ទោះបីកម្ពុជាទទួលរង និងជួបវិបត្តិជំងឺកូវីដ-១៩ តែមិនបានធ្វើឲ្យប៉ះពាល់ដល់ដំណើរការនាំចេញផលិតផលឧស្សាហកម្ម និងកសិកម្មទៅកាន់ទីផ្សារបរទេសនោះទេ។ ផ្ទុយទៅវិញ ការនាំចេញរបស់កម្ពុជាទៅក្រៅប្រទេសក្នុងរយៈពេល១១ខែឆ្នាំនេះ នៅតែបន្តកើនឡើងបើធៀបនឹងឆ្នាំមុន។ នេះបើតាមការលើកឡើងរបស់សម្តេចនាយករដ្ឋមន្ត្រី ហ៊ុន សែន តាមរយៈសារពិសេសនៅថ្ងៃទី២៩ ខែធ្នូ ឆ្នាំ២០២០។
សម្តេចនាយករដ្ឋមន្ត្រី ហ៊ុន សែន បានវាយតម្លៃខ្ពស់ចំពោះការនាំចេញផលិតផលរបស់កម្ពុជាទៅកាន់ទីផ្សារបរទេសក្នុងអំឡុងពេលជួបវិបត្តិនៃជំងឺកូវីដ-១៩។ សម្តេច អះអាងថា គិតត្រឹមខែវិច្ឆិកា ឆ្នាំ២០២០ កម្ពុជាបាននាំចេញផលិតផលឧស្សាហកម្ម និងកសិឧស្សាហកម្មក្នុងទំហំទឹកប្រាក់ជិត១៦ពាន់លានដុល្លារ កើនឡើង១៦,២៩ភាគរយ បើធៀបនឹងរយៈពេលដូចគ្នាកាលពីឆ្នាំមុន។
ទន្ទឹមនឹង លើកឡើងការនាំចេញរបស់កម្ពុជាមានការកើនឡើងក្នុងអំឡុងជួបវិបត្តិជំងឺកូវីដ-១៩ នៅឆ្នាំនេះ សម្តេច ហ៊ុន សែន បានឆ្លៀតដៀមដាមដាក់អ្នករិះគន់លើបញ្ហាសេដ្ឋកិច្ចកម្ពុជាផងដែរ។ «ទោះបីមានកូវីដ-១៩ តែការនាំចេញល្អ ហើយការនាំចេញល្អនេះទៀត វាមានចំណែកដែលខ្ញុំឲ្យអ្នកឯងភ្លឺភ្នែក ថារដ្ឋាភិបាល ហ៊ុន សែន គឺមានអ្នកឯកទេសគ្រប់គ្រាន់។ បណ្ឌិតត្រឹមពួកអ្នកឯង ស្ទើរភ្លើងណាស់មិនទាន់ចេះគ្រប់គ្រងរដ្ឋនោះទេ។ កម្លាំងរបស់រដ្ឋបាល ហ៊ុន សែន មិនមែនជាកម្លាំងធម្មតានោះទេ»។ សម្តេច ហ៊ុន សែន លើកឡើងបែបនេះក្នុងសារពិសេសមួយ ដែលបានចេញផ្សាយនៅថ្ងៃទី២៩ ខែធ្នូ ឆ្នាំ២០២០។
សម្តេចបានបន្តថា ក្នុងចំណោមថវិកាជិត១៦ពាន់លានដុល្លារ កម្ពុជាទទួលបានពីការនាំចេញផលិតផលកសិកម្មចំនួន៣,៨៨១លានដុល្លារ។ ប៉ុន្តែ សម្តេច សង្កត់ធ្ងន់ថា ផលិតផលកសិកម្មទាំងនោះមានតែ៧ប្រភេទប៉ុណ្ណោះរួមមានស្រូវ ដំឡូងមី ស្វាយចន្ទី ស្វាយ ចេកអំបូងលឿង មៀនប៉ៃលិន(តាង៉ែន) និងម្រេច។
បើតាមលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទក្នុងរយៈពេល១១ខែ ឆ្នាំ២០២០នេះ កម្ពុជាបានចេញផលិតផលកសិកម្មចំនួន៦៧មុខ គិតជាបរិមាណប្រមាណ៥លានតោន ទៅកាន់ទីផ្សារអន្តរជាតិ៤៦ប្រទេស។
បើតាមរបាយការណ៍ ដែលអានដោយសម្តេចនាយករដ្ឋមន្ត្រី ហ៊ុន សែន កម្ពុជាបាននាំស្រូវទៅកាន់ទីផ្សារបរទេសមានចំនួនជាង៥លានតោន ក្នុងនោះនាំចេញជាស្រូវ២,១៨០,០០០តោន និងអង្ករ៦៧៥ពាន់តោន ដែលមានទំហំទឹកប្រាក់៥១៤លានដុល្លារ, នាំចេញដំឡូងមីជាង៧លានតោនមានទំហំទឹកប្រាក់ជាង១ពាន់លាន, ស្វាយចន្ទី២១៨,៨៨៤តោនមានទឹកប្រាក់២៨៨លានដុល្លារ, ស្វាយ៨៥០ពាន់តោនមានទឹកប្រាក់៤៧៣លានដុល្លារ, ចេកអំបូងលឿង៣១៣តោនគិតជាប្រាក់៥៥១លានដុល្លារ, មៀនប៉ៃលិន(តាង៉ែន)១៧៤តោនគិតជាប្រាក់៥៧លានដុល្លារ និងម្រិចមានទឹកប្រាក់២៥លានដុល្លារ។
ប្រធានគណបក្សប្រជាជនកម្ពុជារូបនេះរំពឹងថា ការនាំចេញរបស់កម្ពុជាទៅកាន់ទីផ្សារបរទេសនឹងអាចឈានដល់១៦ពាន់លានដុល្លារត្រឹមដំណាច់ខែធ្នូ ឆ្នាំ២០២០។ បើតាម សម្តេច គិតត្រឹមខែវិច្ឆិកា ឆ្នាំ២០២០ ទំហំពាណិជ្ជកម្មរវាងកម្ពុជា និងបណ្តាប្រទេសជាដៃគូមានចំនួន៣២ពាន់លានដុល្លារ៕