ភ្នំពេញ៖ ត្រីពោរបស់វារីវប្បករ បានឡើងថ្លៃបន្តិចបន្តួចវិញ ខណៈប្រភេទត្រីផ្សេងៗបន្តចុះថោកដដែល ព្រោះតែឈ្មួញឱ្យថ្លៃបោះដុំស្មើនឹងត្រីរបស់វៀតណាម។ បើតាមលោក ឡែមផូរ សុថាវរិទ្ធិ អ្នកទទួលបន្ទុកអភិវឌ្ឍវារីវប្បកម្មនៃសហគមវារីវប្បករកម្ពុជា ត្រីពោចិញ្ចឹមក្នុងស្រុកបានឡើងថ្លៃពី៥០០០ដល់ត្រឹមរង្វង់៦០០០រៀលប៉ុណ្ណោះ ក្នុងមួយគីឡូក្រាម នារយៈពេល៤-៥ថ្ងៃចុងក្រោយនេះ។ ប៉ុន្តែ ការឡើងថ្លៃនៃប្រភេទត្រីពោនេះ គឺនៅតែថោកដដែល បើធៀបនឹងឆ្នាំមុនៗ។
ឆ្នាំ២០១៩កន្លងមក ត្រីពោដែលកសិករចិញ្ចឹមក្នុងស្រុក មានតម្លៃមិនក្រោមពី៧,០០០ទៅ៨,០០០រៀលក្នុងមួយគីឡូក្រាម។ នេះជាការអះអាងរបស់លោកសុថាវរិទ្ធិ និងលោក ទូច បូណា អ្នកចិញ្ចឹមត្រីពោ នៅស្រុកមុខកំពូល ខេត្តកណ្តាល ប្រាប់សារព័ត៌មានថ្មីៗ ដែលពាក់ព័ន្ធនឹងតម្លៃត្រីចិញ្ចឹមគ្រប់ប្រភេទកំពុងចុះថោកខ្លាំង មិនដែលធ្លាប់មានពីមុនមកឡើយ។ លោកសុថាវរិទ្ធិ បានពន្យល់មូលហេតុដែលត្រីពោ បានឡើងថ្លៃបន្តិចវិញដូច្នេះ៖« ការនាំចូលត្រីពោពីវៀតណាម មានចំនួនតិចជាងមុន ព្រោះដល់រដូវមិនសូវសម្បូរត្រីប្រភេទនេះ»។
លោក សុថាវរិទ្ធិ បានបញ្ជាក់ថា ក្រៅពីត្រីពោ ដែលបានឡើងវិញបន្តិចវិញនេះ ប្រភេទត្រីផ្សេងៗនៅតែមានតម្លៃថោកដដែល ដូចជាត្រីប្រា, ត្រីឆ្តោ និងត្រីឆ្ពិន, ត្រីក្រាញ់។ ជាពិសេសគឺ ត្រីអណ្តែង ព្រោះឈ្មួញដែលបានសន្យាជាមួយនឹងគណៈកម្មការជំរុញវារីវប្បកម្មកម្ពុជា កាលពីថ្ងៃទី២៥ធ្នូ ឆ្នាំ២០២០ ថា នឹងជួយប្រមូលទិញរបស់វារីវប្បករក្នុងស្រុកនោះ គឺបានឱ្យតម្លៃត្រីរបស់កសិករ ថោកស្មើនឹងត្រីនាំចូលពីរៀតណាម ទៅតាមប្រភេទត្រីនីមួយៗ។
