កីឡាអន្តរជាតិ
អន្តរជាតិ
Premier League រកឃើញអ្នកឆ្លង COVID-19 ៤០ករណី ច្រើនបំផុតមិនធ្លាប់មាន
× ក្របខណ្ឌ Premier League បានបញ្ជាក់នៅថ្ងៃទី៥ ខែមករាថាមានកីឡាករ និងបុគ្គលិកចំនួន ៤០ នាក់បានធ្វើតេស្តចេញលទ្ធផលវិជ្ជមានជំងឺ COVID-19 បន្ទាប់ពីការធ្វើតេស្តពីរលើកកាលពីសប្តាហ៍មុន។ បើទោះមានករណីឆ្លងច្រើន ហើយអង់គ្លេសទើបបិទប្រទេសជាថ្មី ប៉ុន្តែការប្រកួតលីគអាជីពរនៅតែមិនមានការពន្យារ ឬផ្អាកឡើយ។
តួលេខដ៏ច្រើននេះ ជាចំនួនឆ្លងទ្វេដងបើធៀបនឹងកំណត់ត្រាមុនៗ ដែលមានចំនួនច្រើនបំផុត១៨ករណី។ កាលពីសប្តាហ៍មុន ជំនួបក្នុងលីគកំពូលអង់គ្លេសចំនួន៣ប្រកួតត្រូវពន្យារពេល ដោយសារការផ្ទុះឡើងជាថ្មីនៃជំងឺរាតត្បាតសកលនេះ។ ប្រទេសអង់គ្លេស ក្រោមការសម្រេចរបស់នាយករដ្ឋមន្ត្រីលោក Boris Johnson បានបិទប្រទេសជាថ្មីម្តងទៀតនៅថ្ងៃទី៥ មករា ដើម្បីទប់ស្កាត់ការកើនឡើងករណីឆ្លងថ្មី។
ការធ្វើតេស្តពីរដងក្នុងមួយសប្តាហ៍ត្រូវបានអនុវត្តន៍នៅរដូវកាលមុនសម្រាប់ក្របខណ្ឌ Premier League ប៉ុន្តែរដូវកាលថ្មីនេះបានកាត់បន្ថយត្រឹម១លើកក្នុងមួយសប្តាហ៍។ ការធ្វើតេស្តលើកទី១ លើមនុស្ស១៣១១នាក់ កាលពីសប្តាហ៍មុនមានករណីវិជ្ជមានចំនួន២៨ករណី និងលើកទី២ចេញលទ្ធផលវិជ្ជមានចំនួន១២ករណីបន្ថែមទៀត ពីការធ្វើតេស្តលើចំនួនសមាជិកនៃលីគកំពូលអង់គ្លេស៩៨៤រូប។
បើទោះជាមានការបិទប្រទេស និងករណីឆ្លងច្រើននៅ Premier League បែបនេះក្តី ប៉ុន្តែរដ្ឋាភិបាលអង់គ្លេសនៅតែអនុញ្ញាតឲ្យការប្រកួតលីគកីឡាបាល់ទាត់ និងកីឡាកម្រិតអាជីពនៅអង់គ្លេសផ្សេងទៀតបន្តយុទ្ធនាការរបស់ខ្លួនដដែល ក្រោមលក្ខខណ្ឌបិទទ្វារកីឡដ្ឋាន៕
Tag:
Premier League
COVID-19
© រក្សាសិទ្ធិដោយ thmeythmey.com