COVID-19
អន្តរជាតិ
តុលាការចិន កាត់ទោសអ្នកកាសែតដែលរាយការណ៍ពីករណីផ្ទុះកូវីដ-១៩ នៅវូហាន ឲ្យជាប់គុក៤ឆ្នាំ
លោកស្រីZhang Zhan អ្នកកាសែតពលរដ្ឋ។រូបភាព៖Twitter
×![]()
នៅថ្ងៃទី២៨ ខែធ្នូ តុលាការក្រុងសៀងហៃ បានកាត់ទោសដាក់គុនបួន៤ឆ្នាំលើអ្នកកាសែតពលរដ្ឋចិនម្នាក់ ចំពោះការផ្សព្វផ្សាយយ៉ាងលម្អិតពីការផ្ទុះជំងឺកូវីដ-១៩ នៅក្រុងវូហាន និងការរិះគន់ក្នុងបណ្តាញសង្គមចំពោះវិធានការរបស់អាជ្ញាធរចិនក្នុងការទប់ស្កាត់ការឆ្លងជំងឺនេះ។ 
លោកស្រី Zhang Zhan ជាមេធាវីប្រែខ្លួនទៅជាអ្នកសារព័ត៌មាន បានរាយការណ៍យ៉ាងលម្អិតពីស្ថានភាពដំណាក់កាលដំបូងនៃការឆ្លងជំងឺកូវីដ-19 នៅវូហាន។ លោកស្រី ត្រូវបានឃាត់ខ្លួនខែឧសភា។
ក្នុងសវនាការថ្ងៃទី២៨ ខែធ្នូ តុលាការមួយនៅក្រុងសៀងហៃ បានផ្តន្ទាទោសលោកស្រី Zhang ឲ្យជាប់គុក៤ឆ្នាំ ក្រោយរកឃើញថាលោកស្រីមានទោសក្នុងការបង្កឲ្យមានការឈ្លោះប្រកែក និងបង្កបញ្ហា។ លោក Zhang Keke មេធាវីលោកស្រី Zhang និយាយបែបនេះនៅក្រៅតុលាការ។ បើតាមទីភ្នាក់ងារព័ត៌មាន AFP លោកបន្តថា តុលាការចាត់ទុកការចុះផ្សាយរបស់លោកស្រី ជារឿងក្លែងក្លាយ។
ក្នុងសេចក្ដីរាយការណ៍របស់ខ្លួន លោកស្រីបានផ្សព្វផ្សាយបទយកការណ៍ទាក់ទងស្ថានភាពនៅវូហាន និងមានសំណេររិះគន់អាជ្ញាធរចិន។ ការផ្សព្វផ្សាយរបស់លោកស្រីត្រូវបានចែករំលែកយ៉ាងសុះសាយក្នុងបណ្តាញសង្គមចិន ដែលឈានទៅដល់ការចាប់ខ្លួនលោកស្រី។ ក្នុងសំណេររបស់ខ្លួន លោកស្រី Zhang រិះគន់អាជ្ញាធរចិនយ៉ាងចាស់ដៃក្នុងខែកុម្ភៈ និងចោទថា រដ្ឋាភិបាលពុំបានផ្តល់ព័ត៌មានគ្រប់គ្រាន់ដល់ពលរដ្ឋ ហើយសម្រេចបិទទីក្រុងទាំងមូលតែម្តង ដែលជាការរំលោភសិទ្ធិមនុស្សធ្ងន់ធ្ងរ។