បើតាម លោក សុថាវរិទ្ធិ ក្នុងចំណោមឈ្មួញត្រីប្រមាណ១០នាក់ ដែលគណៈកម្មការជំរុញវារីវប្បកម្មកម្ពុជា នៃក្រសួងកសិកម្ម បានស្នើឱ្យផ្អាកយកត្រីវៀតណាមបណ្តោះអាសន្នសិននោះ គឺមានតែ២នាក់ប៉ុណ្ណោះ ដែលព្រមប្រមូលទិញត្រីអណ្តែង ត្រីប្រា និងត្រីឆ្តោ ពីវារីវប្បករ។ ប៉ុន្តែត្រីឈ្មួញទាំងពីរនេះ ព្រមទទួលទិញពីកសិករ គឺឱ្យតម្លៃថោក ស្មើនឹងត្រីរបស់វៀតណាម។
លោក ឡែមផូរ សុថាវរិទ្ធិ អ្នកទទួលបន្ទុកអភិវឌ្ឍវារីវប្បកម្មនៃសហគមវារីវប្បករកម្ពុជា
ឈ្មួញប្រមូលទិញត្រីអណ្តែងពីវារីវប្បករក្នុងស្រុក បានឱ្យតម្លៃត្រឹម៤០០០ទៅ៤,១០០គីឡូក្រាមប៉ុណ្ណោះ។ នេះជាការឡើងរបស់លោក សុថាវរិទ្ធិ ដោយបន្តដូច្នេះ៖«តម្លៃនេះ ឈ្មួញបានយកតម្លៃត្រីនាំចូលពីវៀតណាមដែលថោកជាងយើង ធ្វើជាគោលនោះ គឺកសិករមិនព្រមលក់ឡើយ ព្រោះវាខាត»។ លោក បានអះអាងថា ត្រីអណ្តែងរបស់កសិករខ្មែរ លក់បោះដុំបានមួយគីឡូបានតម្លៃ៤,៥០០រៀលឡើង ទើបអាចរួចខ្លួន ឬ រួចថ្លៃដើម។
ការចិញ្ចឹមត្រីរបស់កសិករនីមួយៗ គឺបានចំណាយថ្លៃដើមខ្ពស់ជាងត្រីរបស់វៀតណាម ទាំងថ្លៃពូជត្រី, ទាំងថ្លៃចំណីត្រី និងទាំងថ្លៃថ្នាំព្យាបាលជំងឺនិងមេរោគផ្សេងៗរបស់ត្រីជាដើម...។ នេះជាការបញ្ជាក់របស់លោក ឡែមផូរ សុថាវរិទ្ធិ ដែលបានអំពាវដល់ឈ្មួញត្រីគ្រប់រូប គួរតែយកថ្លៃដើមចិញ្ចឹមត្រីរបស់កសិករ ជាមូលដ្ឋាននិងជាគោល ក្នុងការកំណត់ថ្លៃលើប្រភេទត្រីនីមួយៗនៅលើទីផ្សារ។
ឆ្លើយតបនឹងបញ្ហានេះ លោក តាន់ វណ្ណា ដែលជាឈ្មួញសន្យាប្រមូលទិញប្រភេទត្រីអណ្តែងពីវារីវប្បករខ្មែរនានា បានលើកឡើងថា លោកទិញត្រីពីវារីវប្បករនានាក្នុងតម្លៃ៤០០០រៀលក្នុងមួយគីឡូក្រាម គឺដើម្បីឱ្យតម្លៃលក់ចុងក្រោយនៅទីផ្សារនានា មានតម្លៃសមរម្យសម្រាប់ពលរដ្ឋទិញទទួលទានប្រចាំថ្ងៃ។
«ត្រីអណ្តែងវៀតណាម យើងទិញមានតម្លៃតែត្រឹម៣២០០រៀលទេក្នុងមួយគីឡូក្រាម, ប៉ុន្តែយើងបង់ពន្ធចូលខ្មែរ និងចំណាយផ្សេងៗ មានតម្លៃ៣៨០០រៀលក្នុងមួយគីឡូក្រាម ហើយបោះលក់បន្តក្នុងតម្លៃ៤,០០០រៀល»។ នេះជាការរៀបរាប់របស់ លោក វណ្ណា អ្នកប្រមូលទិញត្រីអណ្តែងរបស់វារីវប្បករក្នុងស្រុក ស្របតាមសំណើររបស់ក្រសួងកសិកម្មក្នុងការផ្អាកយកត្រីវៀតណាមលក់បណ្តោះអាសន្នសិន។
