កីឡាករ ទៀង ទីនី បានសម្រេចបញ្ចប់អាជីពជាកីឡាករបាល់ទាត់ ក្រោយប្រឡូកក្នុងវិស័យនេះអស់រយៈពេលជាង១០ឆ្នាំ។ ខ្សែការពារវ័យ៣៥ឆ្នាំរូបនេះ ធ្លាប់លេងឲ្យក្រុមជម្រើសជាតិ និងក្លិបបាល់ទាត់អាជីពជាច្រើននៅកម្ពុជា។ ទោះបីចូលនិវត្តន៍ពីអាជីពកីឡាករ រូបគេ ទំនងជាទៅមិនឆ្ងាយពីវិស័យកីឡាបាល់ទាត់នោះឡើយ។
ស្ថិតក្នុងវ័យ៣៥ឆ្នាំ ខ្សែការពារ ដែលជោគជាំដោយបទពិសោធបាល់ទាត់ ទៀង ទីនី បានសម្រេចបញ្ចប់អាជីពជាកីឡាករនៅត្រឹមដើមឆ្នាំ២០២១។ ក្រៅពីចង់ផ្តល់ឱកាសឲ្យក្មេងៗជំនាន់ក្រោយ ការគ្មានពេលវេលាគ្រប់គ្រាន់ដោយសាររវល់ជាមួយការងារក្នុងស្ថាប័នរដ្ឋ ក៏ជាមូលហេតុមួយជំរុញឲ្យរូបគេ បញ្ចប់អាជីពផងដែរ។ ប៉ុន្តែកីឡាកររូបនេះមិនបានបញ្ចាក់លម្អិតពាក់ព័ន្ធការងាររដ្ឋនោះទេ។
ក្រោយចូលនិវត្តន៍ អតីតកីឡាជួយឲ្យក្លិបវិសាខាទទួលបានកៅអីឡើងមកលេងក្នុងក្របខណ្ឌលីគកំពូលរូបនេះ មិនទៅឆ្ងាយពីវិស័យកីឡាបាល់ទាត់នោះទេ ដោយរូបគេអាចនឹងធ្វើជាគ្រូបង្វឹក ឬអ្នកបណ្តុះបណ្តាលយុវជនបាល់ទាត់នៅក្លិបណាមួយ។ ប៉ុន្តែកីឡាកររូបនេះ មិនទាន់អាចបញ្ជាក់លម្អិតពីឈ្មោះក្លិប ដែលខ្លួននឹងចូលរួមជាមួយនោះទេ។
ក្នុងបទសម្ភាសជាមួយសារព័ត៌មានថ្មីៗកីឡាករ ទៀង ទីនី បានបញ្ជាក់ពីមូលហេតុ និងគោលដៅបន្តរបស់ខ្លួនយ៉ាងដូច្នេះថា៖«ក្រោយបញ្ចប់អាជីព ខ្ញុំប្រហែលជាធ្វើគ្រូបង្វឹក ឬគ្រូបង្វឹកយុវជនថ្នាលនៅកន្លែង ឬក្រុមណាមួយ ដើម្បីបណ្តុះបណ្តាលយុវជន និងជួយអភិវឌ្ឍន៍វិស័យកីឡាបាល់ទាត់កម្ពុជាឲ្យកាន់តែរីកចម្រើន។ មូលហេតុ ដែលខ្ញុំបញ្ចប់អាជីពជាកីឡាករ ដោយសារខ្ញុំរវល់ជាមួយការងាររដ្ឋមួយកន្លែង»។
គិតមកដល់បច្ចុប្បន្នអតីតខ្សែការពាររូបនេះ បានប្រឡូកក្នុងវិស័យកីឡាបាល់ទាត់អស់រយៈពេលប្រមាណ១៤ឆ្នាំហើយ។ រូបគេចាប់ផ្តើមអាជីពបាល់ទាត់ដំបូងនៅឆ្នាំ២០០៦ជាមួយអតីតក្លិបខេមរាកីឡា និងជួយឲ្យក្លិបនេះគ្រងជើងឯកលីគកំពូល។ នៅឆ្នាំ២០០៧ រូបគេបានផ្លាស់មកចូលរួមជាមួយក្លិបណាហ្គាខប(ណាហ្គាវើលដ៍) និងបានរួមចំណែកជួយឲ្យក្លិបនេះគ្រងជើងឯកលីគកំពូលក្នុងឆ្នាំនោះផងដែរ។
ក្រោយរួមរស់បាន១ឆ្នាំ ខ្សែការពារកម្ពស់១.៧៧ម៉ែត្ររូបនេះ បានផ្ទេរមកចូលរួមជាមួយក្លិបភ្នំពេញក្រោននៅឆ្នាំ២០០៨។ រូបគេបានចំណាយពេល៤ឆ្នាំជាមួយភ្នំពេញក្រោន ដោយបានរួមចំណែកជួយឲ្យក្លិបនេះគ្រងជើងឯកលីគកំពូលចំនួន៣លើកនៅឆ្នាំ២០០៨, ២០១០ និង ២០១១។
នៅឆ្នាំ២០១២ អតីតកីឡាករមកពីខេត្តសៀមរាបរូបនេះ បានត្រឡប់មកចូលរួមជាមួយក្លិបណាហ្គាវើលដ៍សាជាថ្មី ដោយបានចំណាយពេលចំនួន៤ឆ្នាំ មុនផ្លាស់ទៅចូលរួមជាមួយក្លិបអង្គរថាយហ្គឺរនៅឆ្នាំ២០១៦។ ក្រោយចែកផ្លូវជាមួយអង្គរថាយហ្គឺរ រូបគេបានមកចូលរួមជាមួយក្លិបវិសាខាក្រោមការដឹកនាំរបស់លោក ហុក សុចិត្រា នៅឆ្នាំ២០១៧។ ហើយបានជួយឲ្យក្លិបនេះឈ្នះជើងឯកលីគ២ និងទទួលបានកៅអីឡើងមកលេងក្នុងលីគកំពូលនៅឆ្នាំ២០១៨។ រូបគេលេងឲ្យក្លិបនេះរហូតដល់ឆ្នាំ២០១៩។
ក្រោយចែកផ្លូវជាមួយក្លិបវិសាខា ដែលខ្លួនបានចំណាយពេលរួមរស់៣ឆ្នាំ រូបគេ បានផ្ទេរទៅចូលរួមជាមួយក្លិបព្រះខ័នរាជស្វាយរៀងនៅឆ្នាំ២០២០ និងបានជួយឲ្យក្លិបនេះទទួលបានជើងឯករងពានរង្វាន់លីគកំពូល។ ហើយរូបគេក៏បានប្រកាសបញ្ចប់ជាកីឡាករនៅដើមឆ្នាំ២០២១ តែម្តង៕