ជាតិ
សង្គមជាតិ
សិស្សជាប់បាក់ឌុប ដែលបានអាហារូបករណ៍ពីក្រសួងអប់រំ ត្រូវប្រញាប់ដាក់ពាក្យតាមគ្រឹះស្ថានឧត្តមសិក្សា រូបសិស្សានុសិស្សទី១២នៅវិទ្យាល័យជាស៊ីមសន្ធរម៉ុក ដែលបានជាប់សញ្ញាបត្រមធ្យមសិក្សាទុតិយភូមិឆ្នាំ២០២០ដោយស្វ័យប្រវត្តិ
× ភ្នំពេញ៖ ក្រសួងអប់រំ យុវជន និងកីឡា បានប្រាប់ទៅសិស្សជាប់សញ្ញាបត្រមធ្យមសិក្សាទុតិយភូមិ(បាក់ឌុប)ដោយស្វ័យប្រវត្តិ ដែលបានអាហារូបករណ៍ពីក្រសួងនោះ ត្រូវរួសរាន់ចុះឈ្មោះ និងដាក់ពាក្យនៅតាមគ្រឹះស្ថានឧត្តមសិក្សា។
ក្រសួងអប់រំ បានជ្រើសរើសសិស្សដែលជាប់បាក់ឌុបដោយស្វ័យប្រវត្តិ ៩,១៣០នាក់ ឲ្យចូលរៀននៅថ្នាក់បរិញ្ញាបត្រលើមុខជំនាញតាមគ្រឹះស្ថានឧត្តមសិក្សា ដោយឥតគិតថ្លៃសម្រាប់ឆ្នាំសិក្សា២០២០-២០២១។ ក្នុងនោះក្រសួងផ្តល់អាហារូបករណ៍ដល់សិស្សទូទៅ៥,៤៩០នាក់ (សិស្សនារីចំនួន១៣២៤នាក់) ,សិស្សក្រីក្រ ១,៧៣៨នាក់ និងសិស្សនៅតាមតំបន់ដាច់ស្រយាល៥៧៨នាក់ សម្រាប់សិក្សានៅគ្រឹះស្ថានឧត្តមសិក្សារដ្ឋ និងឯកជនចំនួន៣៩។
សិស្សដែលអាចជាប់អាហារូបករណ៍បាន គឺក្រសួងអប់រំបានបែងចែងលក្ខខណ្ឌពីរគឺ លក្ខខណ្ឌទី១ ក្រសួងជ្រើសរើសបេក្ខជនដោយស្វ័យប្រវត្តិ តាមរយៈប្រព័ន្ធកុំព្យូរទ័រ ដោយផ្នែកលើនិទ្ទេសរួមនៃលទ្ធផលប្រឡងជាប់សញ្ញាបត្រមធ្យមសិក្សាទុតិយភូមិក្នុងឆ្នាំ២០២០ និងលក្ខខណ្ឌទី២ គឺជ្រើសរើសបេក្ខជនតាមរយៈប្រឡងនៅតាមគ្រឹះស្ថានឧត្តមសិក្សា ដែលបេក្ខជនបានជ្រើសរើសមុខជំនាញតាមរយៈការប្រឡង។
ក្រសួងអប់រំ បានបញ្ជាក់ថា ចំពោះសិស្សពូកែជាប់ចំណាត់ថ្នាក់ទូទាំងប្រទេសផ្នែក គណិតវិទ្យា រូបវិទ្យា និងអក្សរសាស្ត្រខ្មែរ ដែលបានជាប់បាក់ឌុបឆ្នាំ២០២០នេះ មានសិទ្ធិទទួលបានអាហារូបករណ៍ដោយស្វ័យប្រវត្តិចំនួន១មុខជំនាញ។ សម្រាប់សិស្សក្រីក្រ ក៏ទទួលបានអាហារូបករណ៍ដោយស្វ័យប្រវត្តិដែរ។ ចំណែកសិស្សមានពិការភាព ក៏មានសិទ្ធិទទួលបានអាហារូបករណ៍ដោយស្វ័យប្រវត្តិចំនួន១មុខដោយមិនតម្រូវឲ្យប្រឡងឡើយ។
ក្រសួងអប់រំណែនាំឲ្យសិស្សទាំងនោះ ប្រញាប់ទៅចុះឈ្មោះ និងដាក់ពាក្យនៅតាមជំនាញក្នុងគ្រឹះស្ថានឧត្តមសិក្សា។ ក្នុងករណីពួកគេមិនបានទៅចុះឈ្មោះ និងដាក់ពាក្យឲ្យទាន់ពេលវេលាទេ នោះនឹងបាត់បង់ឱកាសទទួលបានអាហារូបករណ៍ជាក់ជាពុំខាន។
ក្រសួងអប់រំ ក៏បានណែនាំឲ្យសិស្សក្រីក្រចំនួន១២៥នាក់ ដែលទទួលបានអាហារូបករណ៍ ឬបង់ថ្លៃ ត្រូវស្នាក់នៅបណ្តោះអាសន្នដោយឥតគិតថ្លៃ នៅមជ្ឃមណ្ឌលអន្តេវាសិកនិស្សិតនារី រួសរាន់ទៅយកពាក្យស្នើសុំស្នាក់នៅ ពីគ្រឹះស្ថានឧត្តមសិក្សាខ្លួនឲ្យបានមុនថ្ងៃទី១ ខែកុម្ភៈ ឆ្នាំ២០២១ដែរ៕
Tag:
សិស្ស
អប់រំ
គ្រឹះស្ថានឧត្តមសិក្សា
© រក្សាសិទ្ធិដោយ thmeythmey.com