អន្តរជាតិ
បុរសជប៉ុនម្នាក់ ត្រូវចាប់ខ្លួនក្រោយចូលសំងំក្នុងរាជវាំងអធិរាជពីរម៉ោង
ច្រកចូលផ្នែកខាងផ្ទះទទួលភ្ញៀវបរទេសនៃរាជវាំង Akasaka ។ រូបភាព Visit Manato City
×![]()
ដោយ: តន ចាន់រិទ្ធារ៉ា
បុរសវ័យ២៩ឆ្នាំម្នាក់ ត្រូវបានចាប់ខ្លួនបន្ទាប់លួចចូលរាជវាំង Akasaka ក្នុងទីក្រុងតូក្យូ ដែលជារាជដំណាក់អធិរាជ ណារូហ៊ីតុ និងរាជវង្សឯទៀតអស់រយៈពេលពីរម៉ោង។ នេះបើតាមការផ្សាយរបស់សារព័ត៌មានក្នុងស្រុកជប៉ុន។
បើតាមបណ្ដាញទូរទស្សន៍ Fuji News Network បុរសដែលមិនត្រូវបានបញ្ចេញអត្តសញ្ញាណ បានលួចចូលរាជវាំង Akasaka ដែលជារាជដំណាក់អធិរាជជប៉ុន និងសមាជិករាជវង្សឯទៀតគង់នៅ តាមរយៈច្រកផ្ទះសំណាក់សម្រាប់ទទួលភ្ញៀវបរទេស។ ហេតុការណ៍នេះ កើតនៅយប់ថ្ងៃទី២ ខែមករា។ រាជវាំង Akasaka ត្រូវបានការពារយ៉ាងតឹងរ៉ឹង ព្រោះជាដំណាក់របស់អធិរាជផ្ទាល់។
បុរសខាងលើ ដែលត្រូវបានរាយការណ៍ថា សំងំក្នុងបរិវេណរាជវាំងពីរម៉ោង ត្រូវបានចាប់ខ្លួនដោយឆ្មាំការពារនៅក្បែរដំណាក់ព្រះអង្គម្ចាស់ Yuriko ដែលជាត្រូវជាម្ចាស់មីងទួតរបស់អធិរាជ ណារូហ៊ីតុ ។ ទូរទស្សន៍ខាងលើបញ្ជាក់ថា រូបគេបានលួចចូលពេលមិនមានអ្នកការពារនៅច្រកចូល។
ប្រព័ន្ធផ្សព្វផ្សាយជប៉ុនមួយទៀត TBS News រាយការណ៍ដែរថា បុរសរូបនោះចង់ជួបសមាជិករាជវង្សទើបលួចចូលបែបនេះ។ មកទល់ពេលនេះ មិនមានរបាយការណ៍ថា រូបគេបានជួបសមាជិករាជវង្សអង្គណាមួយឬអត់ឡើយ ហើយសារព័ត៌មានជប៉ុនផ្សាយថា មិនមានអ្នករងរបួសអ្វីទេក្នុងហេតុការណ៍នេះ។
ការលួចចូល ឬប៉ុនប៉ងចូលរាជវាំងជប៉ុន មិនមែនជារឿងថ្មីឡើយ ដោយអ្នកប៉ុនប៉ងមានទាំងជនជាតិជប៉ុន និងជនបរទេសផង។ កាលពីខែឧសភា ឆ្នាំ២០២០ បុរសជប៉ុនម្នាក់ក៏ត្រូវចាប់ខ្លួនក្រោយហែលឆ្លងគូទឹក ហើយផ្លោះកំពែងវាំងទីក្រុងតូក្យូ រួចចូលដល់បរិវេណហាមឃាត់ទៀតផង៕
Tag:
ជប៉ុន
© រក្សាសិទ្ធិដោយ thmeythmey.com
