ជាតិ
សង្គមជាតិ
ទិដ្ឋភាពបឹងតាមោក ថតពីលើ (រូប ថតចេញវីដេអូរនៃ Channel Youtube Thort Leng)
×![]()
ដោយ: សារព័ត៌មានថ្មីៗ
រដ្ឋាភិបាល បាននិរាករ (លុបចោល) ចំពោះការសម្រេចកន្លងមក ស្តីពីការកាត់ផ្ទៃបឹងតាមោក៣០ហិកតា ទៅឲ្យស្ថាប័នរដ្ឋ។ នេះបើតាមសេចក្តីជូនដំណឹងរបស់ទីស្តីការគណៈរដ្ឋមន្ត្រី នៅថ្ងៃទី៤ ខែមករា ឆ្នាំ២០២១។ 
សជណ បានឲ្យដឹងថា ផ្ទៃបឹងតាមោក១៥ហិកតា ដែលរដ្ឋាភិបាល ប្រគល់ជូនក្រសួងអភិវឌ្ឍន៍ជនបទ ដើម្បីសាងសង់ទីស្តីការថ្មីរបស់ខ្លួន ត្រូវនិរាករចោល ហើយផ្ទៃបឹងតាមោក១៥ទៀត ដែលរដ្ឋាភិបាលប្រគល់ឲ្យគណៈកម្មាធិការជាតិគ្រប់គ្រងគ្រោះមហន្តរាយ គណៈកម្មាធិការសិទ្ធិមនុស្សកម្ពុជា និង អាជ្ញាធរមីន ដើម្បីបង្កើតទីស្នាក់ការថ្មីនៃអង្គភាពទាំង៣នេះ ក៏ត្រូវនិរាករចោលដែរ។
សជណនេះ គឺលោក ហ៊ីង ថូរ៉ាក់ស៊ី រដ្ឋលេខាធិការទីស្តីការគណៈរដ្ឋមន្ត្រី ជាអ្នកចេញជួសលោក ប៊ិន ឈិន ជារដ្ឋមន្ត្រី ហើយបានផ្ញើជូនទៅរដ្ឋមន្ត្រីក្រសួងសេដ្ឋកិច្ច រដ្ឋមន្ត្រីក្រសួងរៀបចំដែនដី រដ្ឋមន្ត្រីក្រសួងអភិវឌ្ឍន៍ជនបទ រដ្ឋមន្ត្រីក្រសួងរ៉ែ អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ និង អភិបាលរាជធានីភ្នំពេញ។
នៅពេលរដ្ឋាភិបាល និរាករផ្ទៃដី១៥ហិកតា ដែលឲ្យទៅក្រសួងអភិវឌ្ឍន៍ជនបទ សម្រាប់បង្កើតទីស្តីការថ្មី រដ្ឋាភិបាល បានសម្រេចយកដីនិងទីស្តីការបច្ចុប្បន្នរបស់ក្រសួងរៀបចំដែនដី ប្រគល់ឲ្យក្រសួងអភិវឌ្ឍន៍ជនបទជំនួសវិញ ហើយដីនិងទីស្តីការបច្ចុប្បន្នរបស់ក្រសួងអភិវឌ្ឍន៍ជនបទ ត្រូវប្រគល់ទៅឲ្យមន្ទីររៀបចំដែនរាជធានីភ្នំពេញ។ នេះបើផ្អែកលើសជណដដែល។
ទីស្តីការបច្ចុប្បន្នរបស់ក្រសួងអភិវឌ្ឍន៍ជនបទ ស្ថិតនៅតាមបណ្តោយមហាវិថីសហព័ន្ធរុស្ស៊ី សង្កាត់មិត្តភាព ខណ្ឌ៧មករា ហើយទីស្តីការបច្ចុប្បន្នរបស់ក្រសួងរៀបចំដែនដី ស្ថិតនៅតាមបណ្តោយមហាវិថីព្រះមុនីវង្ស សង្កាត់បឹងត្របែក ខណ្ឌចំការមន។ ក្រសួងរៀបចំដែនដី នឹងត្រូវប្តូរទៅទីស្តីការថ្មី ស្ថិតក្នុងសង្កាត់ឃ្មួញ ខណ្ឌសែនសុខ។
