អ្នកនិពន្ធជិត២០នាក់ ជាប់ជ័យលាភីប្រចាំឆ្នាំ២០២០

ជាតិ

សង្គមជាតិ

អ្នកនិពន្ធជិត២០នាក់ ជាប់ជ័យលាភីប្រចាំឆ្នាំ២០២០

31, Dec 2020 , 9:29 pm

រូបភាព

ដោយ:

ភ្នំពេញ៖ អ្នកនិពន្ធខ្មែរមួយចំនួនបានទទួលពានរង្វាន់ជ័យលាភីប្រចាំឆ្នាំ២០២០។ អ្នកនិពន្ធខ្មែរទាំងនោះគឺសុទ្ធតែទទួលបានជ័យលាភីក្នុងកម្មវិធីប្រឡងជ្រើសរើសស្នាដៃតែងនិពន្ធ រឿងខ្លី និងកំណាព្យ ដែលរៀបចំឡើងដោយក្រសួងវប្បធម៌ និងវិចិត្រសិល្បៈ ក្រសួងធម្មាការ និងសាសនា និងសមាគមអ្នកនិពន្ធខ្មែរ។

នាថ្ងៃទី២០ ខែមីនា សមាគមអ្នកនិពន្ធខ្មែរបានប្រកាសជ័យលាភីស្នាដៃតែងនិពន្ធរឿងខ្លីស្តីពី«ជីវិតរស់នៅប្រចាំថ្ងៃរបស់ប្រជាជនកម្ពុជាក្នុងរបបកម្ពុជាប្រជាធិបតេយ្យ ប៉ុល ពត»លើកទី១ ចំនួន៩រូប។ ជ័យលាភីទាំង៩រូបនេះគឺមានស្ត្រី១នាក់ និងបុរស៨នាក់។

ម្ចាស់ជ័យលាភីទាំង៩រូបនោះមានដូចជា លោក អ៊ុច សំណាង និពន្ធរឿងខ្លី«បាយក្តាំង», លោក អៀ ហុកនីម និពន្ធរឿង «ពេលម៉ែឃ្លាតទៅ» , លោក វ៉ា មឿន និពន្ធរឿង«ស្នាមដំបៅ» ,លោក ឃុត សុខឿន និពន្ធរឿង«ក្រោមមេឃតែមួយ» ,កញ្ញា គង់ ច័ន្ទវ៉ាន់ណង និពន្ធរឿង«ព្រះអាទិត្យឥតពន្លឺ» ,លោក ម៉ៅ សុវណ្ណឌី និពន្ធរឿង«មួយថ្ងៃមួយយប់», លោកឆាន់ វុត្ថា និពន្ធរឿង «ជើងមេឃពណ៌ក្រហម» ,លោក គឹម សាត និពន្ធរឿង«មិនព្រមរៀបការ» ,និងលោក រឹម ទិត្យបញ្ញា «និពន្ធរឿងអាប់សែ»។

កាលពីថ្ងៃទី១៨ ខែតុលា សមាគមអ្នកនិពន្ធខ្មែរ ក៏បានរៀបចំកម្មវិធីជ្រើសរើសស្នាដៃតែងនិពន្ធ រឿងខ្លី និងកំណាព្យមួយទៀត ប្រធានបទស្តីពី«ជីវិត និងនិរន្តភាពទន្លេមេគង្គ»។ ក្នុងកម្មវិធីនោះក៏បានរកឃើញជ័យលាភីចំនួន២រូប។ ជ័យលាភីទាំងពីររូបនោះមានដូចជា កញ្ញា លឹម ផាន់ណា ជាអ្នកទទួលបានជ័យលាភីស្នាដៃផ្នែកកំណាព្យរឿង«មេគង្គដួងចិត្ត» និងកញ្ញា ឡុង លាបសុជាតា ជាអ្នកទទួលបានជ័យលាភីស្នាដៃផ្នែកនិពន្ធរឿងខ្លី«វារីប្រាថ្នា»។

ក្រសួងធម្មការ និងសាសនា ក៏បានរៀបចំកម្មវិធីជ្រើសរើសជ័យលាភីពានរង្វាន់ពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី៣ ផ្នែកនិពន្ធរឿងខ្លី និងតែងកំណាព្យខ្លីផងដែរ។ កាលពីថ្ងៃទី១៥ ខែធ្នូ ក្រសួងធម្មការ និងសាសនាបានប្រកាសជ័យលាភីពានរង្វាន់អក្សរសិល្ប៍ពុទ្ធសាសនបណ្ឌិត្យចំនួន៦រូប។

ជ័យលាភីលេខ១ផ្នែកតែងនិពន្ធរឿងខ្លីបានទៅលើអ្នកនិពន្ធ ស៊ុយ លីនប៉ាវ ដែលនិពន្ធរឿងខ្លីមានចំណងជើងថា«ម៉ែ! ខ្ញុំចង់រស់។ ជ័យលាភីលេខ២ បានទៅលើអ្នកនិពន្ធ អៀ ហុកនីម និពន្ធរឿងខ្លីមានចំណងជើងថា«ភត្តាភិហារស្ត្រី» និងជ័យលាភីលេខ៣ បានទៅលើអ្នកនិពន្ធ ឆាន់ វុត្ថា និពន្ធរឿងខ្លីមានចំណងជើងថា«វិប្បដិសារីឪពុកខ្ញុំ»។

សម្រាប់ជ័យលាភីលេខ១ផ្នែកតែងនិពន្ធកំណាព្យខ្លីបានទៅលើអ្នកនិពន្ធ វណ្ណ សារ៉េត និពន្ធកំណាព្យរៀបរាប់ពី«សុរា»។ ជ័យលាភីលេខ២បានទៅលើអ្នកនិពន្ធ ជក់ សុភា និពន្ធកំណាព្យរៀបរាប់ពី«ព្រះឥន្ទ្របាត់កែវ» និងជ័យលាភីលេខ៣បានទៅលើអ្នកនិពន្ធ ខឹក ហ៊ន និពន្ធកំណាព្យរៀបរាប់ពី«អពមង្គល»។

អ្នកនិពន្ធដែលទទួលបានជ័យលាភីផ្នែកតែងនិពន្ធរឿងខ្លី និងកំណាព្យរឿងខ្លីចាប់ពីខែតុលា ដល់ខែធ្នូនេះ គឺមិនទាន់អាចទទួលបានពានរង្វាន់លើកទឹកចិត្តពីម្ចាស់កម្មវិធីនៅឡើយទេ។ ម្ចាស់កម្មវិធីនឹងរៀបចំកម្មវិធីប្រគល់ពានរង្វាន់ដល់ពួកគេនៅពេលដែលស្ថានភាពជំងឺកូវីដ-១៩នៅកម្ពុជាធូរស្បើយសិន៕