ជារៀងរាល់ឆ្នាំ ឲ្យតែដល់ថ្ងៃ៧មករា គេ តែងឃើញការតបតគ្នាទៅវិញទៅមករវាងអ្នកស្រឡាញ់រដ្ឋាភិបាល និងមិនសូវពេញចិត្តនឹងរដ្ឋាភិបាល។ សម្រាប់ទិវារម្លឹកខួប៧មករា ក្នុងឆ្នាំ២០២១នេះ ក៏មិនខុសពីឆ្នាំមុនៗដែរ ដោយម្ខាង គោរពឲ្យតម្លៃ ឯម្ខាងទៀត រិះគន់វាយប្រហារ។
អ្នកគាំទ្រគណបក្សកាន់អំណាច ចាត់ទុក៧មករា ជាថ្ងៃកំណើតទី២ ហើយយល់ថា បើគ្មាន៧មករា ក៏គ្មានអ្វីៗក្នុងពេលបច្ចុប្បន្នដែរ។ ប៉ុន្តែ អ្នកមាននិន្នាការប្រឆាំងខ្លះ មិនត្រឹមតែមិនទទួលស្គាល់គុណូបការៈ៧មករាទេ តែថែមទាំងចាត់ទុក៧មករា ជាថ្ងៃ ដែលវៀតណាមចូលឈ្លានពានកម្ពុជាទៅវិញ។
លោក ហូ វ៉ាន់ ធ្លាប់ជាតំណងរាស្ត្រនៃអតីតគណបក្សប្រឆាំង និយាយចំៗថា ៧មករា ជាថ្ងៃវៀតណាម ឈ្លានពានកម្ពុជា។ មន្ត្រីជាន់ខ្ពស់អតីតគណបក្សប្រឆាំង ដែលកំពុងរស់នៅឯក្រៅប្រទេសរូបនេះ បានសរសេរលើគណនីហ្វេសប៊ុកដូច្នេះថា៖«កាឡៃប្រវត្តិសាស្ត្រឲ្យខ្មែរដឹងគុណ ក្រោមស្លាករំដោះកម្ពុជា ពីរបបប្រល័យពូជសាសន៍ ប៉ុល ពត។ រហូតដល់ពេលនេះ ទើបខ្មែរភ្លឺភ្នែក ឃើញគ្រប់ឧបាយកលឈ្លានពានរបស់វៀតណាម»។
ថ្វីបើលោក ហូ វ៉ាន់ ឬអ្នកប្រឆាំងផ្សេងទៀត មិនទទួលស្គាល់ថា ការរំដោះកម្ពុជា ចេញពីរបបខ្មែរក្រហម មានចំណែកនៃការជ្រោមជ្រែងពីវៀតណាមក្តី ប៉ុន្តែមេដឹកនាំកំពូលនៃគណបក្សប្រជាជនកម្ពុជា២រូប គឺសម្តេចនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា និង សម្តេច ហេង សំរិន ប្រធានកិត្តិយសគណបក្សប្រជាជនកម្ពុជា នៅតែបន្តរំលេចក្នុងសាររបស់ខ្លួន ពីគុណូបការៈរបស់កងទ័ពវៀតណាម ដែលបានចូលរួមជាមួយយុទ្ធជន-យុទ្ធនារីនៃរណសិរ្សសាមគ្គីសង្គ្រោះជាតិកម្ពុជា និងអ្នកស្នេហាជាតិខ្មែរដទៃទៀត ក្នុងការជួយរំដោះកម្ពុជា ចេញពីរបបខ្មែរក្រហម។
