COVID-19
អន្តរជាតិ
ថៃ មានកូវីដ-១៩ ចំនួន២០៥ករណីទៀត ខណៈការចាក់វ៉ាក់សាំងនឹងចាប់ផ្ដើមនៅខែក្រោយ
បុគ្គលិកសន្តិសុខថៃ វាស់កម្តៅលើប្រជាជននៅក្នុងទីក្រុងបាងកក។ រូបភាព៖ AFP
×![]()
ដោយ: ធៀន ភារិន្ទ
រដ្ឋាភិបាលថៃ នៅថ្ងៃទី៨ ខែមករា បានរាយការណ៍ពីករណីឆ្លងកូវីដ-១៩ ចំនួន២០៥ករណីទៀត។ ដើម្បីទប់ស្កាត់ការរាលដាល រដ្ឋាភិបាលថៃ បានកំណត់កាលបរិច្ឆេទចាក់វ៉ាក់សាំងឲ្យប្រជាជនខ្លួនដែលមាន៣ដំណាក់កាល ហើយចាប់ផ្តើមពីខែកុម្ភៈតទៅ។
ករណីឆ្លងកូវីដ-១៩ សរុបមានចំនួន២០៥ ដែលរដ្ឋាភិបាលថៃប្រកាសនៅថ្ងៃទី៨ ខែមករា មានករណីឆ្លងក្នុងស្រុកមានចំនួន ១៨៩ និងករណីឆ្លងមកពីក្រៅប្រទេសមានចំនួន១៦ករណី។ ក្នុងករណីឆ្លងប្រចាំថ្ងៃនេះ ខេត្តសមុទ្រសាគរ បានកត់ត្រាករណីឆ្លងច្រើនជាងគេ បន្ទាប់មកទីក្រុងបាងកក និងខេត្តផ្សេងៗទៀត។ នេះបើតាមការចុះផ្សាយរបស់កាសែតបាងកកប៉ុស្តិ៍។
មកទល់ពេលនេះ ករណីឆ្លងកូវីដ-១៩ សរុបបានកើនដល់ ៩៨៤១ករណី និងអ្នកស្លាប់មានចំនួន ៦៧នាក់។ ចំណែកអ្នកជាសះស្បើយមានចំនួន ៥២៥៥នាក់។
ក្នុងគោលដៅទប់ស្កាត់ការរាលដាលជំងឺនេះ ថៃបានកំណត់ ៣ដំណាក់កាលក្នុងការចាក់វ៉ាក់សាំងឲ្យប្រជាជនរបស់ខ្លួន។ ក្នុងការចាក់វ៉ាក់សាំងនេះ ប្រធាននាយកដ្ឋានគ្រប់គ្រងជំងឺឆ្លង លោក Opas Karnkawinpong បានលើកឡើងថា នៅក្នុងដំណាក់កាលទី១ ថៃនឹងចាក់វ៉ាក់សាំងចំនួន ២លានដូស លើក្រុមមនុស្សដែលងាយរងគ្រោះដោយសារកូវីដ-១៩ មានក្រុមគ្រូពេទ្យថែទាំអ្នកជំងឺ និងមនុស្សចាស់ចាប់ពីអាយុ ៦០ឡើងទៅ។
វ៉ាក់សាំងក្នុងដំណាក់កាលដំបូង ថៃនឹងប្រើប្រាស់វ៉ាក់សាំងក្រុមហ៊ុនចិន Sinovac។ ថ្មីៗនេះ អ្នកនាំពាក្យរដ្ឋាភិបាលថៃ លោក Anucha Burapachaisri ក៏បានបញ្ជាក់ថា វ៉ាក់សាំងរបស់ក្រុមហ៊ុន Sinovac នឹងចាក់ឲ្យបុគ្គលិកសុខាភិបាលនៅខែកុម្ភៈខាងមុខផងដែរ។
ចំណែកនៅដំណាក់កាលទី២ ថៃ នឹងចាក់វ៉ាក់សាំងចំនួន២៦លានដុល្លារឲ្យប្រជាជនរបស់ខ្លួន ពីខែឧសភា ដល់ខែ មិថុនា ដើម្បីការពារសេដ្ឋកិច្ចជាតិ, សង្គម និងសន្តិសុខ។ ក្នុងដំណាក់កាលទី២នេះ វ៉ាក់សាំងរបស់ក្រុមហ៊ុន AstraZeneca នឹងយកមកចាក់ក្រុមមនុស្សដែលងាយរងគ្រោះដោយសារកូវីដ-១៩ នៅទូទាំងប្រទេស។ ដំណាក់កាលចុងក្រោយ ចាប់ផ្តើមពីខែកក្កដា ដល់ដើមឆ្នាំ២០២២។ ប្រជាជនទូទៅ អាចទទួលបានវ៉ាក់សាំង៕
Tag:
ថៃ
កូវីដ-១៩
© រក្សាសិទ្ធិដោយ thmeythmey.com
