អ្នកជំនាញ ពន្យល់ពីវេលាយប់វែងជាងថ្ងៃ និងថ្ងៃវែងជាងយប់ រួមទាំងអាថ៌កំបាំងចម្លាក់នៅអង្គរវត្ត

ជាតិ

អ្នកជំនាញ ពន្យល់ពីវេលាយប់វែងជាងថ្ងៃ និងថ្ងៃវែងជាងយប់ រួមទាំងអាថ៌កំបាំងចម្លាក់នៅអង្គរវត្ត

03, Jan 2021 , 9:59 am

រូបភាព

រូបភាព៖ លោក លឹម ប៊ុនហុង

ដោយ: អុីសា រ៉ហានី (Isa Rohany)

សៀមរាប៖ លោកអ្នកប្រហែលជាធ្លាប់បានដឹងហើយ នូវព្រឹត្តិការណ៍ព្រះអាទិត្យរះចំប្រាង្គកណ្ដាលប្រាសាទអង្គរវត្ត ដែលកើត២ដងក្នុង១ឆ្នាំ គឺអំឡុងខែ មីនា និងខែកញ្ញា។ ក្រៅពីព្រឹត្តិការណ៍សំខាន់នេះ គឺនៅមានព្រឹត្តិការណ៍២ដងទៀត ដែលគេត្រូវសង្កេត នោះគឺវេលាយប់វែងជាងថ្ងៃ និងវេលាថ្ងៃវែងជាងយប់។ ព្រឹត្តិការណ៍នេះ បានបង្ហាញនូវអាថ៌កំបាំងលើផ្ទាំងចម្លាក់នៅតាមថែវនៅទិសខាងកើត និងថែវខាងលិច គឺរវាងពេលថ្ងៃរះ និងពេលថ្ងៃលិច។

សូមទស្សនាវីដេអូពន្យល់របស់លោក អ៊ឹម សុខរិទ្ធី ក្នុងកិច្ចសម្ភាសជាមួយអ្នកស្រី អ៊ីសា រ៉ហានី៖

អ្នកស្រាវជ្រាវ និងបុរាណវិទូ លោក អ៊ឹម សុខរិទ្ធី បានព្យាយាមពន្យល់លើរឿងរ៉ាវព្រឹត្តិការណ៍យប់វែងជាងថ្ងៃ ជាមួយនឹងអាថ៌កំបាំងតាមចម្លាក់នៅថែវខាងកើត និងខាងលិច ប្រាសាទអង្គរវត្ត។ លោក មានប្រសាសន៍ថា ចម្លាក់ទាំងនោះ សុទ្ធសឹងត្រូវបានគិតគូរយ៉ាងច្បាស់ និងចំទីតាំងដែលបានរៀបចំឡើង ដោយអ្នកប្រាជ្ញជំនាន់មុន។ លោកបន្ថែមថា ដោយសារតម្លៃនៃអង្គរថ្កុំថ្កើងពេក ទើបធ្វើឱ្យមានការរំលងឬមិនសូវចាប់អារម្មណ៍ជាមួយព្រឹត្តិការណ៍ដ៏អស្ចារ្យមួយនេះ។

អាថ៌កំបាំងដែលលោក អ៊ឹម សុខរិទ្ធី ចង់ប្រាប់នៅពេលនេះ គឺពន្លឺនៃថ្ងៃរះនៅពេលព្រឹក និងពន្លឺថ្ងៃលិចនាពេលរសៀល ដែលចាំងជះលើផ្ទាំងចម្លាក់ប្រាសាទទាំង២ទិស (កើត-លិច) និងកំណត់រូបភាពដ៏ជាក់លាក់មួយ។ ពន្លឺថ្ងៃនឹងចាំងចំរូបសភាវៈអាក្រក់ និងស្រមោលនៃសសរតាមថែវប្រាសាទ បាំងបិទរូបចម្លាក់លើតួអង្គសភាវៈល្អក្នុងរឿងនីមួយៗ។ ហើយហេតុការណ៍នេះ នឹងផ្ទុយមកវិញនៅវេលាថ្ងៃវែងជាងយប់ នាខែមិថុនា។

លោក អ៊ឹម សុខរិទ្ធី ពន្យល់ដូច្នេះថា៖«វេលាថ្ងៃ ២១ ធ្នូ ពិភពលោកដឹងឮទូទៅ នៅប៉ូលខាងយើង គឺពេលវេលាយប់វែងជាងថ្ងៃ រឿងនេះចំពោះអារ្យធម៌នៅស្រុកទេសគេឯងធម្មតា តែចំពោះអង្គរវត្តមានលក្ខណៈពិសេស គឺអាថ៌កំបាំងចំពោះការរៀបចំ ការតាក់តែងរឿងរ៉ាវផ្សេងៗនៅលើថែវខាងកើតនិងលិច គឺមានលក្ខណៈពិសេសជាងប្រាសាទដទៃទៀតនៅស្រុកខ្មែរ និងលើសាកលលោក»។

រូបភាព៖ លោក លឹម ប៊ុនហុង

អ្នកជំនាញផ្នែកបុរាណវិទ្យារូបនេះ បន្ថែមទៀតថា៖«ការទស្សនា ការមើល មានតម្លៃតាមវេលានីមួយៗ។ ករណីនៅថ្ងៃទី២១ ធ្នូ យប់វែងជាងថ្ងៃ តាមទំនៀមនៃសាសនាហិណ្ឌូ ព្រហ្មញ្ញសាសនា គឺជាពេលមិនល្អ ជាពេលស្លាប់ ពុំមានសណ្ដាប់ធ្នាប់ ពេលថ្ងៃជាពេលរស់ មានជីវិត ពន្លឺ ជោគជ័យ។ ដូច្នេះ អាថ៌កំបាំងនៅអង្គរវត្ត ពេលយប់វែងជាងថ្ងៃ គឺសភាវៈអាក្រក់ មានអំណាចខ្លាំងខ្ពស់ក្នុងកាលមួយ ដែលចម្លាក់នៅអង្គរវត្ត ឃើញថាទាំងពេលព្រឹករសៀល គឺពន្លឺចាំងទៅលើរូបនៃពួកអាក្រក់ (យក្ស) ហើយរូបរបស់ទេព ជាដើម ត្រូវមានបាំងដោយសសរ គឺគ្រប់រូបទេពសំខាន់ៗពន្លឺចាំងមិនដល់។ ទាំង២ថែវខាងកើតនិងលិច។ រឿងអស់នេះ នឹងផ្ទុយទៅវិញនៅខែមិថុនា»។

រូបភាព៖ លោក លឹម ប៊ុនហុង

យ៉ាងណា ដោយសារមានដើមឈើដុះបាំងខ្លះ ធ្វើឱ្យព្រឹត្ដិការណ៍ប្រចាំឆ្នាំនេះ មិនដូចកាលពេលទើបសាងសង់ប្រាសាទទាំងស្រុងទេ តែវាក៏ស្ថិតក្នុងដំណើរដូចគ្នានៅពេលនោះដែរ។ សម្រាប់បុរាណវិទូ លោក អ៊ឹម សុខរិទ្ធី តម្លៃរបស់អង្គរវត្ត ដែលមិនត្រឹមតែមានភាពស្កឹមស្កៃ និងសម្រស់ដែលមនុស្សមានការចាប់អារម្មណ៍ប៉ុណ្ណោះទេ តែព្រឹត្តិការណ៍ខាងលើនេះ ក៏សំខាន់ដែលគេត្រូវមើលផងដែរ៕