កូរ៉េខាងត្បូង ពិចារណាគម្រោងទស្សនកិច្ចអនុរដ្ឋមន្ត្រីការបរទេសនៅអ៊ីរ៉ង់ ក្រោយអ៊ីរ៉ង់ឃាត់នាវាដឹកទំនិញខ្លួន

អន្តរជាតិ

កូរ៉េខាងត្បូង ពិចារណាគម្រោងទស្សនកិច្ចអនុរដ្ឋមន្ត្រីការបរទេសនៅអ៊ីរ៉ង់ ក្រោយអ៊ីរ៉ង់ឃាត់នាវាដឹកទំនិញខ្លួន

05, Jan 2021 , 10:59 pm

រូបភាព

នាវាដឹកទំនិញកូរ៉េខាងត្បូងដែលឃាត់ដោយអ៊ីរ៉ង់។ រូបភាព៖Reuters

ដោយ:

នៅថ្ងៃទី៥ មករា ក្រសួងការបរទេសកូរ៉េខាងត្បូង អះអាងថា កំពុងពិចារណាឡើងវិញពីគម្រោងទស្សនកិច្ចរបស់អនុរដ្ឋមន្ត្រីការបរទេសខ្លួនរបស់នៅអ៊ីរ៉ង់ ក្រោយពេលអ៊ីរ៉ង់ចាប់ឃាត់នាវាដឹកសារធាតុគីមីរបស់កូរ៉េខាងត្បូង និងឃាត់ខ្លួននាវិកចំនួន២០រូបផ្សេងទៀត។

ហេតុការណ៍ឃាត់នាវាកូរ៉េខាងត្បូងនៅថ្ងៃទី៤ មករា ដោយកងឆ្មាំបដិវត្តន៍អ៊ីរ៉ង់នៅ កើតឡើងជិតច្រកសមុទ្រ Hormuz ។ នាវារបស់កូរ៉េខាងត្បូង ផ្ទុកសារធាតុអេតាណុលចំនួន៧,២០០តោន និងមាននាវិកចំនួន២០នាក់ ក្នុងនោះ១១នាក់ជនជាតិមីយ៉ាន់ម៉ា ៥នាក់ជនជាតិកូរ៉េខាងត្បូង ២នាក់ជនជាតិឥណ្ឌូនេស៊ី និង២នាក់ជនជាតិវៀតណាម។ អ៊ីរ៉ង់ អះអាងថាខ្លួនឃាត់នាវាខាងលើដោយសារតែនាវានោះបំពុលទឹកជាច្រើនដង។

លោកស្រីKang Kyung-wha រដ្ឋមន្ត្រីការបរទេសកូរ៉េខាងត្បូងប្រាប់អ្នកកាសែតនៅថ្ងៃទី៥មករាថា កូរ៉េខាងត្បូងកំពុងប្រើប្រាស់យន្តការការទូតជាមួយអ៊ីរ៉ង់ដើម្បីបាននាវាមកវិញ ក៏ដូចជាដោះលែងនាវិកទាំង២០នាក់។ លោកស្រីបញ្ជាក់ថា កូរ៉េខាងត្បូងកំពុងស្វែងរកព័ត៌មានទាំងឡាយស្តីពីហេតុការណ៍ ក៏ដូចជាដោះស្រាយបញ្ហាខាងលើតាមរយៈស្ថានទូតរបស់ប្រទេសទាំងពីរ។ នេះបើយោងតាមទីភ្នាក់ងារព័ត៌មានYonhap។

ស្របពេលជាមួយគ្នានេះ ក្រសួងការពារជាតិកូរ៉េខាងជើងបានចេញសេចក្តីថ្លែងការណ៍ អះអាងថាខ្លួនបានបញ្ជូនអង្គភាពប្រឆាំងចោរសមុទ្រទៅក្បែរច្រកសមុទ្រ Hormuz ដើម្បីធានាសុវត្ថិភាពរបស់ពលរដ្ឋខ្លួនដែរ។

ការចាប់ឃាត់នាវាកូរ៉េខាងត្បូង ត្រូវបានមើលឃើញថា ជាការដាក់សម្ពាធរបស់ទីក្រុងតេហេរ៉ង់លើទីក្រុងសេអ៊ូល ដែលបានបង្កកលុយ៧ពាន់លានដុល្លារកាលពីខែកញ្ញា ឆ្នាំ២០១៩ ទៅតាមទណ្ឌកម្មរបស់អាមេរិក។ ប្រទេសទាំងពីរចចារជាមួយគ្នាជាច្រើនខែ ហើយអនុរដ្ឋមន្ត្រីការបរទេសកូរ៉េខាងត្បូងក៏មានគម្រោងទៅទស្សនកិច្ចនៅអ៊ីរ៉ង់ដើម្បីពន្លឿនការពិភាក្សានេះទៀតផង។ ប៉ុន្តែក្រោយសកម្មភាពអ៊ីរ៉ង់បែបនេះ មន្ត្រីការទូតកូរ៉េខាងត្បូងអះអាងថា គម្រោងទស្សនកិច្ចរបស់លោក Choi Jong-kun ស្ថិតក្នុងភាពមិនច្បាស់លាស់។

ត្រឡប់ទៅរឿងបង្កកប្រាក់របស់អ៊ីរ៉ង់ ដោយកូរ៉េខាងត្បូងវិញ កាលពីថ្ងៃទី៣ មករា សារព័ត៌មានអ៊ីរ៉ង់ Tehran Times ចុះផ្សាយថា អ៊ីរ៉ង់សង្ឃឹមថា នឹងចរចាបានកិច្ចព្រមព្រៀងជាមួយកូរ៉េខាងត្បូង ក្នុងការប្រើប្រាក់ដែលបានបង្កក ដោយដោះដូរជាមួយវ៉ាក់សាំង និងទំនិញសំខាន់ៗដូចជាអាហារ និងឱសថជាដើម។

លោក Nam Chang-hee សាស្ត្រាចារ្យការទូតនៅសាកលវិទ្យាល័យ Inha University នៅកូរ៉េខាងត្បូងអះអាងថា ដោយសារតែខ្វះខាតប្រាក់ អ៊ីរ៉ង់ប្រហែលជាមានចេតនាក្នុងការដាក់សម្ពាធឲ្យកូរ៉េខាងត្បូងឲ្យពន្លឿនការចចាររឿងប្រាក់ដែលបានបង្កក។ កន្លងមក អ៊ីរ៉ង់ក៏ធ្លាប់ព្រមានប្តឹងកូរ៉េខាងត្បូងទៅតុលាការយុត្តិធម៌អន្តរជាតិ ដោយសារតែការចរចាមានសភាពយឺតយ៉ាវពេក។

ការឃាត់នាវានេះ ក៏អាចជាការផ្ញើសារទៅកាន់ប្រទេសដែលជាសម្ព័ន្ធមិត្តអាមេរិក ដែលរួមដៃអនុវត្តទណ្ឌកម្ម និងជាការរំឭកថា អ៊ីរ៉ង់គ្រប់គ្រងបានពេញដៃច្រកសមុទ្រHormuz ដែលជាកន្លែងឆ្លងកាត់របស់នាវាយ៉ាងសំខាន់៕