ក្រសួងទេសចរណ៍ផ្តល់វគ្គបណ្ដុះបណ្ដាលភាសាចិនតាមអនឡាញដោយឥតគិតថ្លៃ

ជាតិ

ក្រសួងទេសចរណ៍ផ្តល់វគ្គបណ្ដុះបណ្ដាលភាសាចិនតាមអនឡាញដោយឥតគិតថ្លៃ

03, Jan 2021 , 7:59 am

រូបភាព

ដោយ: ថ្មីៗ

ដោយ៖ ស៊ុល រ៉វី

ក្រសួងទេសចរណ៍ ត្រៀមបើកវគ្គបណ្ដុះបណ្ដាលភាសាចិនកម្រិតមូលដ្ឋាន ក្នុងវិស័យទេសចរណ៍ដោយឥតបង់ថ្លៃ។ វគ្គបណ្តុះបណ្តាលនេះ នឹងប្រព្រឹត្តទៅតាមប្រព័ន្ធអនឡាញ ដោយគ្រោងចាប់ផ្ដើមពីថ្ងៃទី៤ ខែមករា ឆ្នាំ២០២១ ខាងមុខ។ នេះបើតាមការចេញផ្សាយរបស់ក្រសួងទេសចរណ៍។

វគ្គបណ្ដុះបណ្ដាលភាសាចិននេះ ក្រោមកិច្ចសហប្រតិបត្តិការរវាងក្រសួងទេសចរណ៍ និងវិទ្យាស្ថានខុងជឺ នៃរាជបណ្ឌិត្យសភាកម្ពុជា (CIRAC) ក្នុងបំណងចូលរួម និងលើកកម្ពស់ការអភិវឌ្ឍន៍ធនធានមនុស្ស ក្នុងវិស័យទេសចរណ៍ ជាពិសេសផ្ដល់នូវជំនាញភាសាចិន សម្រាប់បុគ្គលិកបម្រើការងារក្នុងវិស័យទេសចរណ៍ យុវជន សិស្ស និស្សិត និងសាធារណជនដែលមានបំណងអភិវឌ្ឍសមត្តភាព។

តាមការបញ្ជាក់របស់ក្រសួង វគ្គបណ្ដុះបណ្ដាលនេះ ធ្វើឡើងស្របតាមស្ដង់ដារ ព្រមទាំងមានការបង្រៀនដោយគ្រូបរទេស ដែលមានបទពិសោធន៍ច្រើនឆ្នាំទៀតផង។ សិក្ខាកាមដែលបានសិក្សាជា ប់ក្នងការវាយតម្លៃបញ្ចប់វគ្គសិក្សា នឹងទទួលបានវិញ្ញាបនបត្របញ្ចប់ការសិក្សា ដែលទទួលស្គាល់ដោយក្រសួងទេសចរណ៍ និងវិទ្យាស្ថានខុងជឺនៃរាជ្យបណ្ឌិត្យសភាកម្ពុជា។

ទន្ទឹមនឹងនេះដែរ នាយកដ្ឋានបណ្ដុះបណ្ដាលជំនាញវិជ្ជាជីវៈទេសចរណ៍ នៅតែបន្តបើកវគ្គបណ្ដុះបណ្ដាល ជំនាញទេសចរណ៍ និងវគ្គបណ្ដុះបណ្ដាលជំនាញថ្មីៗ តាមប្រព័ន្ធអនឡាញ ផងដែរ ហើយដែលជាឱកាសល្អសម្រាប់បុគ្គលិកបម្រើការងារក្នុងវិស័យទេសចរណ៍ដែលមានបំណង ឬខកខានពុំបានចុះឈ្មោះចូលរៀន។

សម្រាប់យុវជន សិស្ស និស្សិត និងសាធារណជន ដែលមានចំណាប់អារម្មណ៍ក្នុងវគ្គបណ្ដុះបណ្ដាលនេះ លោក អ្នកនាង អាចចុះឈ្មោះចូលរៀនបាន តាមគេហទំព័រ https://www.tptd.org ឬទំនាក់ទំនងសាកសួរព័ត៌មានបន្ថែម តាមរយៈលេខទូរស័ព្ទ ០១២ ២៧៨ ៥៥២ និង ០៧៨ ៨៩៩ ៩១៩៕