COVID-19
ជាតិ
ពលករខ្មែរម្នាក់ទៀត ទើបមកពីថៃ បានឆ្លង COVID-19
× ភ្នំពេញ៖ ស្ត្រីខ្មែរម្នាក់ទៀត ដែលទើបមកពីប្រទេសថៃ បានឆ្លងជំងឺកូវីដ-១៩។ នេះជាការលើកឡើងរបស់លោក កែវ ប៊ុនរ៉េត ប្រធានមន្ទីរសុខាភិបាលខេត្តបាត់ដំបង ដោយបញ្ជាក់ប្រាប់សារព័ត៌មានថ្មីៗ ថា ស្រី្តដែលឆ្លងជំងឺនេះ មានវ័យ២៦ឆ្នាំ ជាពលករធ្វើការនៅប្រទេសថៃ។
លោក កែវ ប៊ុនរ៉េត បន្តរៀបរាប់ថា ស្ត្រីខ្មែរដែលបានឆ្លងនូវជំងឺកូវីដ-១៩នេះ មានអាសយដ្ឋានរស់នៅក្នុងខេត្តបាត់ដំបង ដោយបានមកដល់កម្ពុជា កាលពីថ្ងៃទី៣០ធ្នូ ឆ្នាំ២០២០។ បច្ចុប្បន្ន ស្ត្រីរូបនេះកំពុងសម្រាកព្យាបាលនៅមន្ទីរពេទ្យបង្អែកខេត្តបាត់ដំបង។
បើតាមលោក កែវ ប៊ុនរ៉េត មានពលករជាង១,០០០នាក់ កំពុងធ្វើចត្តាឡីស័ក នៅតាមមណ្ឌលចត្តាឡីស័កនានា ក្នុងខេត្តបាត់ដំបង។
បច្ចុប្បន្នអ្នកកើតកូវីដ-១៩នៅកម្ពុជា ឡើងដល់៣៦៧នាក់ ក្នុងនោះ៣៦១នាក់ បានព្យាបាលសះស្បើយ។ អ្នកជំងឺ២នាក់ពាក់ព័ន្ធនឹងព្រឹត្តិការណ៍២៨វិច្ឆិកា សម្រាកព្យាបាលនៅមន្ទីរពេទ្យមិត្តភាពខ្មែរសូវៀត ១ដែលជាករណីនាំចូល សម្រាកនៅមជ្ឈមណ្ឌលជាតិកំចាត់ជំងឺហង់សិន និងរបេង។ រីឯ៣ ករណីចុងក្រោយដែលជាពលករមកពីថៃ សម្រាកព្យាបាលនៅមន្ទីរពេទ្យបង្អែកខេត្តបាត់ដំបង៕
© រក្សាសិទ្ធិដោយ thmeythmey.com