ក្រុមជម្រើសជាតិកម្ពុជានឹងប្រកួតជាមួយចិន នៅថ្ងៃសម្ពោធពហុកីឡដ្ឋានជាតិមរតកតេជោ

កីឡាជាតិ

ជាតិ

ក្រុមជម្រើសជាតិកម្ពុជានឹងប្រកួតជាមួយចិន នៅថ្ងៃសម្ពោធពហុកីឡដ្ឋានជាតិមរតកតេជោ

02, Jan 2021 , 7:59 am

រូបភាព

ដោយ:

ក្រុមកីឡាករបាល់ទាត់ជម្រើសជាតិកម្ពុជា នឹងប្រកួតមិត្តភាពអន្តរជាតិជាមួយចិន ដើម្បីអបអរក្នុងថ្ងៃសម្ពោធដាក់ឲ្យប្រើប្រាស់ ពហុកីឡដ្ឋានជាតិមរតកតេជោ ដែលគ្រោងបញ្ចប់ការសាងសង់នៅអំឡុងខែឧសភា ឆ្នាំ២០២១ ខាងមុខនេះ។ ក្នុងថ្ងៃនោះ ក៏មានការរៀបចំសាកល្បងពិធីបើកការប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះផងដែរ។

បើពុំមានការប្រែប្រួលទេកីឡដ្ឋានបាល់ទាត់ស្តង់ដាអន្តរជាតិក្នុងពហុកីឡដ្ឋានជាតិមរតកតេជោ ដែលជាជំនួយឥតសំណងរបស់រដ្ឋាភិបាលចិន នឹងបញ្ចប់ការសាងសង់ជាស្ថាពរនៅអំឡុងខែឧសភា ឆ្នាំ២០២១ ខាងមុខនេះ។ បើតាមការវាយតម្លៃរបស់លោក ថោង ខុន អនុប្រធានអចិន្ត្រៃយ៍នៃគណៈកម្មាធិការជាតិរៀបចំការប្រកួតកីឡាស៊ីហ្គេមឆ្នាំ២០២៣ មកទល់ពេលនេះ ការសាងសង់សម្រេចបានជាង៨០ភាគរយហើយ។

ក្រោយសាងសង់រួចរាល់១០០ភាគរយ ពហុកីឡដ្ឋាន ដែលសាងសង់ដោយប្រើបច្ចេកវិទ្យាចុងក្រោយរបស់ចិនមួយនេះ អាចនឹងត្រូវបានសម្ពោធដាក់ឲ្យប្រើប្រាស់ក្នុងអំឡុងខែឧសភា ឆ្នាំ២០២១តែម្តងក្នុងករណីបញ្ចប់ការសាងសង់តាមការគ្រោងទុក។ ប៉ុន្តែប្រសិនបើការសាងសង់ត្រូវបានអូសបន្លាយ នោះការសម្ពោធដាក់ឲ្យប្រើប្រាស់ ក៏ត្រូវអូសបន្លាយពេលវេលាផងដែរ។

សកម្មភាពក្រុមកីឡាករជម្រើសជាតិកម្ពុជាប្រកួតជាមួយចិន ក្នុងវគ្គជម្រុះ AFC U23 Championship នៅពហុកីឡដ្ឋានជាតិ កាលពីឆ្នាំ២០១៧

ជាមួយគ្នានេះ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានលើកឡើងពីផែនការជាច្រើន ដែលត្រូវធ្វើក្នុងថ្ងៃសម្ពោធពហុកីឡដ្ឋានជាតិមរតកតេជោ។ ក្រៅពីកិច្ចការពាក់ព័ន្ធវិធីសម្ពោធ ក៏មានការសម្តែង និងប្រកួតកីឡា ដើម្បីអបអរក្នុងថ្ងៃនោះផងដែរ។

បន្ថែមលើនេះ គណៈកម្មាធិការជាតិរៀបចំការប្រកួតកីឡាស៊ីហ្គេម នឹងសហការជាមួយសហព័ន្ធកីឡាបាល់ទាត់កម្ពុជា ក៏ដូចជាភាគីចិន រៀបចំការប្រកួតបាល់ទាត់មិត្តភាពអន្តរជាតិរវាងក្រុមជម្រើសជាតិកម្ពុជាជាមួយក្រុមមជម្រើសជាតិចិន ដើម្បីអបអរក្នុងថ្ងៃសម្ពោធសមិទ្ធផល ដែលជាជំនួយឥតសំណងរបស់ចិនមកឲ្យរាជរដ្ឋាភិបាលកម្ពុជា។ នេះបើតាមការលើកឡើងរបស់ លោក វ៉ាត់ ចំរើន។

ក្រៅពីការប្រកួតបាល់ទាត់មិត្តភាពអន្តរជាតិ គណៈកម្មការ CAMSOC អាចនឹងរៀបចំសាកល្បងនូវពិធីបើកការប្រកួតកីឡាស៊ីហ្គេម ដើម្បីទុកជាបទពិសោធមុនឈានដល់ការបើកការប្រកួតផ្លូវការនៅឆ្នាំ២០២៣។ ការធ្វើបែបនេះ វាក៏ជាយន្តការមួយជួយឲ្យកម្ពុជាអាចស្វែងរកចំណុចខ្វះខាតរបស់ខ្លួនមកកែលម្អ ដើម្បីឲ្យការបើកការប្រកួតផ្លូវការទទួលបានជោគជ័យផងដែរ។

ពហុកីឡដ្ឋានជាតិមរតកតេជោសាងសង់ឡើងក្នុងគោលបំណង ដើម្បីត្រៀមទទួលធ្វើម្ចាស់ផ្ទះជាប្រវត្តិសាស្ត្រនូវការប្រកួតកីឡាស៊ីហ្គេមឆ្នាំ២០២៣ និងព្រឹត្តិការណ៍អន្តរជាតិផ្សេងៗទៀតនៅក្រោយឆ្នាំ២០២៣។

កីឡដ្ឋានលំដាប់អន្តរជាតិដែលជាបច្ចេកវិទ្យាចុងក្រោយរបស់ចិន សាងសង់លើផ្ទៃដីជាង១៦ហិកតា ដោយគ្រោងចំណាយថវិកាជាង១៥៨លានដុល្លារ ដែលជាជំនួយឥតសំណងរបស់រដ្ឋាភិបាលចិន។ កីឡដ្ឋាននេះ អាចផ្ទុកអ្នកទស្សនាបានប្រមាណ៦ម៉ឺននាក់ និងអាចជម្លៀងទស្សនិកជនត្រឹមតែ៧នាទីក្នុងករណីមានហេតុការណ៍មិនប្រក្រតីកើតឡើង។

សមិទ្ធផលទីពីរនៃពហុកីឡដ្ឋានជាតិមរតកតេជោនេះ បានបើកការដ្ឋានសាងសង់នៅថ្ងៃទី៤ មេសា ឆ្នាំ២០១៧ ក្រោមវត្តមានសម្តេចនាយករដ្ឋមន្ត្រី ហ៊ុន សែន ក្នុងអំឡុងពេលសម្ពោធដាក់ឲ្យប្រើប្រាស់សមិទ្ធផលដំណាក់កាលទី១ រួមមានមជ្ឈមណ្ឌលអាងហែលទឹក មជ្ឈមណ្ឌលកីឡាក្នុងសាល, ទីលានបាល់បោះ, និងអគារស្នាក់នៅរបស់អត្តពលិក៕