អន្តរជាតិ
ប៉ូលិសហុងកុង ចាប់ខ្លួនអតីតតំណាងរាស្ត្រនិងសកម្មជនប្រជាធិបតេយ្យច្រើនជាង៥០រូប លោក James To អតីតតំណាងរាស្រ្តហុងកុង និងសកម្មជនគាំទ្រលទ្ធិប្រជាធិបតេយ្យ។ រូបភាព៖ Reuters
× អាជ្ញាធរហុងកុង នៅព្រឹកនៅថ្ងៃទី៦ ខែមករា បានចាប់ខ្លួនអតីតតំណាងរាស្ត្រ និងសកម្មជនគាំទ្រលទ្ធិប្រជាធិបតេយ្យច្រើនជាង ៥០រូប ដែលទាក់ទិននឹងការបំពានច្បាប់សន្តិសុខជាតិហុងកុង។ នេះបើតាមការចុះផ្សាយរបស់សារព័ត៌មានហុងកុង។
ចាប់តាំងពីច្បាប់សន្តិសុខជាតិហុងកុង ដែលត្រូវបានអនុម័តដោយសភាចិន ហើយបានចូលជាធរមាននៅដើមខែកក្កដាកន្លងមក អាជ្ញាធរហុងកុង បានដាក់សម្ពាធយ៉ាងខ្លាំងទៅលើសកម្មជនគាំទ្រលទ្ធិប្រជាធិបតេយ្យ។ ប៉ូលិសហុងកុង បានចាប់ខ្លួនសកម្មជនមាននិន្នាការប្រឆាំងជាច្រើន ហើយតុលាការក៏កាត់ទោសពួកគេបន្តបន្ទាប់ដែរ។
ជាថ្មីម្តងទៀត ប៉ូលិសហុងកុង នៅព្រឹកថ្ងៃទី៦ ខែមករា បានបើកប្រតិបត្តិការ ចាប់ខ្លួនអ្នកតំណាងរាស្ត្រ និងអ្នកគាំទ្រលទ្ធប្រជាធិបតេយ្យ ច្រើនជាង៥០រូប ទាក់ទិននឹងការបោះឆ្នោតមួយកាលពីខែកក្កដា ឆ្នាំ២០២០ ។ អ្នកដែលត្រូវចាប់ខ្លួនមានទាំងអតីតអ្នកតំណាងរាស្ត្រ និងសកម្មជនគាំទ្រលទ្ធិប្រជាធិបតេយ្យ ដូចជាលោក James To, លោក Lam Cheuk-ting និង លោក Lester Shum។
ពួកគេ ត្រូវចោទថា រៀបចំកការបោះឆ្នោតមួយដើម្បីជ្រើសរើសបេក្ខជនតំណាងក្រុមប្រជាធិបតេយ្យ ដើម្បីឈរឈ្មោះក្នុងការបោះឆ្នោតជ្រើសរើសសមាជិកហុងកុងក្នុងខែកញ្ញា។ ការបោះឆ្នោតសភានេះ ត្រូវបានលើកពេលដោយសារជំងឺកូវីដ-១៩។ គម្រោងរបស់ពួកគេ គឺចម្រាញ់យកបេក្ខជនដែលអាចឈ្នះការបោះឆ្នោតសភា និងទទួលបានកៅអីលើស៣៥ក្នុងសភាហុងកុងដែលមាន៧០កៅអី។ អាជ្ញាធរហុងកុងចាត់ទុកជាសកម្មភាពនេះ ជាការធ្វើវិទ្ធង្សនាដែលមានចែងក្នុងច្បាប់សន្តិសុខជាតិ។
មិនតែប៉ុណ្ណោះ អាជ្ញាធរហុងកុង ថែមទាំងចុះទៅការិយាល័យសារព័ត៌មាន Stand News, កាសែត Apple Daily និងសារព័ត៌មាន In-Media ដែលមាននិន្នាការទៅរកលទ្ធិប្រជាធិបតេយ្យផងដែរ។ ក្នុងប្រតិបត្តិការនេះ អ្នកសារព័ត៌មាន Stand News បានអះអាងថា ប៉ូលិស បានស្នើឲ្យនិពន្ធនាយករបស់ ពួកគេចុះហត្ថលេខាលើឯកសារជាច្រើនច្បាប់ ដែលទាក់ទិននឹងការស៊ើបអង្កេតលើច្បាប់សន្តិសុខជាតិហុងកុង។
ជុំវិញការចាប់ខ្លួននេះ លោក John Lee Ka-chiu រដ្ឋមន្ត្រីសន្តិសុខទីក្រុងហុងកុង បានចោទអ្នកនយោបាយបក្សប្រឆាំងថា មានគម្រោងអាក្រក់ ចង់ផ្តួលរលំរដ្ឋាភិបាលហុងកុង។ ក្នុងន័យនេះ លោក Jonh បានលើកឡើងថា យុទ្ធសាស្ត្ររបស់ពួកគេ គឺធ្វើឲ្យរាំងស្ទះការងារក្នុងសភា ជាពិសេសការអនុម័តហិរញ្ញវត្ថប្រចាំឆ្នាំរបស់រដ្ឋាភិបាល។ នេះបើតាមការចុះផ្សាយរបស់កាសែត South China Morning Post ៕
© រក្សាសិទ្ធិដោយ thmeythmey.com