និស្សិតមួយក្រុម គ្រោងផលិតសាប៊ូលាងចានពីស្លឹក«គ» ដើម្បីបង្កើនផលិតផលក្នុងស្រុក

ជាតិ

សង្គមជាតិ

និស្សិតមួយក្រុម គ្រោងផលិតសាប៊ូលាងចានពីស្លឹក«គ» ដើម្បីបង្កើនផលិតផលក្នុងស្រុក

03, Jan 2021 , 7:29 pm

រូបភាព

ក្រុមនិស្សិតផ្នែកវិស្វកម្មជីវសាស្រ្តនៅសាកលវិទ្យាល័យភូមិន្ទភ្នំពេញ ដែលបានជាប់ជ័យលាភីលេខមួយក្នុងកម្មវិធី«អាជីវកម្មខ្ញុំ» ដែលរៀបចំឡើងដោយក្រសួងអប់រំ កាលពីថ្ងៃទី៦ ខែវិច្ឆិកា ឆ្នាំ២០២០

ដោយ:

ភ្នំពេញ៖ ក្រុមនិស្សិតផ្នែកវិស្វកម្មជីវសាស្ត្រនៅសកលវិទ្យាល័យភូមិន្ទភ្នំពេញចំនួន៦នាក់ បានទទួលជ័យលាភីលេខមួយក្នុងកម្មវិធី«អាជីវកម្មខ្ញុំ»ដែលរៀបចំឡើងដោយក្រសួងអប់រំ យុវជន និងកីឡាកាលពីថ្ងៃទី៦ ខែវិច្ឆិកា តាមរយៈសាកល្បងផលិតសាប៊ូលាងចានពីស្លឹកគ។ ស្ថិតនៅជានិស្សិតឆ្នាំទី៤ ពួកគេគ្រោងនឹងផលិតសាប៊ូលាងចានពីស្លឹកគ ដែលធានាបាននូវគុណភាព ដើម្បីបង្កើនផលិតផលក្នុងស្រុក។ គម្រោងនេះពួកគេនឹងអនុវត្តឡើង ក្រោយពីពួកគេបញ្ចប់ការសិក្សាថ្នាក់បរិញ្ញាបត្រ។

សូមតាមដានស្តាប់វីដេអូសម្ភាសរវាងកញ្ញា សៅ សុខអេង អ្នកសារព័ត៌មានថ្មីៗ និងកញ្ញា ខេង ឡាដា តំណាងក្រុមនិស្សិតវិស្វកម្មជីវសាស្ត្រនៅសកលវិទ្យាល័យភូមិន្ទភ្នំពេញ ដែលគ្រោងផលិតសាប៊ូលាងចានពីស្លឹកគនៅខាងក្រោមនេះ៖

កញ្ញា ខេង ឡាដា តំណាងសមាជិកក្រុមអ្នកផលិតសាប៊ូលាងចានពីស្លឹកគ បានបញ្ជាក់ថា បច្ចុប្បន្នក្រុមកញ្ញាមិនទាន់មានលទ្ធភាពផលិតសាប៊ូលាងចានពីស្លឹកគ សម្រាប់ចែកចាយលក់នៅទីផ្សារឡើយ ដោយសារតែខ្វះខាតដើមទុន រួមផ្សំនឹងមមាញឹកនឹងការសិក្សា ដែលនឹងត្រូវបញ្ចប់នៅឆ្នាំនេះផង។

ទោះបីមិនទាន់មានលទ្ធភាពផលិតសាប៊ូលាងចានពីស្លឹក«គ»បានក្តី ប៉ុន្តែក្រុមកញ្ញា ឡាដា ក៏នៅតែមិនបោះបង់ចោលនូវគំនិតច្នៃសាប៊ូលាងចានពីស្លឹកគនោះឡើយ។ ការណ៍មិនបោះបង់នូវគំនិតច្នៃសាប៊ូលាងចានពីស្លឹកគនេះ ដោយសារក្រុមរបស់កញ្ញាយល់ថា កម្ពុជាកំពុងតែខ្វះខាតផលិតផលខ្លួនឯងក្នុងស្រុក ។ ក្រុមកញ្ញា ប្ដេជ្ញាសម្រេចក្តីស្រមៃក្នុងការផលិតសាប៊ូលាងចានពីស្លឹក«គ» ក្រោយពីបញ្ចប់ជានិស្សិតឆ្នាំទី៤។

