ជាតិ
ទូតវៀតណាម៖«សូមឲ្យភាពជាអ្នកជិតខាងល្អរវាងកម្ពុជា-វៀតណាម កាន់តែអភិវឌ្ឍខ្លាំងក្លា» ជំនួបរវាងសម្តេចនាយករដ្ឋមន្រ្តី ហ៊ុន សែន និង លោក Vu Quang Minh អគ្គរដ្ឋទូតវៀតណាមប្រចាំកម្ពុជា នៅវិមានសន្តិភាព កាលដើមឆ្នាំ២០១៨ (រូបពីអង្គភាពប្រតិកម្មរហ័សនៃទីស្តីការគណៈរដ្ឋមន្រ្តី)
× ឆ្នាំចាស់ជិតកន្លងផុតទៅ ឆ្នាំថ្មីជិតចូលមកដល់ លោក វូ ក្វាងមិញ (Vu Quang Minh) ឯកអគ្គរដ្ឋទូតវៀតណាមប្រចាំកម្ពុជា បានរំលេចសារខ្លីមួយជុំវិញទំនាក់ទំនងរវាងប្រទេសរបស់លោកនិងកម្ពុជា។ សាររបស់លោក ត្រូវបានបង្ហោះលើទំព័រហ្វេសប៊ុកនៃស្ថានទូតវៀតណាមប្រចាំកម្ពុជា នៅថ្ងៃទី៣០ ខែធ្នូ ឆ្នាំ២០២០។
ស្ថានទូតវៀតណាម បានបង្ហោះសាររបស់លោក វូ ក្វាងមិញ ដូច្នេះថា៖«សូមឲ្យចំណងទំនាក់ទំនងភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយរវាងកម្ពុជា-វៀតណាម កាន់តែអភិវឌ្ឍខ្លាំងក្លា និងសូមឲ្យប្រទេសទាំងពីរ បន្តទទួលបានជោគជ័យក្នុងការគ្រប់គ្រងជំងឺរាលដាល [កូវីដ-១៩] ដើម្បីនាំមកជីវភាពរស់នៅប្រកបដោយភាពប្រក្រតីឡើងវិញឲ្យបានឆាប់ៗ»។
តាមរយៈសារនោះ ឯកអគ្គរដ្ឋទូតវៀតណាម បានជូនពរដល់ប្រជាជនខ្មែរគ្រប់រូប សម្រាប់ឆ្នាំថ្មី២០២១ ឲ្យទទួលបានសិរីសួស្តី វិបុលភាព និង ការរីកចម្រើនជានិរន្តរ៍៕
Tag:
កម្ពុជា-វៀតណាម
Vu Quang Minh
© រក្សាសិទ្ធិដោយ thmeythmey.com