COVID-19
អន្តរជាតិ
ថៃ នឹងផ្តល់ប័ណ្ណការងារដល់ពលករខុសច្បាប់ដែលគ្មានឯកសារ ដើម្បីបង្ការជំងឺកូវីដ-១៩
ពលករបរទេសធ្វើការនៅថៃ។ រូបភាព៖Nikkei
×![]()
នៅថ្ងៃទី២៩ ធ្នូ រដ្ឋាភិបាលថៃសម្រេចផ្តល់ប័ណ្ណការងារដល់ពលករកម្ពុជា មីយ៉ាន់ម៉ា និងឡាវ ដែលពុំមានឯកសារឲ្យធ្វើការដោយស្របច្បាប់នៅថៃក្នុងរយៈពេល២ឆ្នាំ ដើម្បីបង្ការជំងឺឆ្លងកូវីដ-១៩។ ចំណែកពលករដែលប័ណ្ណការងារហួសកំណត់ អាចបន្តស្នាក់នៅ និងធ្វើការក្នុងប្រទេសថៃរយៈពេល២ឆ្នាំបន្ថែមទៀតដែរ។
សេចក្តីសម្រេចរបស់គណៈរដ្ឋមន្ត្រីថៃ ធ្វើឡើងបន្ទាប់ពីមានករណីផ្ទុះជំងឺឆ្លងកូវីដ-១៩ ជាង១,៥០០ករណី នៅខេត្តសមុទ្រសាគរ ដែលជាប់ពាក់ព័ន្ធទៅនឹងពលករមីយ៉ាន់ម៉ា ធ្វើការនៅផ្សារលក់គ្រឿងសមុទ្រ។
«រដ្ឋាភិបាលមើលឃើញថា ពលករបរទេសប្រឈមនឹងបញ្ហា ដោយសារតែនិយោជកតម្រូវឲ្យពលករប្តូរទីតាំងដើម្បីរួចខ្លួនពីការល្មើសច្បាប់»។ នេះជាការលើកឡើងរបស់លោកTraisuree Taisaranakul អ្នកនាំពាក្យរងរដ្ឋាភិបាលថៃ។ លោកបន្តថា ពលករបរទេសរត់គេចពីកន្លែងមួយ ទៅកន្លែងមួយទៀត ជាហេតុបណ្តាលឲ្យសាយភាយជំងឺកូវីដ-១៩ ។ នេះយោងតាមទីភ្នាក់ងារព័ត៌មាន Reuters ។
ដើម្បីអាចទទួលបានប័ណ្ណការងារដែលមានសុពលភាពរហូតដល់ខែកុម្ភៈឆ្នាំ២០២៣ ពលករបរទេសត្រូវមានឈ្មោះក្នុងបញ្ជីរបស់និយោជក ចាប់ពីពាក់កណ្តាលខែកញ្ញាទៅ។ បន្ថែមពីនេះ ពលករបរទេសត្រូវឆ្លងកាត់ការធ្វើតេស្តសុខភាពដែលមានតម្លៃប្រមាណ៣២០ដុល្លារ។ ពលករបរទេស មានពេលវេលាចុះឈ្មោះទទួលប័ណ្ណការងាររហូតដល់ពាក់កណ្តាលខែកុម្ភៈ ឆ្នាំ២០២១។
ថៃមានពលករបរទេស ចំនួន២,២លាននាក់ដែលចុះបញ្ជីស្របច្បាប់ ដែលមួយភាគធំមកពីកម្ពុជា មីយ៉ាន់ម៉ា និងឡាវ ដោយធ្វើការក្នុងវិស័យនេសាទ សាងសង់ និងកសិកម្មជាដើម។ អង្គការក្រុមការងារពលករចំណាកស្រុក(MWG) ប៉ាន់ស្មានថា ពលករបរទេសប្រមាន៦សែន ទៅ៨សែននាក់ អាចនឹងទទួលបានប័ណ្ណការងារយោងតាមសេចក្តីសម្រេចរបស់រដ្ឋាភិបាលថ្មីនេះ។
លោក Adisorn Kerdmongkol អ្នកសម្របសម្រួលអង្គការ MWG និយាយថា រដ្ឋាភិបាលថៃគួរតែអនុញ្ញាតឲ្យពលករបរទេស១សែននាក់ផ្សេងទៀតដែលទទួលបានប័ណ្ណការងារហើយឲ្យចូលមកធ្វើការក្នុងប្រទេសថៃ បើទោះបីជាមានការបិទព្រំដែនក្តី។ លោក Kerdmongkol បន្ថែមថា ពលករបរទេសមួយចំនួនដែលជាប់បំណុល កំពុងរង់ចាំចូលធ្វើការក្នុងប្រទេសថៃដើម្បីបង់ប្រាក់ទៅមេខ្យល់ ឬភ្នាក់ងារស្វែងរកការងារ។
អង្គការអន្តរជាតិទេសន្តរប្រវេសន៍ (IOM) សាទរសេចក្តីសម្រេចរបស់រដ្ឋាភិបាល ប៉ុន្តែទទូចឲ្យរដ្ឋាភិបាលថៃផ្តល់ការធ្វើតេស្តជំងឺកូវីដ-១៩ ដល់ពលករដោយគ្មានការរើសអើង។ លោកស្រី Geraldine Ansart ប្រធាន IOM ប្រចាំថៃអះអាងថា ការភ័យខ្លាចពីការរើសអើង ចាប់ខ្លួន ឃុំខ្លួន និងរឹតត្បិតសេរីភាពក្នុងការធ្វើដំណើរ ជាឧបសគ្គសម្រាប់ពលករក្នុងការទទួលបានការព្យាបាលជំងឺ និងថៃទាំសុខភាព។
កាលពីខែមុន ក្រសួងការងារថៃនិយាយថា ពលករកម្ពុជា មីយ៉ាន់ម៉ា និងឡាវចំនួន១សែន៣ម៉ឺននាក់ដែលចូលមកធ្វើការក្នុងប្រទេសថៃស្របច្បាប់ ហើយដែលប័ណ្ណការងារនឹងត្រូវអស់សុពលភាព អាចបន្តធ្វើការ និងស្នាក់នៅក្នុងប្រទេសថៃរយៈពេល២ឆ្នាំបន្ថែមទៀត។
គិតត្រឹមថ្ងៃទី៣០ ធ្នូ ថៃមានករណីឆ្លងសរុបចំនួន៦,៤៤០ករណី ស្លាបចំនួន៦១នាក់ និងជាសះស្បើយចំនួន៤,១៨០ករណី ដោយមានករណីឆ្លងជាមធ្យមចំនួន១៤២ករណីក្នុងមួយថ្ងៃ៕
Tag:
ថៃ
កូវីដ-១៩
© រក្សាសិទ្ធិដោយ thmeythmey.com