តាមរយៈសារលិខិត ដែលចេញក្នុងនាមជាប្រមុខគណបក្សប្រជាជនកម្ពុជា សម្តេចនាយករដ្ឋមន្ត្រី លើកពីគុណបំណាច់នៃថ្ងៃជ័យជម្នះ៧មករា ដែលនាំឲ្យកម្ពុជា រួចផុតពីរបបខ្មែរក្រហម ហើយបានស្គាល់សុខសន្តិភាព សិទ្ធិសេរីភាព និង ការអភិវឌ្ឍឡើងវិញ។ ប្រមុខរដ្ឋាភិបាលរូបនេះ សរសេរថា កម្ពុជា ពីទឹកដីមួយជាវាលពិឃាត ជាសមរភូមិនៃសង្គ្រាមផ្ទៃក្នុងដ៏រ៉ាំរ៉ៃ ជាប្រទេសក្រីក្រឱនថយបំផុតផ្នែកសេដ្ឋកិច្ច ជាប្រជាជាតិត្រូវគេប្រមាថ និង ឯកោ បានក្លាយទៅជាប្រទេសដែលអនុវត្តយ៉ាងខ្ជាប់ខ្ជួននូវគោលការណ៍លទ្ធិប្រជាប្រជាធិបតេយ្យ សិទ្ធិមនុស្ស នីតិរដ្ឋ ជាទឹកដីដែលមានសុខសន្តិភាពពេញលេញ និង ជាប្រទេសមានសេដ្ឋកិច្ចកំពុងលូតលាស់យ៉ាងលឿន ធ្វើឲ្យជីវភាពប្រជាជន កាន់តែមានភាពល្អប្រសើរឡើង ហើយកិត្យានុភាពជាតិ ត្រូវបានលើកកម្ពស់ឡើងវិញលើឆាកអន្តរជាតិ។
ប្រមុខគណបក្សដឹកនាំរដ្ឋាភិបាល លើកតម្កើងគុណតម្លៃនៃថ្ងៃ៧មករាថា៖«ស្មារតី៧មករា គឺសាមគ្គីភាព វីរភាព និង ជ័យជម្នះ។ ស្មារតី៧មករា ធ្វើឲ្យយើង ប្តូរផ្តាច់ថែរក្សារាល់សមិទ្ធផលនៃសង្គមជាតិ និងការពារមិនឲ្យកើតមានជាថ្មីនូវអំពើប្រល័យពូជសាសន៍ សង្គ្រាម និង ការបែកបាក់ផ្ទៃក្នុងជាតិដូចពេលមុនទៀត។ ស្មារតី៧មករា គុណតម្លៃជាអមតៈសម្រាប់ជាតិ និងប្រជាជនកម្ពុជា ក្នុងការបន្តដំណើរទៅមុខទៀតលើកមាគ៌ាឯករាជ្យ សន្តិភាព សេរីភាព អព្យក្រឹត្យ ប្រជាធិបតេយ្យ និង វឌ្ឍនភាពសង្គម»។
សាររបស់សម្តេច ហេង សំរិន ដែលបង្ហោះលើទំព័រហ្វេសប៊ុក បានបញ្ជាក់ថា ជ័យជម្នះ៧មករា ឆ្នាំ១៩៧៩ បានផ្តល់ឱកាសពេញលេញដល់កម្ពុជា ក្នុងការកសាងសុខសន្តិភាព និងការអភិវឌ្ឍប្រទេសជាតិ ឲ្យមានការចម្រើនលូតលាស់ជាបន្តបន្ទាប់។
សំណេររបស់ប្រធានកិត្តិយសគណបក្សកាន់អំណាចរូបនេះ គឺ៖«យើងបានប្រែក្លាយពីប្រទេសគ្មានអ្វីសោះ មកជាប្រទេសមានចំណូលមធ្យមកម្រិតទាប ហើយយើងបន្តប្រឹងប្រែង អភិវឌ្ឍប្រទេសក្លាយជាប្រទេសមានចំណូលមធ្យមកម្រិតខ្ពស់ និងជាប្រទេសមានចំណូលខ្ពស់នាពេលអនាគត តាមចក្ខុវិស័យច្បាស់លាស់និងត្រឹមត្រូវរបស់យើង»។
