការបើកប្រាក់ឧបត្ថម្ភឲ្យម៉ឺតម៉ាត់ផងដែរ។ កន្លងមកសម្ដេចនាយករដ្ឋមន្រី្ត ហ៊ុន សែន ក៏បានបញ្ជាឲ្យពិនិត្យលើករណីធ្វើបណ្ណសមធម៌ឲ្យបានហ្មត់ចត់ដែរ ពិសេសករណីមន្រី្តឃុបឃិតគ្នាចេញបណ្ណសមធម៌ឲ្យសាច់ញាតិ ដែលមិនមែនជាគ្រួសារក្រីក្រ។
ក្រុមការងារក្រសួងផែនការងារ បានដកបណ្ណសមធម៌ពីពលរដ្ឋក្រីក្រជាង១.៤ម៉ឺនគ្រួសារ ដោយសាររកឃើញ ភាពមិនប្រក្រតីមួយចំនួន និងជីវភាពប្រសើរឡើងវិញ។ លោក ស្រី ដា អ្នកនាំពាក្យក្រសួងផែនការងារអះអាងកាលពីថ្ងៃទី២៤ធ្នូនេះថា ភាពមិនប្រក្រតីខ្លះដែលកើតមាន គឺជាយោគយល់និងការឃុបឃិតគ្នា។ លោកអះអាងថា ក្រុមការងារតែងតែចុះពិនិត្យភាពមិនប្រក្រតី និងធ្វើបណ្ណសមធម៌បន្ថែមដល់ពលរដ្ឋ។
កន្លងមកលោក តូច ចាន់នី អ្នកនាំពាក្យក្រសួងសង្គមកិច្ច ក៏ធ្លាប់បញ្ជាក់ដែរថា គ្រួសារដែលកាន់បណ្ណសមធម៌រកឃើញភាពមិនប្រក្រតីទាំងអស់ គឺត្រូវបានហូតបណ្ណវិញ ហើយបញ្ឈប់ការឧបត្តម្ភប្រចាំខែ។ ដោយឡែកប្រាក់ដែលគ្រួសារទាំងនោះបានបើកយកកន្លងមក គឺក្រុមការងារមិនប្រមូលត្រឡប់យកវិញឡើយ ដើម្បីកុំឲ្យមានបញ្ហាតវ៉ាណាមួយកើតឡើង។
បើតាមលោក តូច ចាន់នី បញ្ហាប្រឈមពាក់ព័ន្ធនឹងការបើកប្រាក់ឧបត្ថម្ភនេះ ភាគច្រើនមកពីពលរដ្ឋបន្លំជាជនក្រីក្រ, កន្លែងដកប្រាក់បន្លំដកសេវាកម្ម ,បាត់បណ្ណសមធម៌ និងពលរដ្ឋខ្លះផ្លាស់ប្តូរជីវភាពប្រសើរឡើងជាដើម។
សូមជម្រាបថា រដ្ឋាភិបាលបានសម្រេចបន្តអនុវត្តកម្មវិធីឧបត្ថម្ភសាច់ប្រាក់ជុំទី៤ ដល់គ្រួសារក្រីក្រនិងជនងាយរងគ្រោះ មានរយៈពេល៤ខែបន្ថែមទៀត ចាប់ពីខែមករាដល់ខែមីនា ឆ្នាំ២០២១។ ការសម្រេចបន្តកម្មវិធីនេះ គឺដើម្បីជួយលើកស្ទួយនិងរក្សាលំនឹងជីវភាពពលរដ្ឋនៅអំឡុងពេលវិបត្តិកូវីដ-១៩៕