ក្នុងបរិបទកូវីដ-១៩ ប្រទេសនៅអាស៊ីអាគ្នេយ៍ បានដាក់ចេញវិធានការរៀងៗខ្លួន ដើម្បីទប់ស្កាត់ការរាតត្បាតនៃជំងឺឆ្លងសកលផង ក៏ដូចជាជួយសង្គ្រោះសេដ្ឋកិច្ចប្រទេសខ្លួនផង។ ការដាក់ចត្តាឡីស័ក ជាវិធីសាស្ត្រមានប្រសិទ្ធភាពខ្ពស់មួយដែលដាក់អ្នកសង្ស័យ។ យ៉ាងណាក៏ដោយ គេឃើញមានបុគ្គលមួយចំនួន បានល្មើស និងលួចរត់ចេញអំឡុង១៤ថ្ងៃនេះ។ ការពិន័យជាប្រាក់ និងការដាក់ទោសទណ្ឌ ត្រូវបានអនុវត្តដើម្បីទប់ស្កាត់ករណីរត់ចេញ និងល្មើសវិធានចត្តាឡីស័ក។
សម្រាប់នៅកម្ពុជា ក្រសួងសុខាភិបាល នៅខែវិច្ឆិកា កន្លងទៅ ក៏បានចេញវិធានការ ជុំវិញអ្នកល្មើសចត្តាឡីស័កផងដែរ។ រាល់អ្នកល្មើសនឹងវិធានការនេះ អ្នកទាំងនោះ ត្រូវពិន័យជាប្រាក់ពី ២០ម៉ឺនរៀល ដល់ ១លានរៀល ហើយថែមទាំងអាចត្រូវផ្តន្ទាទោសតាមក្រមព្រហ្មទណ្ឌថែមទៀត។
ក្រៅពីកម្ពុជា តើប្រទេសអាស៊ីអាគ្នេយ៍ណាខ្លះ ដាក់ពិន័យលើអ្នកល្មើសចត្តាឡីស័ក?
១. វៀតណាម
ដើម្បីទប់ស្កាត់ការរាតត្បាតកូវីដ-១៩ នៅក្នុងប្រទេស វៀតណាម បានដាក់ចេញវិធានការយ៉ាងតឹងរ៉ឹងលើអ្នកល្មើសការដាក់ចត្តាឡីស័ក។ តាមការចុះផ្សាយរបស់សារព័ត៌មានក្នុងស្រុកវៀតណាម រាល់អ្នកល្មើសនឹងវិធានចត្តាឡីស័កដូចជាការរត់គេចពីមណ្ឌលចត្តាឡីស័ក មិនអនុវត្តវិធានចត្តាឡីស័កឲ្យបានត្រឹមត្រូវ និងបដិសេធការដាក់ចត្តាឡីស័កអាចប្រឈមនឹងការពិន័យក្នុងបទល្មើសព្រហ្មទណ្ឌ រួមទាំងការពិន័យជាប្រាក់ថែមទៀត។
ថ្មីៗនេះ បុរសជនជាតិវៀតណាមម្នាក់ ត្រូវបានអាជ្ញាធរវៀតណាម ស៊ើបអង្កេតពីការមិនគោរពវិធានចត្តាឡីស័ក ដែលអាចប្រឈមនឹងជាប់ពន្ធនាគាររហូតដល់ ១២ឆ្នាំ។
២. មីយ៉ាន់ម៉ា
នៅមីយ៉ាន់ម៉ាវិញ អ្នកល្មើសនឹងវិធានចត្តាឡីស័កក្នុងបរិបទកូវីដ-១៩ ក៏ត្រូវរងទណ្ឌកម្មធ្ងន់ធ្ងរផងដែរ។ តាមច្បាប់មីយ៉ាន់ម៉ា អ្នកល្មើសនឹងវិធានការដាក់ដាច់ដោយឡែករបស់របស់រដ្ឋាភិបាលថ្នាក់តំបន់ និងរដ្ឋ អ្នកទាំងនោះ នឹងអាចរងការចោទប្រកាន់ពីបទល្មើសដែលមានចែងក្នុងច្បាប់គ្រប់គ្រងគ្រោះធម្មជាតិ, ច្បាប់ទប់ស្កាត់ និងគ្រប់គ្រងជំងឺឆ្លង និងមាត្រា ១៨៨ នៃក្រមព្រហ្មទណ្ឌជាដើម។ លើសពីនេះ អ្នកល្មើសក៏អាចរងការពិន័យជាប្រាក់ផងដែរ។
៣. សិង្ហបុរី
សិង្ហបុរី បានដាក់ចេញវិធានការជាច្រើន ក្នុងការទប់ស្កាត់កូវីដ-១៩ ស្របពេលករណីឆ្លងត្រូវបានរកឃើញជាបន្តបន្ទាប់។ តាមរយៈច្បាប់ស្តីពីជំងឺឆ្លង អ្នកល្មើសនឹងវិធានចត្តាឡីស័ក ត្រូវពិន័យជាប្រាក់រហូតដល់ជាង ៧ពាន់ដុល្លារ និងអាចប្រឈមជាប់ពន្ធនាគាររហូតដល់ ៦ខែ ឬពិន័យទាំងពីរ។ កន្លងទៅអាជ្ញាធរ សិង្ហបុរី បានពិន័យអ្នកល្មើសជាប្រាក់ជាច្រើននាក់មកហើយ។ ចំណែកករណីជាប់ពន្ធនាគារមិនទាន់មាននៅឡើយទេ។
