អន្តរជាតិ
នយោបាយអន្តរជាតិ
បក្សប្រជាធិបតេយ្យ ឈ្នះកៅអីព្រឹទ្ធសភាមួយទៀតក្នុងការបោះឆ្នោតនៅរដ្ឋ Georgia
លោក Raphael Warnock បេក្ខជនសមាជិកព្រឹទ្ធសភាបក្សប្រជាធិបតេយ្យ។ រូបភាព៖AFP
×![]()
បក្សប្រជាធិបតេយ្យ ទទួលបានអាសនៈមួយបន្ថែមទៀតក្នុងការបោះឆ្នោតជ្រើសរើសសមាជិកព្រឹទ្ធសភាតំណាងរដ្ឋ Georgia ដែលមានពីរអាសនៈ។ បើសិនជាបក្សប្រជាធិបតយ្យឈ្នះមួយអាសនៈទៀតដែលនៅសល់ នោះអាសនៈបក្សប្រជាធិបតេយ្យ នឹងកើនដល់៥០អាសនៈ ស្មើបក្សសាធារណរដ្ឋ ដែលជាការបបញ្ចប់ការគ្រប់គ្រងព្រឹទ្ធសភាដោយបក្សសាធារណរដ្ឋចាប់ពីឆ្នាំ២០១០មក។
ក្នុងការបោះឆ្នោតជ្រើសរើសសមាជិកព្រឹទ្ធសភាជុំទី២ នៅរដ្ឋ Georgia លោក Raphael Warnockបេក្ខជនបក្សប្រជាធិបតេយ្យ ទទួលជ័យជម្នះលើលោកស្រីសមាជិកព្រឹទ្ធសភា Kelly Loeffler នៃបក្សសាធារណរដ្ឋ។ លោក Warnock ទទួលបានសំឡេងឆ្នោតជាង២លាន២សែន ទល់នឹងសំឡេងឆ្នោតរបស់លោកស្រី Loeffler ដែលទទួលបាន២លាន១សែន៩ម៉ឺន។ នេះបើតាមទីភ្នាក់ងារព័ត៌មានអាមេរិក AP ។
តាមពិតទៅ រដ្ឋ Georgia ក៏រៀបចំការបោះឆ្នោតព្រឹទ្ធសភាដូចរដ្ឋដទៃទៀតតាំងតែពីថ្ងៃទី៣ វិច្ឆិកា ឆ្នាំ២០២០ មកម្ល៉េះ។ ប៉ុន្តែដោយពុំមានបេក្ខជនណាទទួលបានសំឡេងបោះឆ្នោតលើស៥០ភាគរយ ការបោះឆ្នោតជុំទីពីរត្រូវធ្វើឡើងនៅថ្ងៃទី៥ ខែមករា (ម៉ោងអាមេរិក)។
លោក Warnock វ័យ៥១ឆ្នាំ ជាអតីតគ្រូគង្វាលក្នុងវិហារគ្រិស្តសាសនាក្នុងក្រុង Atlanta ។ ជ័យជម្នះរបស់លោក Warnock នាំឲ្យលោកក្លាយជាសមាជិកព្រឹទ្ធសភាអាមេរិកស្បែកខ្មៅដំបូងបង្អស់មកពីរដ្ឋ Georgia ។ ចាប់តាំងពីឆ្នាំ១៩៩២មក រដ្ឋ Georgia មានសមាជិកព្រឹទ្ធសភាទាំងពីររូបមកពីបក្សសាធារណរដ្ឋទាំងអស់។
លទ្ធផលនៅរដ្ឋ Georgia ជាការកំណត់ថា បក្សណានឹងគ្រប់គ្រងព្រឹទ្ធសភាអាមេរិក។ ក្រោយការបោះឆ្នោតថ្ងៃទី៣ ខែវិច្ឆិកា បក្សសាធារណរដ្ឋមាន៥០កៅអីក្នុងដៃទៅហើយ ឯបក្សប្រជាធិបតេយ្យមាន៤៨កៅអី។ ក្នុងការបោះឆ្នោតនេះ ពលរដ្ឋ Georgia ជាង៣លាននាក់ចូលរួមបោះឆ្នោត ដែលជាចំនួនច្រើនជាងការបោះឆ្នោតក្នុងឆ្នាំ២០១៦ទៅទៀត។
លោកស្រី Loeffler ពុំទាន់ទទួលយកលទ្ធផលនៃការបោះឆ្នោត និងទទួលស្គាល់ជ័យជំនះរបស់លោក Warnockឡើយ ដោយសារសំឡេងឆ្នោតនៅប្រកៀកប្រកិតខ្លាំងពេក។ ច្បាប់បោះឆ្នោតរដ្ឋ Georgia អនុញ្ញាតឲ្យបេក្ខជនទាមទាររាប់សន្លឹកឆ្នោតឡើងវិញ បើសិនជាគម្លាតនៃសន្លឹកឆ្នោតស្មើរ ឬតិចជាង០,៥ភាគរយ។
ចំណែកកៅអីទៀត បេក្ខជនបក្សប្រជាធិបតេយ្យ Jon Ossoff ក៏កំពុងនាំមុខគូប្រជែង David Perdue ដែលជាសមាជិកព្រឹទ្ធសភាបច្ចុប្បន្នមកពីបក្សសាធារណរដ្ឋដែរ។
រំឭកទៅការបោះឆ្នោតប្រធានាធិបតីអាមេរិកកាលពីឆ្នាំ២០២០វិញ ប្រធានាធិបតីជាប់ឆ្នោតចូ បៃឌិន ឈ្នះឆ្នោតក្នុងរដ្ឋនេះជាលើកទីមួយក្នុងរយៈពេល២០ឆ្នាំដែរ។ ជ័យជម្នះរបស់បក្សប្រជាធិបតេយ្យ នឹងជួយលោក បៃឌិន អនុម័តគោលនយោបាយសំខាន់ៗរបស់លោក ក៏ដូចជាការយល់ព្រមលើបេក្ខជនក្នុងរដ្ឋាភិបាលផងដែរ។ លើសពីនោះ បើសិនឈ្នះមែននោះ បក្សប្រជាធិបតេយ្យ នឹងគ្រប់គ្រងទាំងសភាតំណាង ទាំងព្រឹទ្ធសភា ទាំងសេតវិមាន។
Tag:
បោះឆ្នោតអាមេរិក
© រក្សាសិទ្ធិដោយ thmeythmey.com