សជណ បានឲ្យដឹងទៀតថា អង្គភាពទាំង៣ ដែលមិនបានទៅបង្កើតទីស្នាក់ការថ្មីលើផ្ទៃបឹងតាមោក ដោយសារតែរដ្ឋាភិបាលនិរាករចោលវិញនូវការផ្តល់ផ្ទៃបឹងតាមោកឲ្យនោះ នឹងទទួលបានដីនិងទីស្តីការបច្ចុប្បន្នរបស់ក្រសួងរ៉ែ ធ្វើជាទីស្តីការថ្មីរួមគ្នា។ មានន័យថា អង្គភាពទាំង៣នេះ នឹងរើទៅធ្វើការនៅទីស្តីការបច្ចុប្បន្នរបស់ក្រសួងរ៉ែទាំងអស់គ្នា។ សជណ ពុំបានបង្ហាញនោះទេថា ទីតាំងបច្ចុប្បន្នរបស់អង្គភាពទាំង៣ នឹងត្រូវទុកធ្វើអ្វីឬប្រគល់ទៅឲ្យខាងណា។
ទីតាំងបច្ចុប្បន្ន គឺក្រសួងរ៉ែ ស្ថិតក្នុងសង្កាត់ផ្សារថ្មី៣ ខណ្ឌដូនពេញ ចំណែក គណៈកម្មាធិការជាតិគ្រប់គ្រងគ្រោះមហន្តរាយ គណៈកម្មាធិការសិទ្ធិមនុស្សកម្ពុជា និង អាជ្ញាធរមីន សុទ្ធតែស្ថិតក្នុងសង្កាត់ទួលសង្កែ ខណ្ឌឫស្សីកែវ។
សជណ ពុំបានបញ្ជាក់ឡើយថា ក្រសួងរ៉ែ នឹងត្រូវប្តូរទៅទីស្នាក់ការថ្មីនៅឯណា តែទំនងជាប្តូរទៅទីស្តីការរបស់ក្រសួងសាធារណៈ ដែលស្ថិតក្នុងសង្កាត់វត្តភ្នំ ខណ្ឌដូនពេញ ព្រោះកន្លងមកមន្ត្រីជាន់ខ្ពស់នៃក្រសួងសាធារណការ ធ្លាប់អះអាងថា ទីស្តីការរបស់ក្រសួងសាធារណការ នឹងត្រូវប្រគល់ជូនក្រសួងរ៉ែ។ នៅដើមខែមករា ឆ្នាំ២០២១នេះ ក្រសួងសាធារណការ បានប្តូរទៅទីស្តីការថ្មីហើយ ស្ថិតនៅតាមបណ្តោយផ្លូវ ជា សុផារ៉ា សង្កាត់ច្រាំងចំរេះ២ ខណ្ឌឫស្សីកែវ។
សជណ ក៏ពុំបានលម្អិតព័ត៌មានដែរថា ផ្ទៃបឹងតាមោក៣០ហិកតា ដែលដកហូតមកវិញនេះ នឹងត្រូវប្រគល់ឲ្យស្ថាប័នរដ្ឋឬវិស័យឯកជនណាមួយ ឬក៏រក្សាទុក ដោយមិនប្រគល់ទៅឲ្យខាងណានោះទេ។
មកដល់ពេលនេះ គេ ឃើញមានអនុក្រឹត្យនិងសជណចំនួន១០លើកហើយ ស្តីពីការកាត់ផ្ទៃបឹងតាមោកឬបឹងកប់ស្រូវ ដែលស្ថិតនៅប៉ែកខាងជើងរាជធានីភ្នំពេញ ឲ្យទៅស្ថាប័នរដ្ឋនិងវិស័យឯកជន។ ផ្ទៃបឹងតាមោក ដែលត្រូវបានកាត់ទាំង១០នោះ មានទំហំសរុបប្រមាណ៧២២ហិកតា ក្នុងចំណោមផ្ទៃបឹងទាំងមូលជាង៣,២ពាន់ហិកតា។ ប៉ុន្តែ ដោយសារពេលនេះ រដ្ឋាភិបាល បានដកហូត៣០ហិកតាមកវិញ ដូច្នេះផ្ទៃបឹងតាមោក ដែលត្រូវកាត់កន្លងមក បានថយមកនៅប្រមាណ៦៩២ហិកតា៕
Tag:
បឹងតាមោក
© រក្សាសិទ្ធិដោយ thmeythmey.com
