អន្តរជាតិ
អាជ្ញាធររុស្ស៊ី ប្រាប់អ្នកនយោបាយប្រឆាំង Navalny ឲ្យចូលស្រុកវិញ បើមិនចង់ជាប់គុក
អ្នកប្រឆាំងរដ្ឋាភិបាលរុស្ស៊ី Alexei Navalny។ រូបភាព៖AP
×![]()
នៅថ្ងៃទី២៨ ខែធ្នូ អាជ្ញាធរពន្ធនាគាររុស្ស៊ី បានប្រាប់មេដឹកនាំប្រឆាំងលោក Alexei Navalny ឲ្យត្រឡប់មករុស្ស៊ីវិញ ដើម្បីបង្ហាញខ្លួន បើមិនចង់ឲ្យលក្ខខណ្ឌការព្យួរទោសរបស់លោកត្រូវបានលុបចោលទេនោះ ។ លោក Navalny ដែលត្រូវគេបំពុលក្នុងខែសីហា និងបញ្ជូនមកព្យាបាលនៅអាល្លឺម៉ង់ ហើយបន្តស្នាក់នៅទីនោះដល់សព្វថ្ងៃ។
លោក Alexei Navalny កំពុងស្នាក់នៅអាល្លឺម៉ង់ ក្រោយទទួលការព្យាបាលក្នុងមន្ទីរពេទ្យក្រុងប៊ែរឡាំង។ អ្នកប្រឆាំងរដ្ឋាភិបាលរុស្ស៊ីរូបនេះ ត្រូវបានបញ្ជូនតាមយន្តហោះទៅអាល្លឺម៉ង់ក្រោយធ្លាក់ខ្លួនឈឺនិងបាត់បង់ស្មារតី ដោយការបំពុលដោយសារធាតុគីមី Novichok ។ នេះបើយោងតាមទូរទស្សន៍ CNN ។
នៅក្នុងសេចក្តីថ្លែងការណ៍ចុះថ្ងៃទី២៨ ធ្នូ អាជ្ញាធរពន្ធនាគររុស្ស៊ី និយាយថា ការណ៍ដែលលោក Navalny បន្តនៅអាល្លឺម៉ង់ក្រោយជាជំងឺ ជាការបំពានទៅនឹងបញ្ញត្តិស្តីពីការព្យួរទោស។ លោក Navalny ត្រូវបានតុលាការកាត់ទោសនៅឆ្នាំ២០១៤ ឲ្យជាប់ពន្ធនាគារ៣ឆ្នាំ ពីបទលួចបន្លំទឹកប្រាក់៥សែនដុល្លារ។ ក្រោយពេលធ្លាក់ខ្លួនឈឺ អគ្គរដ្ឋអាជ្ញាររុស្ស៊ីអនុញ្ញាតឲ្យលោក Navalny ចាកចេញទៅអាល្លឺម៉ង់ ដើម្បីព្យាបាលខ្លួនដែលត្រូវបំពុល។
«ផ្អែកលើការផ្សាយរបស់ទស្សនវត្តីវិទ្យាសាស្ត្រ (Lancet) លោក Navalny ត្រូវបានអនុញ្ញាតឲ្យចេញពីមន្ទីរពេទ្យនៅថ្ងៃទី២០ ខែកញ្ញា ហើយនៅថ្ងៃទី១២ ខែតុលា រោគសញ្ញានៃជំងឺរបស់លោកលែងមានទៀតហើយ»។ នេះជាការលើកឡើងក្នុងសេចក្តីថ្លែងការណ៍របស់អាជ្ញាធរពន្ធនាគាររុស្ស៊ី ដោយបន្តថាលោក Navalny មិនបានបំពេញកាតព្វកិច្ចចែងឡើងដោយតុលាការ និងគេចខ្លួនមិនឲ្យមានការត្រួតពិនិត្យពីអាជ្ញាធរ ដោយបន្តស្នាក់នៅអាល្លឺម៉ង់ក្រោយសះស្បើយ។
អាជ្ញាធរបន្ថែមថា លោក Navalany ត្រូវមកបង្ហាញខ្លួននៅចំពោះមុខអាជ្ញាធររុស្ស៊ី បើពុំដូច្នេះទេ ការព្យួរទោសរបស់លោកនឹងត្រូវលុបចោល ដោយត្រូវអនុវត្តទោសជាក់ស្តែងតែម្តង។ មេធាវីរបស់មេដឹកនាំប្រឆាំងរូបនេះ បង្ហោះសំណេរតាមបណ្តាញសង្គម Twitter ថា លោកបានទទួលបញ្ជាពីអាជ្ញាធររុស្ស៊ី ដែលតម្រូវឲ្យអ្នកប្រឆាំងរដ្ឋាភិបាលរូបនេះបង្ហាញខ្លួននៅម៉ោង៩ យប់ ថ្ងៃទី២៩ ធ្នូ។
លោក Navalny ក៏ប្រតិកម្មវិញដែរ។ លោក Navalny សរសេរឌឺដងតាមបណ្តាញសង្គម Instagram បាននិយាយថា៖«ពេលនេះលោកពូទីនកំពុងតែស្រែកច្រឡោត និងសួរថាហេតុអ្វី Navalny មិនស្លាប់? ហើយបើ Navalny មិនស្លាប់ យើងត្រូវតែចាប់ដាក់គុក»។
ដូចគ្នានេះដែរលោកស្រី Kira Yarmysh អ្នកនាំពាក្យលោកNavalny និយាយថា វាជារឿងអស្ចារ្យណាស់ដែលអាជ្ញាធរពន្ធនាគាររុស្ស៊ីដឹងថា លោកកំពុងនៅអាល្លឺម៉ង់ និងចេញបញ្ជានៅថ្ងៃទី២៨ ធ្នូឲ្យរូបលោកទៅបង្ហាញខ្លួននៅថ្ងៃទី២៩ ខែធ្នូ។
ចំពោះការបំពុលអ្នកប្រឆាំងរដ្ឋាភិបាលនេះ សហភាពអឺរ៉ុប កាលពីថ្ងៃទី១៣ ខែតុលា សហភាពអឺរ៉ុប បានអនុម័តទណ្ឌកម្មលើមនុស្ស៦នាក់ និងស្ថាប័នដែលពាក់ព័ន្ធ។ ការស៊ើបអង្កេតដោយសារព័ត៌មានCNN និងBellingcat លើកឡើងថា ក្រុមការងារដាក់ថ្នាំបំពុលរបស់ភ្នាក់ងារចារកិច្ចរុស្ស៊ី (FSB) ដែលមានគ្នាពី៦ ទៅ១០ នាក់ បានព្យយាមតាមដាក់ថ្នាំបំពុលលើលោកNavalny រយៈពេលជាង៣ឆ្នាំ មុននឹងលោកត្រូវរងសារធាតុពុលនេះក្នុងខែសីហា៕
Tag:
រុស្ស៊ី
អាល្លឺម៉ង់
© រក្សាសិទ្ធិដោយ thmeythmey.com
