លោក កប វុទ្ធី មាន​ទីផ្សារ​ខ្ពស់​លើ​គំនូរ​ឌីជីថល​លើ​ជញ្ជាំង និង​ក្រាហ្វិក​ឌី​ហ្សា​ញ​
ជាតិ
លោក កប វុទ្ធី មាន​ទីផ្សារ​ខ្ពស់​លើ​គំនូរ​ឌីជីថល​លើ​ជញ្ជាំង និង​ក្រាហ្វិក​ឌី​ហ្សា​ញ​
02, Jan 2021 , 9:29 pm        
រូបភាព
គំនូរឌីជីថលគូរលើ​ជញ្ជាំង( រូប​ផ្ដល់​ឱ្យ​)
គំនូរឌីជីថលគូរលើ​ជញ្ជាំង( រូប​ផ្ដល់​ឱ្យ​)
​ភ្នំពេញ​៖ ជា​អតីត​និស្សិត​ផ្នែក​វិចិត្រកម្ម និង​ក្រាហ្វិក​ឌី​ហ្សា​ញ នៅ​សកល​វិទ្យាល័យ​ភូមិន្ទ​វិចិត្រសិល្បៈ​លោក កប វុទ្ធី កំពុងមាន​ទីផ្សារ​ខ្ពស់​លើ​គំនូរ​ឌីជីថល ដែល​គូរ​លើ​ជញ្ជាំង និង​មុខ​ជំនួញ​ក្រាហ្វិក​ឌី​ហ្សា​ញ​។ មាន​វ័យ​២៨​ឆ្នាំ លោក វុទ្ធី ថា​ពេលខ្លះ​លោក​បង្ខំចិត្ត​មិន​ទទួល​ការងារ​គំនូរ​លើ​ជញ្ជាំង ព្រោះ​ការងារ​ក្នុង​ដៃ​សល់​ច្រើន​។​



​មាន​ស្រុកកំណើត​នៅ​ខេត្តតាកែវ លោក កប វុទ្ធី បច្ចុប្បន្ន​ជា​សហ​ស្ថាបនិក​ក្រុមហ៊ុន​ឌី​ហ្សា​ញ​មួយ និង​មាន​ក្រុម​គំនូរ​រួមទាំង​ក្រុម​ឌី​ហ្សា​ញ​មួយក្រុម​ផ្សេងទៀត​ផ្ទាល់ខ្លួន​។ ដោយសារតែ​គុណភាព​ទឹកដៃ ផ្នែក​គំនូរ​ឌីជីថល​លើ​ជញ្ជាំង​មាន​ភាពល្អ​វិចិត្រ ធ្វើឱ្យ​ការងារ​របស់លោក វុទ្ធី មាន​ទីផ្សារ​ច្រើន​គួរសម​។ តែ​ទោះជា​យ៉ាងណា វិចិត្រករ​រូបនេះ ក៏​មិន​ហ៊ាន​ទទួល​ការងារ​គំនូរ​លើ​ជញ្ជាំង​ច្រើន​ឡើយ ព្រោះ​មិនមាន​កម្លាំង​ធ្វើ​គ្រប់គ្រាន់​។


លោក កប វុទ្ធី ពាក់​អាវ​ពណ៌​ទឹក​ដោះគោឈរ​ខាង​មុខ ក្នុង​ពេល​ទទួល​សញ្ញាបត្រ​ថ្នាក់​បរិញ្ញាបត្រ (រូប​ផ្ដល់​ឱ្យ​) 

​គំនូរ​ឌីជីថល​គូ​រលើ​ជញ្ជាំង មាន​ទាំង​គំនូរ​បុរាណ និង​គំនូរ​សម័យ​លាយ​ចម្រុះ​គ្នា ហើយ​លោក កប វុទ្ធី ទទួល​គូរ​ភាគច្រើន​ឱ្យ​ផ្ទះសំណាក់ សណ្ឋាគារ និង​ហាង​កាហ្វេ​ជាដើម​។ 
 