ថ្លែងប្រាប់សារព័ត៌មានថ្មីៗតាមទូរសព្ទ លោក វណ្ណា បានពន្យល់ដូច្នេះថា៖«ខ្ញុំទិញត្រីពីបងប្អូនវារីវប្បករក្នុងមួយគីឡូតម្លៃ៤០០០រៀល គឺមិនចំណេញទេ បើធៀបនឹងត្រីការនាំចូលត្រីវៀតណាម ព្រោះតម្លៃមួយគីឡូក្រាម៤០០០រៀលហ្នឹង យើងចាប់ពីស្រះ ហើយបោះដុំលក់បន្តឈ្មួញនានានៅផ្សារព្រែកព្នៅ បានតម្លៃត្រឹម៤១០០រៀល ហើយឈ្មួញដែលទិញត្រីបន្តពីខ្ញុំ យកទៅបោះលក់ឱ្យគេទៀត បានតម្លៃ៤៣០០ទៅ៤៥០០រៀលក្នុងមួយគីឡូ ហើយនៅបោះដុំ២ទៅ៣តង បានដល់ដៃរបស់អ្នកទិញហូប»។
បើតាមលោក វណ្ណា ត្រីដែលចាប់ពីស្រះ គឺត្រូវបោះដុំ៣ទៅ៤តង់ពីឈ្មួញមួយទៅឈ្មួញមួយទៀត ដោយទទួលបានប្រាក់ចំណេញ៣០០ទៅ៤០០រៀលក្នុងមួយគីឡូក្រាម ទើបដល់អ្នកតម្លៃទីផ្សារចុងក្រោយ ដែលពលរដ្ឋទិញក្នុង មួយគីឡូក្រាម តម្លៃ៥៥០០រៀល។ លោកបានបន្តនិយាយបែបនេះថា៖«ខាងខ្ញុំអ្នកបោះដុំធំ ខ្ញុំត្រូវត្រីពីអត់បានថ្លៃទេ តែបើបងប្អូនលក់ត្រីផ្ទាល់ជាមួយពលរដ្ឋនៅតាមភូមិអាចលក់បានថ្លៃជាងខ្ញុំបន្តិចហើយ។ ខ្ញុំទិញថោក ក៏លក់ថោក ដើម្បីតម្រូវដល់ពលរដ្ឋអ្នកហូបប្រចាំថ្ងៃ»។
ត្រីពោ របស់វារីវប្បករនានា ផ្តើមឡើងថ្លៃបន្តិចវិញ បន្ទាប់គណៈកម្មការជំរុញវារីវប្បកម្មកម្ពុជានៃក្រសួងកសិកម្ម រុក្ខាប្រមាញ់ និងនេសាទ បានស្នើឱ្យឈ្មួញផ្អាកយកចកាលពីថ្ងៃទី២៥ធ្នូ ឆ្នាំ២០២០ ក្នុងកិច្ចប្រជុំរវាងឈ្មួញត្រូប្រមាណ១០នាក់ និងសមាគមវារីប្បករនៅកម្ពុជា លោក ហាស់ សារ៉េត ប្រធានគណៈកម្មការជំរុញវារីវប្បកម្មកម្ពុជា បានស្នើឱ្យឈ្មួញគ្រប់រូបផ្អាកយកត្រីរបស់វៀតណាមចំពោះប្រភេទត្រីណាដែលវារីវប្បករខ្មែរចិញ្ចឹមបាន៊។ ដូចជាត្រីប្រា ត្រីពោ ត្រីឆ្តោ និងត្រីអណ្តែងជាដើម៕