ជាតិ
កសិករគំរូ៤០នាក់នៅឧត្តរមានជ័យ ទទួលបានឧបករណ៍ និងសម្ភារកសិកម្មពីមន្ទីរកសិកម្ម រូបភាពពីមន្ទីរកសិកម្មឧត្តរមានជ័យ
× មន្ទីរកសិកម្ម រុក្ខាប្រមាញ់ និងនេសាទ ខេត្តឧត្តរមានជ័យ បានផ្ដល់ឧបករណ៍ និងសម្ភារកសិកម្ម មួយចំនួន ដល់កសិករគំរូ ៤០នាក់ ក្នុងបណ្ដុំអាជីវកម្មបន្លែ បណ្ដុំអាជីវកម្មស្រូវ និងបណ្ដុំអាជីវកម្មដំឡូងមី។ ឧបករណ៍ និងសម្ភារកសិកម្ម ទាំងនោះរួមមាន ម៉ាស៊ីនព្រោះស្រូវ, ម៉ាស៊ីនវាយបំបែកដី និងលើករង, ម៉ាស៊ីបាញ់ថ្នាំ និងផ្ទះសំណាញ់ ជាដើម។
បើតាមមន្ទីរកសិកម្មឧត្តរមានជ័យ ការផ្ដល់សម្ភារ និងឧបករណ៍ កសិកម្ម បានធ្វើឡើង នៅថ្ងៃទី ២៨ ខែធ្នូ ឆ្នាំ២០២០ ដែលមានវត្តមានលោក ប៉ែន កុសល្យ អភិបាលខេត្តឧត្តរមានជ័យ។ សម្រាប់បណ្តុំអាជីវកម្មបន្លែចំនួន ៣បណ្ដុំ ក្នុងស្រុកអន្លង់វែងមាន ១បណ្ដុំ និងនៅស្រុកត្រពាំង ប្រាសាទ មាន២បណ្ដុំ ដោយបណ្តុំនីមួយៗ ទទួលបានម៉ាស៊ីនវាយបំបែកដី និងលើករងចំនួន១០ គ្រឿង សរុបមាន ៣០គ្រឿង។ ចំណែក បណ្តុំអាជីវកម្ម បន្លែចំនួន៤ ក្នុងក្រុងសំរោង ទទួលបានផ្ទះសំណាញ់១ ក្នុងគ្រួសារនីមួយៗ។
រីឯបណ្តុំអាជីវកម្មស្រូវចំនួន៤ ក្នុងក្រុងសំរោង ស្រុកចុងកាល់ និងស្រុកបន្ទាយអំពិល ដោយបណ្តុំនីមួយៗទទួលបានរថយន្ត១គ្រឿង ប្រើសម្រាប់ព្រោះស្រូវ,បាញ់ថ្នាំ និងបាចជី។ ដោយឡែក បណ្តុំអាជីវកម្មដំឡូងមីចំនួន២ ក្នុងស្រុកអន្លង់វែង និងស្រុកបន្ទាយអំពិល ដោយបណ្តុំនីមួយៗ ទទួលបានរថយន្តចំនួន ១គ្រឿង ប្រើសម្រាប់បាញ់ថ្នាំ សម្លាប់សត្វល្អិត សត្វចង្រៃ បាញ់ថ្នាំស្មៅ និងបាញ់ជីទឹក។
តំណាងកសិករ ដែលទទួលបានសម្ភារនិងឧបករណ៍កសិកម្មពីមន្ទីរកសិកម្ម
មន្ទីរកសិកម្ម បញ្ជាក់ថា បណ្តុំបន្លែខាងលើ បានអនុវត្តកិច្ចសន្យា ផលិតបន្លែជាមួយក្រុមហ៊ុន មាសបៃតង លើដំណាំ ផ្កាខាត់ណាលឿង មួយថ្ងៃចំនួន ៣០០គីឡូក្រាម និងបានរៀបចំកិច្ចសន្យា រវាងបណ្តុំអាជីវកម្មបន្លែ ជាមួយក្រុមហ៊ុនបន្លែសុវត្ថិភាពខ្មែរ លើការផ្គត់ផ្គង់ ដំណាំឪឡឹកលឿង ចំនួន ២ ០០០គីឡូក្រាម។ ជាមួយគ្នានេះ សម្រាប់ដំណាំតាសក់ផ្អែម មួយថ្ងៃត្រូវបានផ្គត់ផ្គង់ចំនួន ៣០០ គីឡូក្រាម និងខាត់ណាផ្កាលឿង ចំនួន ៥០០គីឡូក្រាម ក្នុងមួយថ្ងៃ។ លើសពីនេះ មន្ទីរកសិកម្ម កំពុងចរចារកិច្ចសន្យាទិញតាសក់ទ្រើងចំនួន ២ ០០០ គីឡូក្រាម ក្នុងមួយថ្ងៃ។
បើតាមលោក វេង សាខុន រដ្ឋមន្ត្រីក្រសួងកសិកម្ម បច្ចុប្បន្នកម្មវិធីគម្រោងកម្មវិធីផ្សព្វផ្សាយបច្ចេកវិទ្យាកសិកម្មថ្មីដែលធន់នឹងការប្រែប្រួលអាកាសធាតុ (អាស្ប៉ាយ) បានគ្របដណ្តប់នៅ ទូទាំងប្រទេស និងមានប្រជាកសិករចំនួន ១៤៤ ០០០គ្រួសារ កំពុងទទួលបានប្រយោជន៍ពីកម្មវិធីនេះ៕
© រក្សាសិទ្ធិដោយ thmeythmey.com