បេក្ខជននាយករដ្ឋមន្ត្រី ហេតុអ្វីគ្មានសម្តេច ស ខេង ឬសម្តេច ទៀ បាញ់? សម្តេច ហ៊ុន សែន ពន្យល់

ជាតិ

នយោបាយជាតិ

បេក្ខជននាយករដ្ឋមន្ត្រី ហេតុអ្វីគ្មានសម្តេច ស ខេង ឬសម្តេច ទៀ បាញ់? សម្តេច ហ៊ុន សែន ពន្យល់

29, Dec 2020 , 5:42 pm

រូបភាព

សម្តេច ហ៊ុន សែន (ឆ្វេងដៃ) សម្តេច ស ខេង (កណ្តាល) និង សម្តេច ទៀ បាញ់ (រូបពី AP)

ដោយ:

ពីមុន គេ ធ្លាប់តែគិតថា មានតែលោក ហ៊ុន ម៉ាណែត ទេ ដែលនឹងទទួលតំណែងនាយករដ្ឋមន្ត្រីពីសម្តេច ហ៊ុន សែន។ តែឥឡូវ លេចចេញមនុស្សម្នាក់ទៀត ដែលអាចនឹងឈរជាបេក្ខជននាយករដ្ឋមន្ត្រីដែរ គឺលោក អូន ព័ន្ធមុនីរ័ត្ន។ មានចម្ងល់ថា ហេតុអ្វី មិនមែនជាសម្តេច ស ខេង ឬសម្តេច ទៀ បាញ់? ចម្លើយរបស់សម្តេច ហ៊ុន សែន គឺពួកគាត់ទាំង២រូប មានវ័យច្រើនហើយ។

សម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាអនុប្រធានគណបក្សប្រជាជនកម្ពុជា សម្តេច ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាសមាជិកគណៈអចិន្ត្រៃយ៍គណបក្សប្រជាជនកម្ពុជា រួមទាំងឥស្សរជនផ្សេងទៀត ទំនងជាមិនត្រូវបានផ្តល់អាទិភាពឲ្យឈរជាបេក្ខជននាយករដ្ឋមន្ត្រី សម្រាប់គណបក្សប្រជាជនកម្ពុជាឡើយ ក្រោយពីការចាកចេញរបស់សម្តេច ហ៊ុន សែន ក្នុងរយៈពេលបួនដប់ឆ្នាំខាងមុខ។

ហេតុផលចម្បងមួយ គឺដោយសារពួកគាត់ នឹងមានវ័យកាន់តែជ្រេ ទម្រាំតែដល់ពេលសម្តេច ហ៊ុន សែន ឈប់ធ្វើជានាយករដ្ឋមន្ត្រី ដោយអ្នកខ្លះ នឹងចូលវ័យជិត៨០ឆ្នាំ ស្របាក់ស្របាលនឹងសម្តេច ហ៊ុន សែន ដែរ ឬអ្នកខ្លះ នឹងមានវ័យលើសពីសម្តេច ហ៊ុន សែន ទៅទៀត។ តាមរយៈការថ្លែងសារចេញពីភូមិគ្រឹះរបស់ខ្លួន ក្នុងក្រុងតាខ្មៅ ខេត្តកណ្តាល នាព្រឹកថ្ងៃទី២៩ ខែធ្នូ ឆ្នាំ២០២០ ទៅកាន់ជនរួមជាតិ ជុំវិញការបិទបញ្ចប់ព្រឹត្តិការណ៍ឆ្លងជំងឺកូវីដ-១៩ ចូលសហគមន៍ និងបញ្ហាពាក់ព័ន្ធផ្សេងទៀត សម្តេចនាយករដ្ឋមន្ត្រី ហ៊ុន សែន បានឆ្លៀតបង្ហើបពីហេតុផលនេះ។

ទទ្ទឹមនឹងនេះ សម្តេច ហ៊ុន សែន បានប្រកាសម្តងទៀតថា នឹងកាន់តំណែងជានាយករដ្ឋមន្ត្រី រហូតដល់ឆ្នាំ២០២៨។ ដល់ឆ្នាំ២០២៨ សម្តេច ហ៊ុន សែន នឹងឈានចូលវ័យ៧៧ឆ្នាំ សម្តេច ស ខេង នឹងឈានចូលវ័យ៧៨ឆ្នាំ ហើយសម្តេច ទៀ បាញ់ នឹងឈានចូលវ័យ៨៤ឆ្នាំ។ បច្ចុប្បន្ន សម្តេច ហ៊ុន សែន មានវ័យ៦៩ឆ្នាំ សម្តេច ស ខេង មានវ័យ៧០ឆ្នាំ ហើយសម្តេច ទៀ បាញ់ មានវ័យ៧៦ឆ្នាំ។

កន្លងមក គេ មើលឃើញថា លោក ហ៊ុន ម៉ាណែត កូនប្រុសច្បងរបស់សម្តេចនាយករដ្ឋមន្ត្រី ដែលកំពុងកាន់តំណែងជាអគ្គមេញ្ជាការរងនៃកងយោធពលខេមរភូមិន្ទ ជាមេបញ្ជាការកងទ័ពជើងគោក និង ជាសមាជិកគណៈអចិន្ត្រៃយ៍គណបក្សប្រជាជនកម្ពុជា នឹងអាចទទួលតំណែងជានាយករដ្ឋមន្ត្រីពីឪពុក។ ប៉ុន្តែ ថ្មីៗនេះ ស្រាប់តែសម្តេច ហ៊ុន សែន បានរំលេចបេក្ខជននាយករដ្ឋមន្ត្រីថ្មីម្នាក់ទៀត ក្រៅពីលោក ហ៊ុន ម៉ាណែត គឺលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងជាសមាជិកគណៈអចិន្ត្រៃយ៍គណបក្សប្រជាជនកម្ពុជា។

