ជាតិ
តារាចម្រៀង អ៊ាម វន្នី រួមចំណែកផ្សព្វផ្សាយទេសចរណ៍តាមរយៈបទ «សម្រស់បុប្ផាពោធិ៍សាត់»
×
ដោយ៖ ហុង ស្រីណា
ភ្នំពេញ៖ លោក អ៊ាម វន្នី តារាចម្រៀងសំនៀងផ្អែម និងជាអ្នកនិពន្ធម្នាក់ បាននិពន្ធចម្រៀងមួយបទ រៀបរាប់ពីតំបន់សក្តានុពលទេសចរណ៍ដ៏ល្អអស្ចារ្យក្នុងខេត្តពោធិ៍សាត់។ ចម្រៀងមានចំណងជើងថា «សម្រស់បុប្ផាពោធិ៍សាត់» ដោយលោកបានរៀបរាប់ថា៖«ខ្ញុំពិតជារំភើបដែលបាននិពន្ធ និងច្រៀងចម្រៀងមួយបទនេះ ពីព្រោះវាបានរៀបរាប់ពីតំបន់ទេសចរណ៍ជាច្រើនកន្លែងក្នុងខេត្តពោធិ៍សាត់។ នេះជាបទចម្រៀងទីមួយ ដែលខ្ញុំដាក់អារម្មណ៍ច្រៀង ហើយនឹកស្រមៃដល់សម្រស់ធម្មជាតិ រួមទាំងច្រៀងតែមួយដង»។
បទសម្រស់បុប្ផាពោធិ៍សាត់ មានរយៈពេលជាង៥នាទី ដោយលោក អ៊ាម វន្នី ផ្តើមរៀបរាប់សម្រស់ធម្មជាតិ ដ៏អាថ៌កំបាំងនៅទឹកដីពោធិ៍សាត់ បន្តទៅតំបន់កំពង់លួង ដែលមានពលរដ្ឋរាប់ពាន់នាក់កំពុងអាស្រ័យផលពីផ្នែកមួយនៃបឹងទន្លេសាប។ ចេញពីកំពង់លួង អ្នកនិពន្ធ អ៊ាម វន្នី បានរៀបរាប់ពីវត្តបាកាន ដែលជាទីកំណើតនៃខេត្តពោធិ៍សាត់ ហើយបន្តទៅរាយរ៉ាប់សម្រស់នៅជំរំសត្វស្លាបបឹងព្រះពន្លៃដែលស្ថិតនៅស្រុកតាលោសែនជ័យ ដោយហួសទៅតំបន់អូរសោម។
អ្នកចម្រៀងរូបនេះ ក៏មិនភ្លេចផ្លូវថ្មីដែលល្បីល្បាញនៅខេត្តពោធិ៍សាត់នេះដែរ នោះគឺផ្លូវជាតិលេខ៥៥កម្ពស់១៥០០ម៉ែត្រ ត្រង់ចំណុចអន្លង់អាំង ដែលស្ថិតក្នុងស្រុកវាលវែងដដែលនោះ។ សម្រាប់លោក អ៊ាម វន្នី នៅមានទីទេសចរណ៍ដ៏ល្អអស្ចារ្យជាច្រើនកន្លែង ដែលអ្នកនិពន្ធរូបនេះ មិនអាចរៀបរាប់អស់នៅក្នុងចម្រៀងមួយបទនេះ៕
Tag:
Thmeythmey25
ចម្រៀងអំពីខេត្តពោធិ៍សាត់
អ៊ាម វន្នី
© រក្សាសិទ្ធិដោយ thmeythmey.com