លោក ញឿក ភារម្យ កំពុងផ្គត់ផ្គង់ចង្រិត ៥០០គីឡូក្រាមលើទីផ្សាររៀងរាល់ថ្ងៃ

ជាតិ

លោក ញឿក ភារម្យ កំពុងផ្គត់ផ្គង់ចង្រិត ៥០០គីឡូក្រាមលើទីផ្សាររៀងរាល់ថ្ងៃ

03, Jan 2021 , 11:59 am

រូបភាព

ដោយ:

ក្នុងខេត្តតាកែវ មួយថ្ងៃអាចផ្គត់ផ្គង់ចង្រិត

លោក ញឿក ភារម្យ ជាអ្នកចិញ្ចឹមសត្វចង្រិត និងជាអ្នកផ្គត់ផ្គង់ចង្រិតប្រចាំខេត្តតាកែវ។ រយៈពេលប្រមាណ១០ឆ្នាំហើយ ដែលបុរសវ័យ៣១ឆ្នាំរូបនេះ ចាប់យករបរមួយនេះ។ បច្ចុប្បន្ន កសិដ្ឋានចិញ្ចឹមចង្រិតរបស់លោក ភារម្យមានទីតាំងនៅភូមិត្រពាំងឬស្សី ឃុំបារាយណ៍ ស្រុកដូនកែវ ខេត្តតាកែវ អាចផ្គត់ផ្គង់ចង្រិត ប្រមាណ៥០០គីឡូក្រាមក្នុងមួយថ្ងៃ ទៅកាន់ទីផ្សារខេត្តតាកែវ ភ្នំពេញ កំពង់ចាម និងខេត្តព្រៃវែង។ លោក ញឿក ភារម្យ បានប្រាប់សារព័ត៌មាន ThmeyThmey25 ថា លោកអាចទទួលបានប្រាក់ចំណេញពីការចិញ្ចឹមចង្រិត ពី ១ពាន់ដុល្លារ ទៅ ២ពាន់ដុល្លារ ក្នុងមួយខែ។

មានវ័យ ៣១ឆ្នាំ លោក ញឿក ភារម្យ បានប្រាប់សារព័ត៌មានThmeyThmey25 តាមទូរសព្ទថា លោកចេះរៀបចិញ្ចឹមចង្រិតនេះ តាមយូធូប ដោយមិនធ្លាប់រៀនជំនាញកសិកម្ម ពីមុននោះទេ។ លោកថា៖«ដំបូង បើក យូធូប ឃើញគេបង្រៀន ពីបច្ចេកទេស ចិញ្ចឹមចង្រិត ហើយចាប់អារម្មណ៍ ក៏សម្រេចទិញពូជចង្រិតពីប្រទេសថៃ មកចិញ្ចឹមសាក»។ លោកបន្តថា សាកចិញ្ចឹមដំបូង ត្រឹមមួយអាងទេ ក្រោយមកឃើញថាការចិញ្ចឹមទទួលបានលទ្ធផលល្អ ក៏សម្រេច ចិញ្ចឹមចង្រិតនៅដើមឆ្នាំ២០១០ និងពង្រីកការចិញ្ចឹមមកដល់បច្ចុប្បន្ន ដែលមានអាងចិញ្ចឹមរហូត ៤០០អាង ទៅ ៥០០អាង។

កន្លែងចិញ្ចឹមចង្រិត របស់លោក ញឿក ភារម្យ (រូបភាពផ្ដល់ឲ្យ)

មានបទពិសោធន៍ចិញ្ចឹមចង្រិត រយៈពេល ១០ឆ្នាំ លោក ញឿក ភារម្យ ក៏ធ្លាប់មានឧបសគ្គ ខ្លះៗដែរ ដូចជាបញ្ហាទីផ្សារ និងមានការជំទាស់ ពីក្រុមគ្រួសារ ជាដើម។ លោកបានប្រាប់យ៉ាងដូច្នេះ៖«ចិញ្ចឹមដំបូង បានផលមែន តែពិបាកលក់ ព្រោះមិនទាន់ចេះ ធ្វើទីផ្សារ។ ម្យ៉ាងទៀត អ្នកផ្ទះ(ប៉ាម៉ាក់) រួមទាំងអ្នកជិតខាង គាត់ជំទាស់ និងគិតថា របរ(ចិញ្ចឹមចង្រិត)នេះ គ្មានប្រយោជន៍ ព្រោះចិញ្ចឹមសត្វ(ចង្រិត) ដែលសម្បូរស្រាប់ក្នុងធម្មជាតិ»។

