ចៅក្រមអង់គ្លេស បដិសេធសំណើអាមេរិកធ្វើបត្យាប័នស្ថាបនិក WikiLeaks ទៅកាត់ទោស

អន្តរជាតិ

ចៅក្រមអង់គ្លេស បដិសេធសំណើអាមេរិកធ្វើបត្យាប័នស្ថាបនិក WikiLeaks ទៅកាត់ទោស

05, Jan 2021 , 8:29 pm

រូបភាព

លោកJulian Assange ស្ថាបនិកគេហទំព័រWikiLeaks ។ រូបភាព៖Reuters

ដោយ:

តុលាការអង់គ្លេស នៅថ្ងៃទី៤ មករា បានបដិសេធសំណើរបស់អាមេរិកក្នុងការធ្វើបត្យាប័ន លោក Julian Assange ស្ថាបនិកគេហទំព័រ WikiLeaks ទៅកាត់ទោសនៅអាមេរិក។ ចៅក្រមតុលាការអង់គ្លេសអះអាងថា លោក Assange ដែលកំពុងមានជំងឺផ្លូវចិត្ត អាចនឹងធ្វើអត្តឃាតបើបញ្ជូនទៅអាមេរិក។

រដ្ឋាភិបាលអាមេរិកចោទលោក Julian Assange ពីបទបំពានច្បាប់ចារកិច្ចអាមេរិក ដោយបញ្ចេញព័ត៌មានសម្ងាត់។ រដ្ឋាភិបាលអាមេរិក ចោទ លោក Assange ចំនួន១៨បទល្មើសទាក់ទងទៅនឹងការបញ្ចេញព័ត៌មានសម្ងាត់ដោយគេហទំព័រ WikiLeaks ស្តីពីការណ៍សម្ងាត់យោធា និងទំនាក់ទំនងការទូត។ អាមេរិក អះអាងថា ការបញ្ចេញព័ត៌មានដោយគេហទំព័រនេះ បណ្តាលឲ្យអ្នកការទូត និងយោធារបស់ខ្លួនប្រឈមនឹងគ្រោះថ្នាក់ដល់ជីវិតបន្ថែមទៀត។

តាំងពីឆ្នាំ២០១២ លោក Assange បានស្នាក់នៅស្ថានទូតអេក្វាទ័រនៅអង់គ្លេស ហើយឆ្នាំ២០១៩ ត្រូវបានបណ្តេញចេញពីស្ថានទូតអេក្វាទ័រនៅខែមេសា ឆ្នាំ២០១៩។ នៅខែមិថុនា ឆ្នាំ២០១៩ ក្រសួងយុត្តិធម៌អាមេរិក បានដាក់សំណើជាផ្លូវការទៅអង់គ្លេសដើម្បីធ្វើបត្យាប័នលោក Assange ។ លោក Assagne បានតទល់បណ្ដឹងនេះ។

ក្នុងសវនាការថ្ងៃទី៤ ខែធ្នូ លោកស្រី Vanessa Baraitser ចៅក្រមតុលាការដំបូងអង់គ្លេស អះអាងថា រដ្ឋអាជ្ញាអាមេរិកមានហេតុផលគ្រប់គ្រាន់ដើម្បីធ្វើបត្យាប័នលោកAssange ទៅកាត់ក្តីនៅទីនោះ។ ប៉ុន្តែលោកស្រីបដិសេធការធ្វើបត្យាប័ននេះ ដោយអះអាងថា អាមេរិក មិនមានសមត្ថភាពក្នុងការបង្ការលោក Assange ពីការធ្វើអត្តឃាតឡើយ។ ក្រោមច្បាប់បត្យាប័ន ចៅក្រមអង់គ្លេស ត្រូវពិចារណាពីសុខភាពរបស់ជនជាប់ចោទ មុននឹងបញ្ជូនទៅកាត់ក្តីនៅប្រទេសផ្សេងដែរ។

លោកស្រីចៅក្រមលើកឡើងពីភស្តុតាងដែលលោកAssange ធ្វើបាបខ្លួនឯង និងមានគំនិតចង់ធ្វើអត្តឃាត។ ជាក់ស្តែងក្នុងពន្ធនាគារអង់គ្លេស លោក Assange ទូរសព្ទរកសេវាពិគ្រោះបង្ការការធ្វើអត្តឃាតជាច្រើនដង និងមានឡាមលាក់ទុកនៅកន្លែងឃុំខ្លួនផងដែរ។ លោកស្រីចៅក្រម បន្តថា លោកAssange ជាមនុស្សបាក់ស្មារតី និងពេលខ្លះអស់សង្ឃឹមពីអនាគត ដូច្នេះការធ្វើបត្យាប័ន ជាការគាបសង្កត់លើលោកAssange ក្រោមមូលហេតុសុខភាពផ្លូវចិត្ត។

អាមេរិក បានប្រកាសតតាំងរឿងក្ដីនេះទៅកាន់តុលាការជាន់ខ្ពស់អង់គ្លេសទៀត ដោយព្យាយាមធ្វើបត្យាប័នលោក Assange ឲ្យបាន។ ក្នុងសេចក្តីថ្លែងការណ៍របស់ក្រសួងយុត្តិធម៌អាមេរិក អាមេរិក នឹងដាក់បណ្តឹងឧទ្ធរណ៍ទៅតុលាការកំពូលអង់គ្លេស។ ក្រសួងដដែលបន្តក្នុងការកាត់ក្តីនេះ អំណាះអំណាងផ្លូវច្បាប់របស់ខ្លួន ត្រូវបានតុលាការអង់គ្លេសទទួលយក ជាពិសេសទាក់ទងទៅនឹងសេរីភាពនៃការបញ្ចេញមតិ និងហេតុផលនយោបាយ។

គេហទំព័រWikiLeaks ចាប់ផ្តើមចាប់ល្បីពីឆ្នាំ២០១០ មក ក្រោយពេលគេហទំព័រនេះបង្ហាញវីដេអូឧទ្ធម្ភាគចក្រអាមេរិកបាញ់សម្លាប់ជនស៊ីវិល រួមទាំងអ្នកកាសែត Reuters ចំនួន២រូបនៅអ៊ីរ៉ាក់ ក្នុងឆ្នាំ២០០៧។ ចាប់ពីពេលនោះមក ព័ត៌មានសម្ងាត់ការទូតរាប់ពាន់ត្រូវបានផ្សព្វផ្សាយលើគេហទំព័រនេះ៕