អន្តរជាតិ
នាយករដ្ឋមន្រ្តីជប៉ុន លោក ស៊ូហ្កា យូស៊ីហ៊ីដេ។ រូបភាព៖ Xinhua
×![]()
ដោយ: ធៀន ភារិន្ទ
នាយករដ្ឋមន្ត្រីជប៉ុន លោក ស៊ូហ្កា យូស៊ីហ៊ីដេ នៅថ្ងៃទី៣ ខែមករា និយាយថា ចិន ប្រហែលជាពិបាកក្នុងការក្លាយជាសមាជិកនៃកិច្ចព្រមព្រៀងគ្រប់ជ្រុងជ្រោយនិងវឌ្ឍនភាពនៃភាពជាដៃគូអន្តរប៉ាស៊ីហ្វិក (CPTPP) ។ បើតាមលោក ស៊ូហ្កា ប្រព័ន្ធសេដ្ឋកិច្ចចិនដែលមានក្រុមហ៊ុនរដ្ឋច្រើន ជារឿងសំខាន់។ 
ប្រធានាធិបតីចិន ស៊ី ជិនភីង នៅក្នុងខែវិច្ឆិកា ឆ្នាំ២០២០ កន្លងទៅ បានលើកឡើងពីគម្រោងរបស់ចិនក្នុងការចូលជាសមាជិកកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក CPTPP ។ គោលដៅរបស់ចិន គឺដើម្បីពង្រីកប្រព័ន្ធទីផ្សារផង និងពង្រឹងប្រព័ន្ធពហុភាគីនិយមផង ស្របពេលដែលប្រព័ន្ធឯកតោភាគីនិយម និងគាំពារនិយមកើនឡើងខ្លាំង។ ប៉ុន្តែជប៉ុនដែលជាភាគីមួយរបស់ CPTPP យល់ថា ការចូលរួមរបស់ចិន ទំនងជាជួបបញ្ហា។
ក្នុងកិច្ចសម្ភាសជាមួយវិទ្យុក្នុងស្រុកនៅថ្ងៃទី៣ ខែមករា នាយករដ្ឋមន្ត្រីជប៉ុន ស៊ូហ្កា យូស៊ីហ៊ីដេ លើកឡើងចិនប្រហែលជាពិបាក ក្នុងការចូលរួមកិច្ចព្រមព្រៀងអន្តរប៉ាស៊ីហ្វិកមួយនេះ ព្រោះសម្បូរក្រុមហ៊ុនរដ្ឋពេក។ លោកបន្ថែមដូច្នេះថា៖ «ប្រទេស ដែលមានជំនួញមួយចំនួនគ្រប់គ្រងដោយរដ្ឋ នឹងជួបការលំបាក ក្នុងការចូលរួមជាសមាជិកកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក»។
នាយករដ្ឋមន្ត្រីជប៉ុន អះអាងថា នៅក្នុងកិច្ចព្រមព្រៀង CPTPP មានបទបញ្ញត្តិដែលកំណត់យ៉ាងតឹងរ៉ឹងបំផុតសម្រាប់មុខជំនួញផ្សេងៗឲ្យគោរពតាម។ តាមការចុះផ្សាយរបស់សារព័ត៌មានជប៉ុន NHK ប្រមុខរដ្ឋាភិបាលជប៉ុនរូបនេះ បានបន្តទៀតថា វាពិបាកណាស់ ប្រសិនបើចិននៅតែបន្តរចនាសម្ព័ន្ធគ្រប់គ្រងជំនួញរបស់ខ្លួន ដូចពេលបច្ចុប្បន្ន។
នៅក្នុងប្រព័ន្ធសេដ្ឋកិច្ចទីផ្សារសេរី ជំនួញ ឬការរកស៊ី ដែលមានការជ្រៀកជ្រែកពីរដ្ឋាភិបាល ឬផ្តល់មូលនិធិជាសម្ងាត់ពីរដ្ឋាភិបាល ជាឧបសគ្គរាំងស្ទះដល់ការប្រកួតប្រជែងរវាងក្រុមហ៊ុនឯកជន និងក្រុមហ៊ុនឯកជន ហើយបង្កឲ្យមានការប្រកួតប្រជែងមិនស្មើភាពដែលម្ខាងមានធនធានច្រើនជាងម្ខាងទៀត ដែលអាចបន្តរកស៊ីដោយមិនភ័យបារម្ភនោះ។
នៅក្នុងឆ្នាំ ២០១៨ កិច្ចព្រមព្រៀងដៃគូអន្តរប៉ាស៊ីហ្វិក ត្រូវបានធ្វើវិសោធនកម្មទៅជា កិច្ចព្រមព្រៀងគ្រប់ជ្រុងជ្រោយនិងវឌ្ឍនភាពនៃភាពជាដៃគូអន្តរប៉ាស៊ីហ្វិក បន្ទាប់ពីការដើរចេញរបស់អាមេរិក។ ក្នុងកិច្ចព្រមព្រៀងនេះ ប្រទេសជាសមាជិកមានចំនួន ១១ ប្រទេស ដូចជា អូស្ត្រាលី, ព្រុយណេ, កាណាដា, ស៊ីលី, ជប៉ុន, ម៉ាឡេស៊ី, ម៉ិកស៊ិក, នូវែលសេឡង់, ប៉េរូ, សិង្ហបុរី និងវៀតណាម៕
Tag:
ចិន
ជប៉ុន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