ក្រុមនិស្សិតផ្នែកវិស្វកម្មជីវសាស្រ្តនៅសាកលវិទ្យាល័យភូមិន្ទភ្នំពេញកំពុងឈរជុំគ្នានៅពីមុខផលិតផលរបស់ខ្លួនដែលដាក់បង្ហាញនៅលើតុមួយ

«ចំពោះគម្រោងនៅថ្ងៃអនាគត ពួកខ្ញុំនឹងផលិតសាប៊ូលាងចានពីស្លឹកគហ្នឹង។ តែដោយសារឥឡូវពួកខ្ញុំមិនទាន់មានពេលវេលាគ្រប់គ្រាន់ ណាមួយថវិការបស់ពួកខ្ញុំមានតិច។ អាជីវកម្មដែលក្រុមខ្ញុំគ្រោងនឹងបង្កើតហ្នឹង គឺជាគំនិតបែបថ្មី។ ពីព្រោះពីមុនមក គឺអត់ដែលមានគេយកស្លឹកគធ្វើជាសាប៊ូលាងចានទេ។ មួយទៀតវាអាចឆ្លើយតបនឹងការកង្វះខាតផលិតផល ដោយសារសាប៊ូលាងចានគឺភាគច្រើនយើងនាំចូលពីគេ។ នៅខ្មែរយើងអត់សូវមានអ្នកផលិតទេ»។ នេះជាការលើកឡើងរបស់កញ្ញា ខេង ឡាដា។

ផលិតផលសាប៊ូលាងចានពីស្លឹកគ ដែលក្រុមនិស្សិតសាកលវិទ្យាល័យភូមិន្ទភ្នំពេញបានផលិតសាកល្បង សម្រាប់ប្រកួតក្នុងកម្មវិធិ«អាជីវកម្មខ្ញុំ»ដែលរៀបចំឡើងដោយក្រសួងអប់រំ

តាមរយៈសិក្សាផ្នែកវិស្វកម្មជីវសាស្ត្រ និងមានបទពិសោធក្នុងការផលិតសាប៊ូលាងចានអស់រយៈពេលជិត៤ឆ្នាំមកហើយ ក្រុមរបស់កញ្ញា ឡាដា នឹងអាចផលិតសាប៊ូលាងចានដែលធានាបាននូវគុណភាពសម្រាប់លក់នៅទីផ្សារនៅថ្ងៃខាងមុខ។ «លក្ខណៈពិសេសរបស់វា គឺអាចលាងខ្លាញ់បាន។ សាប៊ូនេះយើងអាចប្រើប្រាស់ទឹកតិច អាចសំអាតចានបានស្អាតល្អ អត់មានក្លិនជាប់នៅចាន ឬជាប់ដៃយើងទេ»។ នេះជាការលើកឡើងរបស់កញ្ញាឡាដា ដែលគ្រោងលក់ក្នុងតម្លៃសមរម្យ។

ថ្វីបើផលិតផលមិនទាន់លេចចេញជារូបរាង ប៉ុន្តែជាជំហានដំបូងក្រុមរបស់កញ្ញាឡាដានឹងគ្រោងផលិតជាលក្ខណៈខ្នាតតូចសម្រាប់ចែកចាយនៅក្នុងស្រុក។ កញ្ញា ឡាដា បានបញ្ជាក់ថា បើកាលណាផលិតផលរបស់ខ្លួនទទួលបានការគាំទ្រច្រើនពីពលរដ្ឋ ក្រុមរបស់កញ្ញានឹងបន្តផលិតផលិតផលផ្សេងៗទៀតសម្រាប់ចែកចាយដល់ក្រៅប្រទេសទៀតផងដែរ៕

លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថតរូបជុំគ្នាជាមួយនឹងក្រុមនិស្សិតផ្នែកវិស្វកម្មជីវសាស្ត្រ បន្ទាប់ពីលោកបានប្រគល់រង្វាន់ដល់ក្រុមនិស្សិតទាំងនោះកាលពីថ្ងៃទី៦ ខែវិច្ឆិកា ឆ្នាំ២០២០