​ដ្បិតតែ​ការងារ​គំនូរ​ឌីជីថល​គូ​រលើ​ជញ្ជាំង មាន​ទីផ្សារ​ច្រើន ទទួលបាន​ចំណូល​ក៏​គួរសម​ក៏ពិតមែន ប៉ុន្តែ​ការងារ​នេះ​ក៏​ត្រូវការ​ចំណាយពេល​គូរ​យូរថ្ងៃ ជាពិសេស​ស្នាដៃ​ត្រូវតែមាន​ភាពល្អ​វិចិត្រ ដោយ​ចៀសវាង​ការ​គូរ​ខុស​ហើយ​លុបចេញ​វិញ​។ កត្តា​នេះ ត្រូវ​ទាមទារ​គ្រូ ឬ​វិចិត្រករ​មាន​ទឹកដៃ​ខ្ពស់​។ 
 
​ខណៈពេល​ទីផ្សារ​គំនូរ​ឌីជីថល​គូ​រលើ​ជញ្ជាំង​កំពុង​មមាញឹក ការងារ​ក្រាហ្វិក​ឌី​ហ្សា​ញ​របស់លោក កប វិ​ទ្ធី ក៏​ប្រញឹក​ខ្លាំង​ណាស់ដែរ​។ ដោយសារ​ការងារ​ក្រាហ្វិក​ឌី​ហ្សា​ញ ត្រូវការ​ចំណាយពេល​តិចជាង និង​ងាយស្រួល​គ្រប់គ្រង​ដំណើរការ​ការងារ​ជាង លោក វុទ្ធី សុខចិត្ត​ចោលការ​ងារ​គំនូរ​លើ​ជញ្ជាំង​ខ្លះ​។ 


 គំនូរ​ជា​ក្រាហ្វិកឌីហ្សាញ (រូប​ផ្ដល់​ឱ្យ​) 

«​ផ្នែក​គំនូរ​ឌីជីថល​ដែល​គូ​រលើ​ជញ្ជាំង មួយរយៈ​ពេល​ចុង​ក្រោយនេះ ខ្ញុំ​មិនសូវ​ទទួល​គូរ​ទេ ព្រោះ​កូ​វីដ​១៩ ខ្ញុំ​អត់​ហ៊ាន​ចេញទៅ​ក្រៅ ម្យ៉ាង​ការងារ​ក្រាហ្វិក​ឌី​ហ្សា​ញ​របស់ខ្ញុំ​ក៏​មមាញឹក​ខ្លាំង​ដែរ​។ ខ្ញុំ​ចង់​ចាប់​ខាង​ក្រាហ្វិក​ឌី​ហ្សា​ញ​សិន​។ គំនូរ​ក្នុង​មួយ​ផ្ទាំង​ទំហំ​ពី​៥​ទៅ​៦​ម៉ែត្រ បាន​តម្លៃ​ពី​១​ទៅ​២​ពាន់​ដុល្លារ ប៉ុន្តែ​យើង​ក៏ត្រូវ​ការ​ពេល​គូរ​យូរ​ដែរ​។ គំនូរ​ខ្លះ​យើង​គូរ​កន្លះ​ខែ ឬមួយ​ខែ​ទើប​ហើយក៏​មាន​។ អ្នកខ្លះ​គាត់​មាន​គំរូ​ឱ្យ​យើង​ស្រាប់ តែ​អ្នកខ្លះ​គាត់​ប្រាប់​ពី​គំនិត​របស់គាត់​មក​យើង បន្ទាប់មក​ខ្ញុំ​ត្រូវយក​វា​ទៅ​ឌី​ហ្សា​ញ​ក្នុង​កំ​ព្យូ​ទ័​រ​សិន រួច​ទើប​យក​ឱ្យគេ​មើល បើ​គេ​ពេញចិត្ត​នោះ​ទើប​យើង​ចាប់ផ្ដើម​គូរ​។ ប៉ុន្តែ​អ្នកខ្លះ​ទៀត គាត់​ឱ្យ​យើង​គូរ​យ៉ាងម៉េច​ក៏បាន​ឱ្យតែ​ស្អាត គាត់​គ្រាន់តែ​ប្រាប់ថា​ហាង​គាត់​ជា​ហាង​កាហ្វេ ឬ​ហាង​មី​ហឹរ អី​ជាដើម ប្រភេទ​នេះ​យើង​ស្រួល​គូរ​ជាងគេ​។ គំនូរ​លើ​ក្រដាស​ក៏​ខ្ញុំ​គូរ​ដែរ ប៉ុន្តែ​ខ្ញុំ​គូរ​តិចតួច​ណាស់ ព្រោះ​ខ្ញុំ​អត់​មាន​ពេល​»​។ 
 