ដ្បិតមានអ្នកជំទាស់ ក្នុងការចិញ្ចឹមចង្រិត ពិតមែន តែលោក ញឿក ភារម្យ មិនព្រមបោះបង់នោះទេ ព្រោះរបរនេះ បានផ្ដល់ចំណូលឲ្យលោក ប្រសើរជាងការងារ ជាបុគ្គលិកក្រុមហ៊ុនឯកជនមួយ កាលដែលលោកមិនទាន់ចិញ្ចឹមចង្រិត។ ម្ចាស់កសិដ្ឋានចិញ្ចឹមចង្រិត ដែលមានទីតាំងនៅភូមិត្រពាំងឬស្សី ឃុំ បារាយណ៏ ស្រុកដូនកែវ ខេត្តតាកែវ បានប្រាប់ទៀតថា ការងារចិញ្ចឹមចង្រិត មានភាពងាយស្រួល ដែលអាចឲ្យលោក មានពេលទំនេរច្រើន និងអាចឲ្យលោកចាប់របរ ជាគ្រូបង្រៀនភាសាអង់គ្លេសថែមទៀត។ ហើយលោកអាចទទួលបាន ប្រាក់ចំណេញពីការចិញ្ចឹមចង្រិត ពី ១ពាន់ដុល្លារទៅ ២ពាន់ដុល្លារ ក្នុងមួយខែ។

រូបភាពផ្ដល់ដោយលោក ភារម្យ

ដើម្បីឲ្យទីផ្សារចង្រិត មានភាពទូលាយ លោក ញឿក ភារម្យ បានចងក្រងអ្នកចិញ្ចឹមចង្រិតប្រមាញ ១០០នាក់ ទូទាំងខេត្តតាកែវ ជាបណ្ដុំ និងបានផ្ដល់បច្ចេកទេសចិញ្ចឹមចង្រិត និងជាអ្នកទទួលទិញចង្រិតពីសមាជិកទាំងអស់ ក្នុងតម្លៃ ១០,០០០រៀល ក្នុងមួយគីឡូក្រាម និងលក់ចេញក្នុងតម្លៃ ១១,០០០រៀល ទៅ ១១,៥០០រៀល ក្នុងមួយគីឡូក្រាម។ រាជធានីភ្នំពេញ និងខេត្តតាកែវ ជាទីផ្សារធំ សម្រាប់នាំចេញចង្រិត ក្រៅពីនោះមាន ខេត្តព្រៃវែង កំពង់ចាម ជាដើម។

បច្ចុប្បន្ន លោក ញឿក ភារម្យ ចិញ្ចឹមចង្រិត ពីរប្រភេទ គឺចង្រិតខ្មៅ និងចង្រិតក្រហម។ សម្រាប់ចង្រិតខ្មៅ មានតម្លៃ ១១ ០០០រៀល ក្នុងមួយគីឡូ និងចង្រិតក្រហម តម្លៃ ១០ ០០០រៀល ក្នុងមួយគីឡូក្រាម។ ការចិញ្ចឹមចង្រិត មានរយៈពេល ៤៥ថ្ងៃ អាចលក់បាន។ ក្នុងមួយថ្ងៃត្រូវផ្ដល់ចំណី ដល់សត្វចង្រិតម្ដង ដោយសម្រាប់ចង្រិត មានអាយុត្រឹម ១៥ថ្ងៃ អាចផ្ដល់ចំណីសម្រេច ហើយសម្រាប់ចង្រិត មានអាយុចាប់ពី ១៥ថ្ងៃឡើងទៅ អាចប្រើជាចំណីស្រេច លាយចំណីធម្មជាតិ ដូចជា ត្រកួន ជាដើម៕