អ្នកកាសែតពលរដ្ឋ វ័យ៣៧ឆ្នាំរូបនេះ ចាប់ផ្តើមបង្អត់អាហារនៅខែមិថុនា។ យោងតាមមេធាវី លោកស្រីត្រូវបានបង្ខំឲ្យទទួលយកអាហារដោយបញ្ចូលតាមច្រមុះ។ បន្ថែមពីនេះ មុនពេលកាត់ក្តី លោកស្រីលើកឡើងថា បើសិនជាតុលាការកាត់ក្តីឲ្យជាប់ទោសធ្ងន់ធ្ងរ នោះលោកស្រីនឹងអត់អាហារដល់ទីបញ្ចប់។ ការបង្អត់អាហារនៅពេលជាប់ឃុំ ជាវិធីសាស្ត្រចុងក្រោយបង្អស់របស់អ្នកទោស ដើម្បីប្រឆាំងរដ្ឋាភិបាលចិន។
អំឡុងពេលសវនាការ រដ្ឋអាជ្ញា បានសុំឲ្យចៅក្រមដាក់ពន្ធនាគារអ្នកកាសែតរូបនេះពីបួនទៅប្រាំឆ្នាំ។ ប៉ុន្តែ លោកស្រីនៅតែអះអាងថា លោកស្រីពុំបានធ្វើខុសអ្វីឡើយ។ លោកស្រី Zhang មិនមែនជាមនុស្សដំបូងដែលអាជ្ញធរចិនខ្ទប់មាត់ឡើយ។ អាជ្ញាធចិន ធ្លាប់បានដាក់ទណ្ឌកម្មដល់មនុស្សប្រាំបីរូបរួចមកហើយ ដែលទម្លាយព័ត៌មានស្តីពីការផ្ទុះជំងឺឆ្លង និងរិះគន់វិធានការទប់ស្កាត់របស់រដ្ឋាភិបាលចិន។
«អាជ្ញាធរចង់យកករណីរបស់លោកស្រី Zhang ធ្វើជាឧទាហរណ៍ដើម្បីគំរាមអ្នកប្រឆាំងដទៃដែលហ៊ានចោទសួររដ្ឋាភិបាលពីស្ថានការណ៍នៃជំងឺឆ្លងនៅក្រុងវូហាន»។ នេះជាការលើកឡើងរបស់លោកLeo Lan អ្នកស្រាវជ្រាវនៅអង្គការការពារសិទ្ធិមនុស្សចិន។
ការកាត់ក្តីអ្នកកាសែតនេះ ធ្វើឡើងប៉ុន្មានសប្តាហ៍មុនក្រុមបេសកកម្មអន្តរជាតិរបស់អង្គការសុខភាពពិភពលោក (WHO) ធ្វើដំណើរទៅចិនដើម្បីស្វែងរកពីប្រភពកូវីដ-១៩ ។ តុលាការចិន ត្រូវបានសង្កេតឃើញថា កាត់ទោសអ្នកប្រឆាំងអំឡុងពេលបុណ្យគ្រីស្ទម៉ាស់ និងចូលឆ្នាំថ្មី ដើម្បីចៀសវាងការរិះគន់ពីបស្ចិមប្រទេសដែលកំពុងសម្រាកចុងឆ្នាំ។ ការកាត់ទោសលោកស្រី Zhang ជាករណីដំបូងក្នុងចំណោមការកាត់ទោសអ្នកកាសែតពលរដ្ឋ៣អ្នកផ្សេងទៀត ដែលត្រូវបានអាជ្ញាធរចិនឃុំខ្លួនកាលពីដើមឆ្នាំ។
នៅក្រៅបរិវេណតុលាការសៀងហៃ អ្នកគាំទ្រ ក៏ដូចជាអ្នកការទូត បានមកជួបជុំបង្ហាញសណ្តានចិត្ត ប៉ុន្តែក្រោយពេលជនជាប់ចោទ និងមេធាវីមកដល់ ប៉ូលិសបានបំបែកការជួបជុំ ដោយថែមទាំងហាមអ្នកកាសែត និងអ្នកសង្កេតការមិនឲ្យចូលទៅជិតផងដែរ៕
Tag:
ចិន
កូវីដ-១៩
© រក្សាសិទ្ធិដោយ thmeythmey.com
