ចិន ប្រាប់ WHO កុំឲ្យបារម្ភពីការពន្យារពេលបេសកកម្មអ្នកជំនាញអន្តរជាតិ

COVID-19

អន្តរជាតិ

ចិន ប្រាប់ WHO កុំឲ្យបារម្ភពីការពន្យារពេលបេសកកម្មអ្នកជំនាញអន្តរជាតិ

07, Jan 2021 , 7:29 pm

រូបភាព

លោកស្រី Hua Chunying អ្នកនាំពាក្យក្រសួងការបរទេសចិន។ រូបថតពីក្រសួងការបរទេសចិន

ដោយ:

នៅថ្ងៃទី៦ មករា ក្រសួងការបរទេសចិនប្រាប់អង្គការសុខភាពពិភពលោក (WHO) កុំឲ្យបារម្ភខ្លាំងពេកចំពោះការពន្យារក្នុងការផ្តល់ការអនុញ្ញាតឲ្យចូលប្រទេសចិនរបស់ក្រុមការងារ WHO ។ ក្រសួងការបរទេសចិន អះអាងថា ក្រៅពីផ្តការល់ទិដ្ឋាការ ខ្លួនកំពុងធ្វើការលើដំណើរការចាំបាច់សម្រាប់ការស៊ើបអង្កេតរបស់ក្រុមការងារ WHO ផងដែរ។

នៅថ្ងៃទី៥ មករា អគ្គនាយកWHO លោកTedros Adhanom Ghebreyesus និយាយថាលោកខកចិត្តយ៉ាងខ្លាំងចំពោះរដ្ឋាភិបាលចិន ដែលពុំទាន់អនុញ្ញាតឲ្យក្រុមការងារអន្តរជាតិរបស់អង្គការនេះ ចូលទៅសិក្សាពីប្រភពនៃជំងឺឆ្លងកូវីដ-១៩នៅចិន។ លោក Tedros រំឭកអាជ្ញាធរចិនថា បេសកកម្មស្រាវជ្រាវរបស់អ្នកជំនាញ ជាអាទិភាពរបស់ ស្ថាប័នសុខាភិបាលអន្តរជាតិមួយនេះ។

អត្ថបទទាក់ទង

ប្រមុខ WHO ខកចិត្តនឹងចិន ដែលមិនទាន់អនុញ្ញាតឲ្យអ្នកជំនាញចូលស្រាវជ្រាវប្រភពកូវីដ-១៩

បេសកកម្ម WHO នៅចិននឹងផ្តោតលើប្រភពកូវីដ-១៩ មិនមែនទៅរកកំហុសអ្នកណាឡើយ

តបទៅនឹងការលើកឡើងរបស់ប្រមុខ WHO លោកស្រី Hua Chunying អ្នកនាំពាក្យក្រសួងការបរទេសចិនអះអាងថា ការមិនទាន់អនុញ្ញាតឲ្យក្រុមអ្នកជំនាញចូលប្រទេសចិន មិនមែនមកពីបញ្ហាទិដ្ឋាការមួយមុខប៉ុណ្ណោះទេ។ លោកស្រី Hua លើកឡើងថា មានការយល់ច្រលំរវាងចិន និង WHO ហើយភាគីទាំងពីរកំពុងពិភាក្សាពីពេលវេលា និងការរៀបចំផ្សេងៗទៀត។

«អាចនឹងមានការយល់ច្រឡំ ប៉ុន្តែគេមិនចាំបាច់បកស្រាយច្រើនជាងនេះឡើយ»។ នេះជាការលើកឡើងរបស់លោកស្រី Hua ក្នុងសន្និសីទសារព័ត៌មាន នាថ្ងៃទី៦ មករា។ លោកស្រីបន្តថា អ្នកជំនាញចិន ក៏កំពុងរវល់ជាមួយនឹងទប់ស្កាត់ការឆ្លងនៃជំងឺកូវីដ-១៩ បំប្លែងខ្លួន ដែលផ្ទុះឡើងក្នុងទីតាំងមួយចំនួនក្នុងប្រទេសចិន។

ចំណែកលោក Liang Wannian អ្នកជំនាញជំងឺឆ្លង និងជាអ្នកពិនិត្យវិធានការប្រឆាំងនឹងជំងឺកូវីដ-១៩ របស់ចិន អះអាងថា បេសកកម្មរបស់ WHO នឹងចាប់ផ្តើមនាពេលឆាប់ៗខាងមុខនេះ។ ក្នុងកិច្ចសម្ភាសជាមួយសារព័ត៌មាន Bloomberg នាថ្ងៃទី៦ មករា លោកបញ្ជាក់ថា ក្រុមកាងារ WHO និងអ្នកជំនាញចិន នឹងរួមគ្នាវិភាគទិន្ន័យ និងសំណាកតេស្តដែលយកមកពីផ្សារលក់សត្វព្រៃក្នុងក្រុងវូហាន ទីដែលជំងឺកូវីដ-១៩ ផ្ទុះឡើងដំបូង។ លោកLiang ធ្វើការរួមគ្នាជាមួយWHO ក្នុងការបង្កើតផែនការតាមរកប្រភពនៃជំងឺកូវីដ-១៩ តាំងតែពីខែកក្កដា ឆ្នាំ២០២០មកម្ល៉េះ។

ការពន្យារពេលដោយចិននេះ នាំឲ្យសហគមន៍អន្តរជាតិបារម្ភ និងសង្ស័យថា រដ្ឋាភិបាលចិនមានបំណងក្នុងការរារាំង ការស្វែងរកប្រភពជំងឺកូវីដ-១៩ ដែលបានសម្លាប់មនុស្សជាង១,៨លាននាក់។ ហ៊ុំព័ទ្ធដោយការរិះគន់ពីសហគមន៍អន្តរជាតិចំពោះការលាក់បាំងពីស្ថានការណ៍ធ្ងន់ធ្ងរនៃជំងឺនេះនៅពេលផ្ទុះឡើងដំបូង សារព័ត៌មានរដ្ឋចិន និងរដ្ឋមន្ត្រីការបរទេសចិនផង លើកឡើងថា ការសិក្សាជាច្រើនបង្ហាញថាជំងឺនេះមិនមែនផ្ទុះឡើងក្នុងប្រទេសចិនតែមួយប៉ុណ្ណោះទេ។ ការលើកឡើងនេះ នាំឲ្យមន្ត្រី WHO អះអាងថា ជាការស្មានដោយគ្មានភស្តុតាងច្បាស់លាស់។

ក្រសួងការបរទេសចិន អះអាងថា WHO និងចិនសម្រេចបានកិច្ចព្រមព្រៀងស្តីពីការស្រាវជ្រាវប្រភពជំងឺឆ្លងកូវីដ-១៩ កាលពីខែតុលា ឆ្នាំ២០២០។ ចិន ក៏បានអញ្ជើញអ្នកជំនាញរបស់WHOមកទស្សនកិច្ចនៅចិនចំនួន២ដងដើម្បីសហការក្នុងការស្វែងរកប្រភពជំងឺ និងបានជួបប្រជុំពីចម្ងាយចំនួន៤ដងផងដែរ៕