លោក គឹម សុខ អ្នកវិភាគនយោបាយ ដែលនិរទេសខ្លួនទៅបរទេស បានបង្ហោះសារលើគណនីហ្វេសប៊ុកថា៖«ព្រលឹង៧មករារស់ ខ្មែរវិនាស អាចធ្លាក់សូន្យ»។ លោក យល់ថា ដើម្បីអាចសង្គ្រោះស្ថានការណ៍កម្ពុជាបាន គឺត្រូវការគណបក្សប្រឆាំងខ្លាំង ហើយគណបក្សប្រឆាំង អាចខ្លាំងបាន គឺត្រូវការមេដឹកនាំនយោបាយខ្លាំង។ សម្រាប់លោក មេដឹកនាំនយោបាយខ្លាំង គឺជាបុគ្គលដែលមានគុណសម្បត្តិមួយចំនួន ដូចជា ឆន្ទៈជាតិ សីលធម៌នយោបាយ ផែនការជាក់លាក់ គុណធម៌នយោបាយ និងហ៊ានធ្វើពលិកម្មដឹកនាំអនុវត្តផែនការ ទោះជាជីវិតត្រូវប្រឈម ជាដើម។
លោក មាជ សុវណ្ណារ៉ា មន្ត្រីជាន់ខ្ពស់ម្នាក់នៃអតីតគណបក្សប្រឆាំង បានបញ្ចេញមតិលើគណនីហ្វេសប៊ុកដែរថា ៧មករា ជាថ្ងៃដែលខ្មែរមិនទាន់អាចឯកភាពទទួលយកបានជាថ្ងៃរួមនៃបុណ្យជាតិ ព្រោះតែមតិចម្រូងចម្រាស់គ្នាទាំង២ គឺ១ យល់ថា ៧មករា ជាថ្ងៃវៀតណាម ចូលឈ្លានពានកម្ពុជា និង១ទៀត យល់ថា ជាថ្ងៃវៀតណាមចូលមកជួយរំដោះកម្ពុជាចេញពីរបបខ្មែរក្រហម។
លោក មាជ សុវណ្ណារ៉ា ដែលធ្លាប់ជាប់ពន្ធនាគារជាង៣ឆ្នាំ ពីបទដឹកនាំធ្វើកុប្បកម្ម ហ៊ានអះអាងថា បើវៀតណាម ពិតជាចូលជួយខ្មែរឲ្យរស់រានមានជីវិតផុតចេញពីរបបវាលពិឃាតមែន ពលរដ្ឋខ្មែរ ពិតជាមិនភ្លេចគុណទេ។ ប៉ុន្តែ លោក បានលើកចម្ងល់ដែលមនុស្សមួយចំនួនធ្លាប់ឆ្ងល់កន្លងមកថា ចុះពេលចូលមករំដោះខ្មែររួចហើយ ហើយបើវៀតណាម មានភាពស្មោះត្រង់ ដោយមិនចូលមកឈ្លានពានកម្ពុជាពិតមែន ហេតុដូចម្តេច វៀតណាម មិនសហការជាមួយសហគមន៍អន្តរជាតិ ជាពិសេសអង្គការសហប្រជាជាតិ ឲ្យចូលមកជួយធ្វើអន្តរាគមន៍ការពារខ្មែរបន្តជាមួយគ្នា? ម្តេចវៀតណាម ចាំបាច់បន្តកើតជាសង្គ្រាមវាយប្រយុទ្ធគ្នាជាង១០ឆ្នាំជាមួយអតីតចលនាតស៊ូត្រីភាគី (សម្តេចព្រះ នរោត្តម សីហនុ លោក សឺន សាន និង លោក ខៀវ សំផន)?
