កសិករ គង់ វ៉ុង ថាការដាំក្នុងផ្ទះសំណាញ់ ចំណេញទាំងថវិកា ពលកម្ម និងបានទិន្នផលខ្ពស់

ជាតិ

កសិករ គង់ វ៉ុង ថាការដាំក្នុងផ្ទះសំណាញ់ ចំណេញទាំងថវិកា ពលកម្ម និងបានទិន្នផលខ្ពស់

03, Jan 2021 , 2:39 pm

រូបភាព

រូបភាពពីកម្មវិធីអាស្ប៉ាយ

ដោយ:

ភ្នំពេញ៖ លោក គង់ វ៉ុង បានចាប់ផ្តើមដាំបន្លែរយៈពេល៧ឆ្នាំហើយនៅហាលវាល ខណៈ២ឆ្នាំចុងក្រោយនេះ លោកបានប្តូរមកដាំបន្លែក្នុងផ្ទះសំណាញ់វិញ។ កសិករ គង់ វ៉ុង ថ្លែងប្រាប់សារព័ត៌មានThmeythmey25ថា មូលហេតុដែលលោកសម្រេចការដាំដុះបន្លែ ព្រោះការដាំបន្លែក្នុងផ្ទះសំណាញ់ ងាយគ្រប់គ្រង មិនចំណាយកម្លាំងពលកម្មច្រើន និងមិនសូវមានហានិភ័យដូចដាំតាមវាលស្រែ។ រីឯទិន្នផលក៏បានខ្ពស់ជាង។

កសិករ គង់ វ៉ុង ជាអ្នកដាំបន្លែមួយរូបនៅក្នុងភូមិចំប៉ា ឃុំចំប៉ា ស្រុកព្រៃកប្បាស ខេត្តតាកែវ។ មានវ័យ៥៦ឆ្នាំកសិកររូបនេះ ចាប់ផ្តើមដាំបន្លែរយៈពេល៧ឆ្នាំមកហើយ នៅលើផ្ទៃដីវាលប្រមាណ៣ហិកតា។ បន្លែដែលគាត់ដាំមាន ស្ពៃ, តាសក់ ,ត្រឡាច និងសាលាដជាដើម។

ប៉ុន្តែ២ឆ្នាំចុងក្រោយនេះ ពោលគឺចាប់ពីឆ្នាំ២០១៨មក លោក វ៉ុង បានប្តូរពីការបន្លែនៅហាលវាលស្រែនោះ មកដាំបន្លែនៅក្នុងផ្ទះសំណាញ់វិញ។ ដ្បិតតែមិនទាន់អាចដាំបានច្រើនដូចកាលដាំហាលវាលមែន ប៉ុន្តែកសិករចំណាស់រូបនេះ អះអាងថា បន្លែដែលដាំក្នុងផ្ទះសំណាញ់របស់លោកទទួលបានទិន្នផលខ្ពស់ និងបន្លែមានគុណភាពល្អជាង។ បន្លែទាំងនេះ ក៏ទទួលបានការគាំទ្រច្រើន ពីអ្នកបរិភោគផងដែរ។

បន្លែស្ពៃក្នុងផ្ទះសំណាញ់ របស់កសិករ គង់ វ៉ុង (រូបភាពពីកម្មវិធីអាស្ប៉ាយ)

លោក គង់ វ៉ុង ប្រាប់សារព័ត៌មានThmeyThmey25 តាមទូរសព្ទថា ការដាំបន្លែក្នុងផ្ទះសំណាញ់ ព្រោះងាយគ្រប់គ្រង មិនចំណាយកម្លាំងពលកម្មច្រើន និងមិនសូវមានហានិភ័យ ដូចដាំតាមវាលស្រែនោះទេ។ លោក វ៉ុង បន្ថែមដូច្នេះ៖«វាមានអត្ថប្រយោជន៍ច្រើន ព្រោះងា យគ្រប់គ្រង មិនចំណាយ កម្លាំងពលកម្មច្រើន និងមិនបារម្ភ ពីការបំផ្លាញ របស់សត្វពាហនៈ»។

ទោះជាមានវ័យកាន់តែចាស់ ប៉ុន្តែកសិករ គង់ វ៉ុង ប្រាប់សារព័ត៌មានThmeyThmey25ថា លោកពិតជាមិនទាន់បោះបង់របរកសិកម្មនោះទេ ព្រោះរបរនេះវាបានចិញ្ចឹមគ្រួសាររបស់ខ្លួនកន្លងមក និងធ្វើឲ្យជីវភាពគ្រួសាររបស់លោកធូរធារផងដែរ។

សូមជម្រាបថា ក្រៅពីផ្គត់ផ្គង់បន្លែនៅក្នុងមូលដ្ឋានខ្លួន បន្លែ ស្ពៃ តាសក់ ត្រឡាច និងសាលាដ ជាដើម របស់លោក គង់ វ៉ុង ក៏ត្រូវបានចែកចាយមួយចំនួន មកទីផ្សាររាជធានីភ្នំពេញដែរ៕