អ្នកនិពន្ធអាមេរិកបង្ហាញពីទម្លាប់បរិភោគ៦យ៉ាងរបស់អ្នកមានអាយុជាង១០០ឆ្នាំ
ព័ត៍មានសុខភាព
អន្តរជាតិ
អ្នកនិពន្ធអាមេរិកបង្ហាញពីទម្លាប់បរិភោគ៦យ៉ាងរបស់អ្នកមានអាយុជាង១០០ឆ្នាំ
01, Jan 2021 , 9:29 pm        
រូបភាព
ដោយ: ធីតា
យើងដឹងជាទូទៅហើយថា គន្លឹះដែលអាចរស់នៅបានយូរអង្វែង គឺការបរិភោគអាហារសុខភាព។ សៀវភៅដែលមានចំណងជើងថា Blue Zones: Lessons for Living Longer By the People Who Have Lives the Longest បានបង្ហាញពីទម្លាប់រួមរបស់មនុស្សដែលមានអាយុជាង១០០ឆ្នាំ លើការបរិភោគអាហារ។

 
ក្នុងស្នាដៃដែលលក់ដាច់បំផុតរបស់ New York Times លោក Dan Buettner ដែលជាអ្នកនិពន្ធអាមេរិក បានបែងចែកក្រុមមនុស្សដែលបានជួបសម្ភាស ហើយលោកបានរកឃើញចំនួនរួមជាច្រើនរបស់មនុស្សអាយុវែងទាក់ទងនឹងទម្លាប់បរិភាគអាហារ ដែលពលរដ្ឋអាមេរិកជាច្រើនពិបាកអនុវត្តតាម។
 
កត្តាទាំង៦នោះរួមមាន៖
១. រុក្ខជាតិ បន្លែ ផ្លែឈើ
រុក្ខជាតិនៅតែជម្រើសល្អបំផុតសម្រាប់ការរស់នៅបានយូរ។ ការសិក្សាបង្ហាញថា មនុស្សវ័យចំណាស់ដែលមានសុខភាពមាំទាំជាង៩០ភាគរយ មានបន្លែ និងផ្លែឈើ ជារបបអាហារ។ អ្នកអាយុវែងភាគច្រើនបំផុត គឺបរិភោគបន្លែបៃតង ដែលដាំដុះនៅសហគមន៍របស់ខ្លួន ជាពិសេសបន្លែ ផ្លែឈើដែលពួកគាត់ដាំដុះដោយខ្លួនឯងតែម្តង។
 
២. បរិភោគសាច់ទៅតាមបែបផែនត្រឹមត្រូវ
បើផ្តោតទៅលើរុក្ខជាតិ វាហាក់ដូចជាចោលសារប្រយោជន៍នៃសាច់។ តាមពិតទៅ បើវិលទៅរកអតីតកាលនៅអាមេរិក ការបរិភោគសាច់ជាញឹកញាប់ធ្វើឡើងតែក្នុងពិធីជប់លៀង ឬកម្មវិធីពិសេសប៉ុណ្ណោះ។ លោក Buettner បានទូន្មានថា បើចង់បានអាយុដល់១០០ឆ្នាំ គួរដកខ្លួនពីអាហារដែលមានសាច់ច្រើន។ លោកបញ្ជាក់ថា អ្នកមានអាយុច្រើនជាទូទៅបរិភោគសាច់តែក្នុងរង្វង់១០០ក្រាម៥លើកប៉ុណ្ណោះក្នុង១ខែ។ 
 
៣. កម្រិតជាតិស្ករ
ការកម្រិតជាតិស្ករជារឿងមួយដែលពិបាកធ្វើ ប៉ុន្តែត្រូវតែធ្វើ។ មនុស្សវ័យ១០០ឆ្នាំ បរិភោគស្ករមែន ប៉ុន្តែដោយប្រុងប្រយ័ត្នបំផុត ហើយពួកគាត់ជ្រើសរើសការបរិភោគផ្លែឈើមានកម្រិតជាតិផ្អែមដូចស្ករជំនួសវិញ។ ការកម្រិតសម្រាប់ការបរិភោគតិចជាង២៥ក្រាមក្នុង១ថ្ងៃគឺជាជម្រើសល្អ។ សៀវភៅដ៏ល្បីល្បាញមួយ បានលើកឡើងពីករណីក្រុមហ៊ុនអាហារធំៗដាក់ស្ករ ខ្លាញ់ និងអំបិល ដែលក្នុងគោលបំណងទាក់ទាញអតិថិជន ឲ្យដក់ជាប់នូវរសជាតិ តែបើអ្នកជាអតិថិជនឆ្លាត មិនត្រូវចាញ់បោកនោះឡើយ។


 
៤. ផឹកទឹកឲ្យច្រើន
ភេសជ្ជៈថាមពល សូដា ស្រាបៀរ គ្រឿងស្រវឹង និងកាហ្វេហួសប្រមាណ មិនមែនជាជម្រើសរបស់អ្នកមានអាយុ១០០ឆ្នាំឡើយ។ ពួកគាត់ភាគច្រើនផឹកទឹកយ៉ាងហោចណាស់៧កែវក្នុង១ថ្ងៃ ដោយមិនសូវអើពើភេសជ្ជៈដែលមានសារធាតុគីមី។ ទោះបីជាយ៉ាងណាក៏ដោយ កាហ្វេក្នុងកម្រិតត្រឹមត្រូវ ទឹកតែ ក៏ដូចជាស្រាក្រហម ក៏មិនជាជម្រើសអាក្រក់នោះដែរ។
 
៥. បំពេញប្រូតេអ៊ីនពីសណ្តែក
នឹកដល់អាហារបំប៉ន សូមកុំរំលងសណ្តែកឲ្យសោះ ជាពិសេសសណ្តែកសៀង។ សណ្តែកមានសារធាតុប្រូតេអ៊ីនដ៏សំខាន់បំផុតនៃរបបអាហារ ដែលជួយដល់ការលូតលាស់កោសិកាផ្សេងៗក្នុងខ្លួនរបស់យើង។  ក្រៅពីសណ្តែក លោកអ្នកក៏អាចបន្ថែមអាហារជាតិសរសៃ (fiber) ទៅក្នុងរបបអាហារជាប្រចាំផងដែរ។
 
៦. បន្ថយការបរិភោគតែម្សៅពណ៌សនៅលើនំប៉័ង
វេជ្ជបណ្ឌិតអាមេរិក លោក Robert Atkins បានណែនាំឲ្យកាត់បន្ថយសារធាតុការបូអ៊ីដ្រាត ដែលស្ថិតនៅម្សៅនំប៉័ងពណ៌ស។ តាមពិតទៅ ការបូអ៊ីដ្រាត ជួយដល់ឆ្អឹង និងសាច់ដុំ ប៉ុន្តែលោកអ្នកគួរបរិភោគចេញពីធញ្ញជាតិផ្ទាល់ ដូចជាការ៉ុត ដំឡូងជាដើម។ នំប៉័ងជាអាហារកែច្នៃ ដែលមានជាតិខ្លាញ់ និងគ្លុយកូស។ មនុស្សចាស់ដែលមានអាយុច្រើនមិនចូលចិត្តបរិភោគម្សៅសនៅក្នុងនំប៉័ងនោះឡើយ។
 
និយាយរួម តាមរយៈស្នាដៃ Blue Zones: Lessons for Living Longer By the People Who Have Lives the Longest  លោក Dan Buettner ចង់បង្ហាញសារជារួមថា៖ «ញ៉ាំស្អាត អាយុវែង»៕
 

© រក្សាសិទ្ធិដោយ thmeythmey.com