ក្រោយពីរំលេចលោក អូន ព័ន្ធមុនីរ័ត្ន ដែលអាចឈរជាបេក្ខជននាយករដ្ឋមន្ត្រី សម្តេច ហ៊ុន សែន ក៏បានឃើញបានឮគេចោទសួរថា ចុះសម្តេច ស ខេង សម្តេច ទៀ បាញ់ និង អ្នកដទៃទៀត ទៅណា? ដើម្បីជម្រះមន្ទិលរបស់មជ្ឈដ្ឋានទាំងនោះ សម្តេច ហ៊ុន សែន ដែលកាន់តំណែងជានាយករដ្ឋមន្ត្រីប្រមាណ៣៦ឆ្នាំហើយនោះ បានផ្តល់ចម្លើយដូច្នេះថា៖«ចុះបើពេលនុ៎ង [ឆ្នាំ២០២៨] ហ៊ុន សែន អាយុ [ក្បែរ] ៧៨ឆ្នាំហើយ ស ខេង មិន [ជិត] ៨០ ទៀ បាញ់ មិនជិត៩០ អ៊ីចឹង ឲ្យនៅធ្វើងាប់អីទៀត វា មិនទៅទាំងអស់គ្នាតែម្តង ម៉ាហ្វូង ទៅទាំងអស់។ ឧបនាយករដ្ឋមន្ត្រី នៅក្មេងជាងគេ មានតែអូន ព័ន្ធមុនីរ័ត្នទេ»។

លោក អូន ព័ន្ធមុនីរ័ត្ន ដែលបច្ចុប្បន្នមានវ័យ៥៥ឆ្នាំ នឹងឈានចូលវ័យ៦៣ឆ្នាំ នៅឆ្នាំ២០២៨។ តាមរយៈសាររបស់ខ្លួននៅព្រឹកថ្ងៃទី២៩ ខែធ្នូនេះ សម្តេច ហ៊ុន សែន បានប្រកាសច្បាស់ជាងពេលមុនៗថា លោក អូន ព័ន្ធមុនីរ័ត្ន គឺជាបេក្ខជននាយករដ្ឋមន្ត្រី១រូប ក្នុងចំណោមបេក្ខជនដទៃទៀតរបស់គណបក្សប្រជាជនកម្ពុជា។

ជាមួយគ្នានេះ សម្តេច ហ៊ុន សែន បានកោតសរសើរពីសមត្ថភាពរបស់លោក អូន ព័ន្ធមុនីរ័ត្ន។ ក្នុងចំណោមសមត្ថភាពនានារបស់លោក អូន ព័ន្ធមុនីរ័ត្ន សម្តេច ហ៊ុន សែន បានលើកឡើងពីសមត្ថភាព១របស់លោក ដែលសម្តេច បានប្រាប់លោកឲ្យធ្វើ កាលពីយប់មិញ (យប់ថ្ងៃ២៨ធ្នូ)។ កិច្ចការនោះ គឺសម្តេច ហ៊ុន សែន ត្រូវការឯកសារ១ពីលោក អូន ព័ន្ធមុនីរ័ត្ន ហើយលោក ក៏វាយឯកសារនោះនិងបញ្ជូនទៅសម្តេចភ្លាមៗតែម្តង។ សម្តេច បង្ហាញការស្ញប់ស្ញែងចំពោះលោក អូន ព័ន្ធមុនីរ័ត្នដូច្នេះថា៖«ឯកសារចេញពីមុនីរ័ត្ន ចង់លឿនជាងកុំព្យូទ័រ ដែលអ្នកឯងប្រើផង សម្រាប់ ហ៊ុន សែន នោះ ប្រាប់ឲ្យហើយទៅ»។

សម្តេច ហ៊ុន សែន ធ្លាប់ទម្លាយថា សម្តេច បានបណ្តុះបណ្តាលលោក អូន ព័ន្ធមុនីរ័ត្ន តាំងពីដំបូងមក គឺចាប់តាំងពីលោក ធ្វើជាជំនួយការនិងជាលេខាផ្ទាល់របស់សម្តេច រហូតដល់ក្លាយជាឧបនាយករដ្ឋមន្ត្រី និងជារដ្ឋមន្ត្រី កាន់ក្រសួងសេដ្ឋកិច្ច។ លោក អូន ព័ន្ធមុនីរ័ត្ន រៀនចប់ថ្នាក់បណ្ឌិតផ្នែកទស្សនវិជ្ជា វិទ្យាសាស្ត្រសង្គមនិងនយោបាយ នៃសាកលវិទ្យាល័យមូស្គូ ប្រទេសរុស្សី។ លោក បានទទួលគោរមងារជាអគ្គបណ្ឌិត្យសភាចារ្យ កាលពីឆ្នាំ២០១៨។

សម្តេច ហ៊ុន សែន ក្នុងឋានៈជាប្រធានគណបក្សប្រជាជនកម្ពុជា ធ្លាប់អះអាងកាលពីពាក់កណ្តាលឆ្នាំ២០២០នេះថា គណបក្សប្រជាជនកម្ពុជា មានបេក្ខជននាយករដ្ឋមន្ត្រីច្រើនណាស់ មិនមែនមានតែលោក ហ៊ុន ម៉ាណែត នោះទេ៕