​បាន​ក្លាយជា​គ្រូ​គំនូរ​ស្ម័គ្រចិត្ត​តាំងពី​នៅ​រៀន​ថ្នាក់​ទី​៨ បង្រៀន​ក្មេង​តូចៗ​នៅក្នុង​អង្គការ​មួយ លោក កប វុទ្ធី បាន​ដើរ​លើ​វិថី​គំនូរ​ប្រមាណ​១៥​ឆ្នាំ​មកហើយ​។ កាល​រៀន​ថ្នាក់​ទី​១២ វុទ្ធី ក៏បាន​ទៅ​បង្រៀន​គំនូរ​ដល់​ជនបរទេស​សម្រាប់​ការងារ​ក្រៅ​ម៉ោង​ផងដែរ​។ ចាប់ផ្ដើម​បើក​អាជីវកម្ម​គំនូរ​ឌីជីថល​លើ​ជញ្ជាំង​តាំងពី​រៀន​បរិញ្ញាបត្រ​ឆ្នាំ​ទី​២ វុទ្ធី បច្ចុប្បន្ន​មាន​ក្រុមការងារ​៥​នាក់ សម្រាប់​អាជីវកម្ម​ផ្ទា​ក់​ខ្លួន​។ 


គំនូរឌីជីថលគូរ​លើ​ជញ្ជាំង(រូប​ផ្ដល់​ឱ្យ​) 

​នៅ​ថ្នាក់​បរិ​ញ្ញា​ឆ្នាំ​ទី​១​និង​ឆ្នាំ​ទី​២ វុទ្ធី ចាប់​ជំនាញ​វិចិត្រកម្ម ហើយ​ឆ្នាំ​ទី​៣​និង​ទី​៤ ចាប់​ខាង​ក្រាហ្វិក​ឌី​ហ្សា​ញ​បន្ថែម ព្រោះ​លោក​គិតថា ផ្នែក​គំនូរ​ខ្លួន​ចេះ​ច្រើន​ហើយ ដូច្នេះ​គួរតែ​បន្ថែម​ជំនាញ​មួយទៀត​។ ជា​លទ្ធផល បច្ចុប្បន្ន​លោក កប វុទ្ធី អាច​យក​ជំនាញ​ទាំងពីរ​នេះ ទៅ​បើក​អាជីវកម្ម​ដោយ​ខ្លួនឯង​។​
 
​ក្នុង​មួយខែ​លោក វុទ្ធី អាច​រកចំណូលបាន​ចន្លោះ​ពី​២​ពាន់​ដុល្លារ ទៅ​៦​ពាន់​ដុល្លារ នេះ​គិតតែ​ខាង​ឌី​ហ្សា​ញ​តែប៉ុណ្ណោះ​។ ធ្វើ​ស្លាក​យីហោ​(​ប្រេន​ឌី​ង​) មួយ បាន​តម្លៃ​ប្រហែល​៤​រយ​ទៅ​៥​រយ​ដុល្លារ​អាមេរិក​។ ការងារ​ឌី​ហ្សា​ញ ធ្វើ​លឿន​ជាងគំនូរ​លើ​ជញ្ជាំង ដូច្នេះ​ចំណូល​ចូល​ច្រើន​ឬ​តិច អាស្រ័យ​ទៅតាម​ចំនួន​ការងារ​ដែល​សម្រេចបាន​។​
 