៤. ហ្វីលីពីន
ហ្វីលីពីន បានដាក់ចេញទណ្ឌកម្មមួយចំនួន ដើម្បីពិន័យអ្នកល្មើសចត្តាឡីស័ក។ រាល់បុគ្គលលើ្មសនឹងវិធាននេះ អាចពិន័យជាប្រាក់រហូតដល់ជាង ១០០ដុល្លារ និងជាប់ពន្ធនាគាររហូតដល់ ៣០ថ្ងៃ។ ក្នុងខែមេសាកន្លងទៅ លោកប្រធានាធិបតី រ៉ូឌ្រីហ្គោ ឌូទើតេ បានព្រមានថា លោកនឹងបញ្ជាកម្លាំងប៉ូលិស និងទាហាន បាញ់សម្លាប់ចោលតែម្តង លើអ្នកដែលមិនគោរពបម្រាមបិទតំបន់។ ប៉ុន្តែករណីនេះ អាចកើតឡើង ក្នុងពេលហ្វីលីពីនរងគ្រោះដោយសារកូវីដ-១៩ ធ្ងន់ធ្ងរប៉ុណ្ណោះ។
៥. ម៉ាឡេស៊ី
នៅក្នុងខែមិថុនាកន្លងទៅ រដ្ឋមន្ត្រីការពារជាតិម៉ាឡេស៊ី លោក Ismail Sabri Yaakob បានបញ្ជាក់ថា បុគ្គលទាំងឡាយណា ដែលបំពានវិធានការចត្តាឡីស័ក អាចនឹងពិន័យជាប្រាក់ប្រមាណ ២៤៦ដុល្លារ និងអាចប្រឈមមុខជាមួយនឹងតុលាការផងដែរ។
នៅក្នុងខែសីហាកន្លងទៅ តុលាការម៉ាឡេស៊ី បានដាក់ពន្ធនាគារជនជាតិឥណ្ឌាម្នាក់រហូតដល់ ៥ខែ និងពិន័យជាប្រាក់ជិត ៣០០០ដុល្លារ បន្ទាប់ពីល្មើសវិធានចត្តាឡីស័ក និងបង្កឲ្យមនុស្សផ្សេងទៀតឆ្លងកូវីដ-១៩។ ក្រៅពីមិនគោរពចត្តាឡីស័ក បុរសជនជាតិឥណ្ឌារូបនេះ ក៏រងពីបទចោទផ្សេងទៀតផងដែរ។ នេះបើតាមការចុះផ្សាយរបស់កាសែត The Straits Times។
៦. ឥណ្ឌូណេស៊ី
ដើម្បីបង្ការករណីឆ្លងកូរ៉ូណាវីរុស ដែលត្រូវបានរកឃើញជាច្រើនក្នុងមួយថ្ងៃៗ រដ្ឋាភិបាលឥណ្ឌូណេស៊ី បានបញ្ជាក់ថា អ្នកល្មើសនឹងវិធានការចត្តាឡីស័កអាចនឹងជាប់ពន្ធនាគាររយៈពេល ៥ថ្ងៃ និងពិន័យជាប្រាក់រហូតដល់ជិត ១ពាន់ដុល្លារ។ ការពិន័យនេះ គឺផ្អែកទៅតាមច្បាប់ស្តីពីគ្រប់គ្រង និងបង្ការជំងឺឆ្លងឆ្នាំ ១៩៨៨។
៧. ព្រុយណេ
យ៉ាងណាមិញ ព្រុយណេ ក៏មានច្បាប់ពិន័យអ្នកល្មើសវិធានចត្តាឡីស័កផងដែរ។ តាមច្បាប់ស្តីពីការបង្ការ និងចត្តាឡីស័កនៃជំងឺឆ្លង អ្នកល្មើសអាចពិន័យជាប្រាក់រហូតដល់ ៥០០ដុល្លារ និងប្រឈមនឹងការចោទប្រកាន់ពីបទល្មើសព្រហ្មទណ្ឌ។
៨. ថៃ
ចំណែកប្រទេសជិតខាងកម្ពុជាវិញ ថៃ បានព្រមាន កាលពីខែមីនាថា រាល់អ្នកល្មើសនឹងវិធានចត្តាឡីស័ក អាចនឹងពិន័យជាប្រាក់រហូតដល់ជិត ៥ពាន់ដុល្លារ។ នេះបើតាមការបញ្ជាក់របស់អ្នកនាំពាក្យក្រសួងសុខាភិបាលថៃ ប្រាប់ទីភ្នាក់ងារព័ត៌មាន Reuters។
សូមបញ្ជាក់ថា ក្នុងចំណោមប្រទេសអាស៊ីអាគ្នេយ៍ទាំងអស់ គេមិនឃើញមានព័ត៌មានទាក់ទងការដាក់ពិន័យឡើយ ប៉ុន្តែការអនុវត្តវិធានចត្តាឡីស័ក ត្រូវបានអនុវត្តយ៉ាងតឹងរ៉ឹងក្នុងប្រទេសនេះ៕