ពលរដ្ឋសាមញ្ញរហូតដល់តារាល្បីៗនៅហ្វីលីពីន បានរួមគ្នាបង្កើតចលនាទាមទាររកយុត្តិធម៌ជូនដល់នាង Christine Angelica Dacera អាយុ២៣ឆ្នាំ បាហុនិកាតាមយន្តហោះមួយរូប ដែលរងគ្រោះដោយសារការរំលោភសម្លាប់នៅក្នុងបន្ទប់សណ្ឋាគារមួយ។
Christine Angelica Dacera ជាបាហុនិកាតាមយន្តហោះ និងជាអតីតបវរកញ្ញាមួយរូប។ នាងបានចូលរួមក្នុងពិធីជប់លៀងមួយជាមួយមិត្តភក្តិនៅក្នុងក្រុង Makati នាពិធីអបអរឆ្នាំថ្មី។ នារាត្រីនោះហើយ នាងត្រូវបានប្រទះឃើញសន្លប់ស្តូកស្តឹងក្នុងអាងងូតទឹកនៃបន្ទប់សណ្ឋាគារមួយ ដែលក្រោយមក ត្រូវបានប្រកាសថា ស្លាប់ ក្រោយបញ្ជូនទៅកាន់មន្ទីរពេទ្យ។
យោងតាមការផ្សាយរបស់ Manilla Bulletin សពរបស់នារីបម្រើតាមយន្តហោះរូបនោះ មានស្នាមដាច់រលាត់ពេញខ្លួន ហើយលទ្ធផលកោសល្យវិច្ឆ័យ បានប្រទះឃើញវត្តមានមេជីវិតឈ្មោលនៅក្នុងប្រដាប់បន្តពូជរបស់នាង ដែលត្រូវបានប៉ូលិសសន្និដ្ឋានថា ជាករណីរំលោភសម្លាប់។
មេប៉ូលិសប្រចាំក្រុង Makati លោក Harold Depositar បានអះអាងពីការចាប់ខ្លួន បុរស៣នាក់ក្នុងចំណោមជនសង្ស័យ១១នាក់ ដោយអ្នកទាំងនោះ គឺជាមិត្តជិតស្និទ្ធរបស់ Dacera ផ្ទាល់តែម្តង។
ថ្លែងប្រាប់សារព័ត៌មានក្នុងស្រុក ម្តាយរបស់ Dacera បានបញ្ជាក់ថា គាត់អនុញ្ញាតឲ្យកូនទៅជប់លៀងឆ្លងឆ្នាំជាមួយមិត្តភក្តិ ពីព្រោះគាត់ជឿជាក់លើអ្នកទាំងនោះ។ កាលពីវេលាម៉ោង១២អាធ្រាត្រឈានចូលថ្ងៃទី១ មករា ជនរងគ្រោះក៏បានទូរសព្ទទៅគ្រួសាររបស់ខ្លួនផងដែរ ហើយ១២ម៉ោងក្រោយមក ពួកគាត់ទទួលបានការរាយការណ៍ពីមិត្តម្នាក់របស់ Dacera ពីដំណឹងមរណភាព។
នៅលើបណ្តាញសង្គម ចលនាទាមទាររកយុត្តិធម៌ជូន Dacera បានផុសផុលយ៉ាងខ្លាំង តាមរយៈ Hashtag #JusticeForChristineDacera #ProtectDrunkGirls ដោយពួកគេឲ្យបញ្ឈប់វប្បធម៌លាមករបស់មនុស្សប្រុសដែលតែងតែសុំនារីរួមភេទ ឬរំលោភនៅពេល នាងស្រវឹងខ្លាំង។
Kakie Pangilinan កូនស្រីរបស់តារាសម្តែង Sharon Cuneta និងលោក Kiko Pangilinan ដែលជាសមាជិកព្រឹទ្ធសភា បានសរសេរថា ការស្លៀកពាក់ និងស្ថានភាពស្រវឹង មិនត្រូវក្លាយជាដើមហេតុនៃការរំលោភនោះឡើយ។
Bianca Gonzales តារាដ៏ល្បីល្បាញមួយរូបនៅហ្វីលីពីន បានលើកឡើងថា ការរំលោភគឺបង្កឡើងដោយអ្នករំលោភ មិនមែនដោយសារតែនរណាម្នាក់ស្នើសុំនោះឡើយ។ រីឯអ្នកប្រើប្រាស់បណ្តាញសង្គមដ៏មានឥទ្ធិពល Kerwin King ទទូចកុំឲ្យនាំគ្នាលើកយកករណីស្លៀកពាក់ ឬស្ថានភាពស្រវឹងធ្វើជាដើមហេតុ ឬឱកាសដែលឈានដល់ការរំលោភឲ្យសោះ។
Dacera កើតនៅក្រុង General Santos។ នៅឆ្នាំ២០១៧ នាងបានសញ្ញាបត្រនៅសាកលវិទ្យា University of the Philippines (UP) ជំនាញទំនាក់ទំនង និងសិក្សាព័ត៌មាន។
នៅខែឧសភា ឆ្នាំ២០១៩ នាងចាប់ផ្តើមបម្រើការជាបាហុនិកានៅ Philippine Airlines។ Dacera ក៏បានឈានចូលដល់វគ្គផ្តាច់ព្រ័ត្រនាការប្រកួតបវរកញ្ញា Mutyang Davao ឆ្នាំ២០១៩ ផងដែរ៕