​បើតាម​លោក កប វុទ្ធី មុខ​ជំនួញ​របស់ខ្លួន​អាច​និយាយបានថា ជោគជ័យ​បាន​៥០​ភាគរយ​ហើយ ហើយ​លោក​បន្ថែម​ដូច្នេះ​៖«​ដំបូង​ឡើយ ពេល​មាន​គេ​ត្រូវការ​អ្នក​គំនូរ​គូ​រលើ​ជញ្ជាំង លោកគ្រូ​របស់ខ្ញុំ គាត់​ក៏បាន​ណែនាំ​ខ្ញុំ​ទៅកាន់​គេ ហើយ​ដោយសារ​ទឹកដៃ​គេ​ក៏​ប្រាប់​ពី​ម្នាក់​ទៅ​ម្នាក់ទៀត​។ បច្ចុប្បន្ន​ខ្ញុំ​ចង់​ធ្វើ​ខាង​ឌី​ហ្សា​ញ​ច្រើនជាង ហើយ​ខ្ញុំ​ក៏បាន​ឱ្យ​សិស្ស​ប្អូន​ទៅ​ហាត់​ការ​ដែរ​។ ខាង​ឌី​ហ្សា​ញ​ងាយ​ស្រួយ​គ្រប់គ្រង​ការងារ​។ គំនូរ​លើ​ជញ្ជាំង យើង​ត្រូវការ​អ្នកមាន​ជំនាញ និង​មាន​ទឹកដៃ​ខ្ពស់ ព្រោះ​បើ​យើង​គូរ​ហើយ​ខុស ត្រូវ​លុបចេញ​ខាត​ពេល ហើយ​ខ្ញុំ​អត់​មាន​ពេល​ទៅ​មើល​ពួកគេ​ទេ​»​។ 


គំនូរ​សម្រាប់​ក្រាហ្វិកឌីហ្សាញ ប៉ុន្តែ​គូរ​ព្រាង​ដោយ​ដៃ​លើ​ក្រដាសជា​មុនសិន (រូប​ផ្ដល់​ឱ្យ​) 

​ជា​គម្រោង​ទៅ​ថ្ងៃ​អនាគត លោក កប វុទ្ធី ចង់​បង្កើត​ក្រុម​ឌី​ហ្សា​ញ​ឱ្យ​ធំ​ជាង​នេះ និង​បង្កើត​ក្រុមការងារ​ផ្នែក​គំនូរ​ឌីជីថល​គូរ​លើ​ជ​ញ្ជាំ​ឱ្យបាន​កាន់តែ​រឹងមាំ​។ លោក​ក៏មាន​បំណង​ចង់​ជួយ​សិស្ស​ប្អូន​ផ្នែក​គំនូរ ឱ្យមាន​ការងារ​ធ្វើ​ដែរ​។ ទោះជា​យ៉ាងណា លោក វុទ្ធី ក៏​បញ្ជាក់ដែរថា ការ​រើស​សិស្ស​ប្អូន​ឱ្យធ្វើ​ការ​ក្នុង​ក្រុម​របស់លោក ដែល​ត្រូវ​ប្រព្រឹត្តិ​ទៅ​ប្រមាណ​៣​ឆ្នាំ​ខាងមុខ​នោះ ក៏ត្រូវ​ការ​អ្នក​ដែលមាន​ទេពកោសល្យ​ខ្ពស់ និង​មាន​ទឹកដៃ​ល្អ​ផងដែរ​៕

 វិចិត្រករ​កំពុង​គូរគំនូរ​ហនុមាន បែប​ឌីជីថលលើ​ជញ្ជាំង (រូប​ផ្ដល់​ឱ្យ)


Tag:
 គំនូរ​
  គំនូរ​លើ​ជញ្ជាំង​
 ​ក្រាហ្វិក​ឌី​ហ្សា​ញ​
  សិល្បៈ​
© រក្សាសិទ្ធិដោយ thmeythmey.com