មន្ត្រីជាន់ខ្ពស់នៃអតីតគណបក្សប្រឆាំង ដែលកំពុងរស់នៅក្នុងស្រុករូបនេះ មិនបានអារកាត់ដោយខ្លួនឯងនោះទេថា ថ្ងៃ៧មករា ឆ្នាំ១៩៧៩ ជាថ្ងៃវៀតណាម ចូលមកជួយឬចូលមកឈ្លានពានកម្ពុជា។ ប៉ុន្តែ លោក បែរជាឲ្យតម្លៃយ៉ាងជាក់លាក់លើសន្ធិសញ្ញាសន្តិភាពទីក្រុងប៉ារីសទៅវិញ។
លោក បង្ហាញទស្សនរបស់លោកថា៖«បើយើងនិយាយជារួម ថ្ងៃដែលឯកភាពគ្នាដោយសន្តិភាពទាំងជាតិនិងអន្តរជាតិសម្រាប់កម្ពុជា គឺ ២៣តុលា ឆ្នាំ១៩៩១ នៃសន្ធិសញ្ញាសន្តិភាពក្រុងប៉ារីស ដែលគ្រប់ជម្លោះភាគីទាំង៤ [គឺ រដ្ឋកម្ពុជា សម្តេចព្រះ នរោត្តម សីហនុ លោក សឺន សាន និង ខ្មែរក្រហម] បានឯកភាពគ្នាបញ្ចប់សង្គ្រាមប្រយុទ្ធគ្នា»។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បាននិយាយនូវពាក្យ ដែលគណបក្សរបស់លោក តែងនិយាយកន្លងមកថា ថ្ងៃ៧មករា ឆ្នាំ១៩៧៩ គឺជាថ្ងៃសច្ចធម៌ប្រវត្តិសាស្ត្រ និងជាថ្ងៃកំណើតទី២របស់ប្រជាជនកម្ពុជា។ លោក បន្តថា មានថ្ងៃ៧មករា ឆ្នាំ១៩៧៩ ទើបមាននយោបាយបង្រួបបង្រួមជាតិ និងឈានដល់ការចុះកិច្ចព្រមព្រៀងសន្តិភាពទីក្រុងប៉ារីសថ្ងៃ២៣តុលា ឆ្នាំ១៩៩១។
លោក បន្ថែម មានថ្ងៃ៧មករា ឆ្នាំ១៩៧៩ ទើបមាននយោបាយឈ្នះឈ្នះ ដែលធ្វើឲ្យអង្គការចាត់តាំងនយោបាយនិងយោធាខ្មែរក្រហមត្រូវរលំរលាយទាំងស្រុង ហើយនាំមកនូវសន្តិភាពពេញលេញនិងការឯកភាពជាតិនៅក្នុងប្រវត្តិសាស្ត្រកម្ពុជា។ លោក មានប្រសាសន៍ទៀតថា មានសន្តិភាពនិងការឯកភាពជាតិ ទើបកម្ពុជា មានឱកាស ដើម្បីកសាងនិងអភិវឌ្ឍប្រទេស ឲ្យមានការរីកចម្រើនដូចសព្វ។
តាមរយៈសារក្នុងបណ្តាញទំនាក់ទំនងតេឡេក្រាម អ្នកនាំពាក្យគណបក្សកាន់អំណាចរូបនេះ សរសេរដូច្នេះថា៖«មានថ្ងៃ៧មករា៧៩ ទើបមានជីដូនជីតាយើង មានឪពុកម្តាយយើង មានបងប្អូនយើង និង មានយើងថ្ងៃនេះ។ មានថ្ងៃ៧មករា ទើបមានអ្វីៗទាំងអស់នៅថ្ងៃនេះនិងទៅអនាគតទៀត»។
នៅថ្ងៃទី៧ ខែមករា ឆ្នាំ២០២១នេះ គឺជាខួបលើកទី៤២នៃទិវាជ័យជម្នះ៧មករា។ ដោយនៅបារម្ភពីការរាលដាលជំងឺកូវីដ-១៩ គណបក្សប្រជាជនកម្ពុជា សម្រេចមិនប្រារព្ធនិងជួបជុំគ្នាទ្រង់ទ្រាយធំដូចរៀងរាល់ឆ្នាំឡើយ។ តែគណបក្ស ដែលដឹកនាំរដ្ឋាភិបាលជាង៣ទសវត្សរ៍មួយនេះ បានណែនាំឲ្យគ្រប់សាខារបស់ខ្លួន រៀបចំស្លាកសញ្ញា (Logo) និងពាក្យស្លោកផ្សេងៗ នៅតាមទីតាំងនានា ដើម្បីអបអរសាទរទិវា៧មករា។
គេ មិនដឹងថា ពេលណា ទើបខែ្មរគ្រប់ភាគី មានឯកភាពគ្នាលើថ្ងៃ៧មករានេះឡើយ៕