មេដឹកនាំកូរ៉េខាងជើង លោក គីម ជុងអ៊ុន បានទទួលស្គាល់បរាជ័យក្នុងការអនុវត្តផែនការសេដ្ឋកិច្ចនៅពេល៥ឆ្នាំកន្លងមកព្រោះមានឧបសគ្គជាច្រើន។ លោក គីម លើកឡើងបែបនេះក្នុងសមាជបក្សពលករលើកទី៨ ដែលបើកថ្ងៃទី៥ ខែមករា។ ប្រមុខដឹកនាំកូរ៉េខាងជើង បានសន្យាថា នឹងមិនជាន់ដានចាស់របស់ខ្លួនឡើយ។ គេរំពឹងថា តាមរយៈសមាជនេះ កូរ៉េខាងជើង នឹងដាក់ចេញផែនការអភិវឌ្ឍសេដ្ឋកិច្ច និងគោលនយោបាយការបរទេសថ្មីសម្រាប់ឆ្នាំខាងមុខបន្តទៀត។
សមាជបក្សលើកទី៨ របស់បក្សពលករកូរ៉េខាងជើងដែលគេរង់ចាំច្រើនថ្ងៃ ចាប់ផ្ដើមហើយនៅថ្ងៃទី៥ ខែមករា។ បើតាមការផ្សាយរបស់ទីភ្នាក់ងារព័ត៌មានរដ្ឋកូរ៉េខាងជើង KNCA លោក គីម ជុងអ៊ុន ប្រធានបក្សពលករកូរ៉េខាងជើង បានថ្លែងសារបើកម្មវិធីទៅកាន់សមាជបក្សដ៏កម្រដែលធ្វើនៅទីក្រុងព្យុងយ៉ាង ជាមួយវត្តមានមេដឹកនាំបក្សចំនួន ២៥០រូប, សមាជិកបក្សចូលរួមចំនួន ៤៧៥០នាក់ និងអ្នកសង្កេតការណ៍ចំនួន ២០០០នាក់ផ្សេងទៀត។
ថ្លែងនៅចំពោះមុខសមាជិកសមាជ មេដឹកនាំកូរ៉េខាងជើង បានទទួលស្គាល់បរាជ័យនៃផែនការសេដ្ឋកិច្ចរបស់ខ្លួន ដែលបានដាក់ចេញកាលពីសមាជចុងក្រោយឆ្នាំ២០១៦។ «យុទ្ធសាស្ត្រអភិវឌ្ឍសេដ្ឋកិច្ចរយៈពេល ៥ឆ្នាំ បានបញ្ចប់នៅឆ្នាំមុន ប៉ុន្តែលទ្ធផលនៅក្នុងវិស័យជាច្រើន មិនបានទទួលដូចអ្វីដែលយើងកំណត់ទុកឡើយ»។ លោក គីម បានលើកឡើងបែបនេះ ដោយបន្ថែមថា បរាជ័យនេះ ជាបញ្ហាអាក្រក់សម្រាប់ប្រទេស។
ចាប់តាំងពីដាក់ចេញផែនការសេដ្ឋកិច្ចរយៈពេល ៥ឆ្នាំនៅក្នុងឆ្នាំ២០១៦ កន្លងមក កូរ៉េខាងជើង បានប្រឈមបញ្ហាជាច្រើនដូចជា ទណ្ឌកម្មអាមេរិក គ្រោះធម្មជាតិ ជំងឺរាតត្បាតសកលកូវីដ-១៩ដែលបង្ខំឲ្យកូរ៉េខាងជើងបិទប្រទេសរបស់ខ្លួនជាដើម។
ដើម្បីដោះស្រាយនេះ ប្រធានបក្សពលករកូរ៉េខាងជើងរូបនេះ បានប្តេជ្ញាពង្រឹងសមត្ថភាពប្រទេសឲ្យកាន់តែខ្លាំងជាងមុន និងបង្កើនសមត្ថភាពក្នុងការពឹងផ្អែកលើខ្លួនឯង ដើម្បីដោះស្រាយបញ្ហាប្រឈមទាំងនៅក្នុងពេលបច្ចុប្បន្ន និងពេលខាងមុខ។ លោកគីម ក៏សន្យាទៀតថា កូរ៉េខាងជើង នឹងមិនជាន់ដានចាស់របស់ខ្លួនទៀតឡើយ។
អំឡុងសមាជនេះ គេរំពឹងថា កូរ៉េខាងជើង នឹងដាក់ចេញយុទ្ធសាស្ត្រអភិវឌ្ឍសេដ្ឋកិច្ចរយៈពេល ៥ឆ្នាំ មួយទៀត សំដៅពង្រឹងខឿនសេដ្ឋកិច្ចដែលទ្រុឌទ្រោម។ ទន្ទឹមនេះ លោក គីម ក៏បានលើកឡើងពីគោលនយោបាយ ដើម្បីកែលម្អការបង្រួបបង្រួមជាតិ ការកែលម្អទំនាក់ទំនងជាមួយប្រទេសដទៃ និងពង្រឹងកិច្ចការនៅក្នុងបក្សផងដែរ។
សមាជបក្សពលករកូរ៉េខាងជើងឆ្នាំនេះ បានទាញចំណាប់អារម្មណ៍ពីប្រទេសមួយចំនួនយ៉ាងខ្លាំង ពិសេសកូរ៉េខាងត្បូង និងអាមេរិកជាដើម។ នយោបាយការបរទេសថ្មី ជំហរក្នុងការរំសាយនុយក្លេអ៊ែរ ទំនាក់ទំនងជាមួយសេអ៊ូល និងវ៉ាស៊ីនតោន សុទ្ធតែជារឿងគេរង់ចាំមើក ស្របពេលប្រធានាធិបតីជាប់ឆ្នោត លោក ចូ បៃឌិន ជិតដល់ថ្ងៃប្រកាសចូលកាន់តំណែងថ្ងៃទី២០ ខែមករា។
លើសពីនោះ អំឡុងកិច្ចប្រជុំនេះ អ្នកជំនាញមួយចំនួន ក៏កំពុងផ្តោតទៅលើប្អូនស្រីរបស់លោក គឺលោកស្រី គីម យូជុង។ តើលោកស្រីអាចនឹងត្រូវផ្តល់តួនាទីកាន់តែខ្ពស់ជាងមុនឬអត់ ជាអ្វីសំណួររង់ចាំចម្លើយ៕