អន្តរជាតិ
ហ្វីលីពីនហាមឃាត់អ្នកដំណើរពីអាមេរិកបន្ទាប់ពីមានជំងឺកូវីដ-19 ប្រភេទថ្មីនៅរដ្ឋ Florida រូបថត AFP
×
ដោយ៖កង ម៉េងហុង
អ្នកនាំពាក្យរបស់ប្រធានាធិបតីហ្វីលីពីននៅថ្ងៃទី១ ខែមករា ឆ្នាំ ២០២១ ប្រកាសថា ហ្វីលីពីននឹងហាមឃាត់ការធ្វើដំណើររបស់អ្នកទេសចរបរទេសពីអាមេរិកបន្ទាប់ពីរកឃើញមានការឆ្លងកូវីដ-១៩ ប្រភេទថ្មី នៅក្នុងរដ្ឋផ្លរីដា។ វិធានការថ្មី នឹងចាប់ផ្តើមអនុវត្តនៅថ្ងៃទី៣ ខែមករាទៅ។
បើតាមទីភ្នាក់ព័ត៌មាន Reuters អ្នកនាំពាក្យរបស់ប្រធានាធិបតីហ្វីលីពីនលោក Harry Roque បាននិយាយនៅក្នុងសេចក្តីថ្លែងការណ៍មួយថា ហ្វីលីពីននឹងហាមឃាត់ការធ្វើដំណើររបស់ភ្ញៀវទេសចរបរទេសពីអាមេរិកចាប់ពីថ្ងៃទី៣ ខែមករា រហូតដល់ថ្ងៃទី១៥ ខែមករា។ អ្នកដំណើរដែលមានប្រវត្តិទៅកាន់អាមេរិករយៈពេល១៤ថ្ងៃចុងក្រោយ ក៏ជាប់ឈ្មោះក្នុងបញ្ជីហាមឃាត់ដែរ។
វិធានការខាងលើ ជាពង្រីកការរឹតត្បិតការធ្វើដំណើរដែលរដ្ឋាភិបាលទីក្រុងម៉ានីលបានប្រកាសនៅថ្ងៃទី២៩ ខែធ្នូ កន្លងទៅ។ ការរឹតត្បឹតដំបូង គ្របដណ្តប់លើអ្នកដំណើរមកពីប្រទេស និង តំបន់ចំនួន១៩ តែប៉ុណ្ណោះ ហើយចូលជាធរមានចាប់ពីពាក់កណ្តាលអធ្រាត្រនៃថ្ងៃទី ២៩ ខែធ្នូ។
ទោះជាយ៉ាងណា ការរឹតត្បិតនេះមិនរាប់បញ្ចូលជនជាតិហ្វីលីពីនដែលធ្វើដំណើរពីសហរដ្ឋអាមេរិកឡើយ ប៉ុន្តែបន្ទាប់ទៅដល់ហ្វីលីពីន ពួកគេក៏ត្រូវធ្វើចត្តាឡីស័កចំនួន១៤ថ្ងៃនៅកន្លែងរៀបចំដោយរដ្ឋាភិបាល។ អ្នកដំណើរពីអាមេរិកដែលទៅដល់ហ្វីលីពីនមុនថ្ងៃទី៣ ខែមករា ឆ្នាំនឹងត្រូវបានអនុញ្ញាតឱ្យចូលហ្វីលីពីន តែត្រូវធ្វើចត្តាឡីស័ក១៤ ថ្ងៃសិន ទោះបីជាពួកគេបានធ្វើតេស្តអវិជ្ជមានជំងឺកូវីដ-១៩ លើកដំបូងពេលទៅដល់ក៏ដោយ។
ថ្មីៗនេះ មន្ត្រីសុខាភិបាលរដ្ឋ Florida បានរកឃើញជំងឺកូវីដ-១៩ ទម្រង់ថ្មីដែលរកឃើញដំបូងនៅអង់គ្លេស។ Florida ជារដ្ឋទី ៣ របស់អាមេរិករកឃើញករណីនេះ។ ទម្រង់ប្រភេទថ្មី មិនទាន់ត្រូវបានរកឃើញនៅក្នុងហ្វីលីពីននោះដែរ។
គិតមកដល់ពេលនេះ អ្នកឆ្លងកូវីដ-១៩ នៅហ្វីលីពីន មានច្រើនជាង៤៧ម៉ឺននាក់ និងមានអ្នកស្លាប់ជាង៩ពាន់នាក់៕
© រក្សាសិទ្ធិដោយ thmeythmey.com